Tâm măng dŭt năm, tâm ngih tă geh tahen kơl ndâk nkra an, ueh, duh răm, wa Trần Thị Ba, tâm thôn Phú Hậu, xã Phú Hiệp, n’gor Khánh Hoà nkah tay ăp măng kơt nê bah rlau du khay bah năp, dak lip hao ngăch, wa ndrel ƀon lan dôl ma tŭp tâm nau khuch ngăn. Rnôk ma mô hôm ŭch nsôih, ăp tahen hŏ năn tât, kơl an wa dôl tâm nau rêh ma khĭt:

‘Gâp mĭn lah lĕ ma ngih hên khĭt hôm. Dak hao ngăch ê tă mâp saơ geh ơm. Gâp kuăl bu tât kơl hô ngăn, lap lah ăp kônh tahen tât ri gâp rhơn ngăn. Gâp mô dơi hăn, đă ăp kônh tahen bu bă ân”.

Tâm ntŭk dôl ƀư “Nau kan Quang Trung’ ndâk tay jêh dak lip Khánh Hoà nar aơ, geh ăp tahen Hải quân nkuăl 4. Tahen leo gạch, leo choih xi măng kơl ndâk ngih ân ƀon lan tâm ăp nar dŭt năm aơ, kŏ rnơm tahen blau ngăn, ngăch ngăn hŏ leo ăp bôk duk tă bah rnôk aơ 3 pơh, leo kơl an nsĭt tay nau rêh ân ƀon lan, Chuân Đô đốc Nguyễn Anh Tuấn, Tư lệnh nkuăl 4 Hải quân mbơh: Măng 19/11, rnôk ndơn nau.

N’gâng kan rđau kan hŏ ntrŭnh đă nau hăn nkre tâm rnôk mih têh, dak nkol, rmôt tahen tât tâm ăp ntŭk geh dak băm jru ngăn tâm gleh mông,rlau 5000 tŏ cán bộ, tahen ndrel 100 bôk duk mpan geh rgum, ƀư nau kơl an, ntrơn leo 5.400 nŭih ƀon lan tât ntŭk gŭ đăp mpăn, tâm nê geh 6 kon se mhe deh ndrel du hê bu ur bơi deh. Chuẩn đô đốc Nguyễn Anh Tuấn, nkoch:

‘Rnôk đồng chí Bí thư rđau đă lah 8h măng ri phung hên ntơm hăn, 9h hŏ tât tâm nkuăl Diên Khánh. Phung hên hăn tâm ăp nkuăl jru ngăn tâm ƀon, tâm xã, ăp ntŭk nê rnôk nê mô dơi geh lăp ôh. Nua đă rđau prêh ngăn rnôk nê lah ân geh hăn ndrel ma tahen. Tâm rmôt kan moh nau geh ri leo gay kơl an ƀon lan lĕ”.

Nau rđau kan tât hăn tĭng uănh, hăn ndrel ma tahen kơl an ăp bôk nau kan kơl an geh ƀư ngăch, năn, ndal, hŭch dêh ngăn nau khuch tât nŭih tâm rnôk mih dak lip rlet rlau ma nau nơm nchrăp ƀư. Nuih n’hâm ƀư nau kan mro lah “kơl an ƀon lar, mbơh nau ba kơi”. Tâm 2 nar 20-21/11, tahen ngluh 3 tấn ndơ sa, rgum máy trih dak gay pă dak kloh ân ƀon lan ntŭk geh dak lip. Rnôk dak rhuăt tahen lŏ kơl an rep kloh ntŭk ntu, n’hong trong hăn, kơl an ndâk tay ngih vâl, ngih săm ƀŭt. Thiếu tá Nguyễn Công Trứ, Ban Công Binh, ngih săm ƀŭt Sĩ quan Không quân mbơh:

‘Tahen kơl rep kloh ngih ma ty, ngih săm ƀŭt rep kloh gay kon se hăn nti. Tât rnôk aơ, ăp nau kan bah dih trong âk ngăn ri ân geh dŏng ndeh klư gay ma kơl an, yơn n’hâm nŭih mô dơi ƀư ôh. Nê lah ndeh chuah neh, ndeh rdeng neh...mkre rep kloh ntŭk ntu nkre ƀư n’hong mbluh trong ân kônh wa hăn ro ân nơih ueh”.

Mô êng rdâng bah năp măt, rmôt tahen n’gor Khánh Hoà hôm nchrăp râng ndâk ăp nau kan kơl an njrăng, rdâng ma khuch khat đŏng, tâm rgop ntĭm nti, mbơh ƀư ăp nau kan kơl an; kơp uănh rmôt kan, ndơ dŏng, nau kơl an tâm ăp gưl tât khuch, ndrel ma nau đă ndâk ân nâp nâl jêh nau khuch tât. N’gâng kan rđau tahen n’gor hŏ ƀư nau kan đah ăp rmôt bah N’gâng kan neh dak, lam n’gor rgum bơi tât 16 rbăn cán bộ, tahenm 283 ndeh klư, duk mpan, ntrơn leo 118.000 nŭih hăn tât ntŭk đăp mpăn. Đại tá Nguyễn Tuý, Rnâng kan rđau kan tahen n’gor Khánh Hoà, lah rjăp:

‘Ân geh hăn lăp tâm ăp nkuăl, pă rmôt tahen, ndơ dŏng tâm di ma ăp ntŭk. Duk mpan, ca nô moh ntil lăp tâm moh ntŭk ân nơih. Rgum nau kơl an kon nŭih lor, jêh nê lŏ leo ndơ sa, dak kloh tât ân kônh wa nrôk ma dak lĕ băm lĕ”.

Rơh mih dak lip rlau aơ nau khuch tât tâm n’gor Khánh Hoà dŭt jâk, đah 22 nŭih khĭt, 209 nŭih rmanh; 89 ngih rlâm lĕ, 290 ngih djơh. Bah năp nau nê, Bí thư n’gor uỷ Khánh Hoà đă ăp hưl, ăp ntŭk kan ƀư ân rjăp 5 “ƀư” ndrel nau kan “4 tahen ntŭk” nkre đăp mpăn nau rêh, nau ndâk kan tuch tăm, kơl an nau njrăng, rdâng khuch khat. Nchră tât nau ƀư bah rmôt tahen, Bí thư N’gor uỷ Khánh Hoà Nghiêm Xuân Thành, lah rjăp:

‘Rmôt tahen, rmôt công an hŏ dŏng kơl an, leo đă âk cán bộ, tahen, âk ndoh ndơ ƀư nau kan tâm di; ngăn ngên lah rmôt kan tơm tâm nau rdâng kơl an ân ƀon lan kŏ kơt lah rmôt nau kan kơl an tơm tâm nau rklaih nau khuch bah mih dak lip rlau aơ”.

Nau ngăn tâm n’gor Khánh Hoà ân saơ, tâm moh nau tât jêr, tahen mro lah ntŭk nsing rnơm nâo nâl bah ƀon lan, lah rmôt kan tơm, leo trong tâm nau mât nau rêh, drăp ndơ ndrle ăp nau kan ndaka nâp tay nau rêh jêh mih dak lip lơh./.