N’gor Dak Lak aƀaơ geh nklăp 33.000 ha sầu riêng, tâm nĕ, nkuăl Krông Pắc dơi uănh lah ntŭk têh sầu riêng bah n’gor aơ. Lah n’gor geh ngăch hao jêng sầu riêng hô ngăn lam dak, yơn nău kan sầu riêng bah Dak Lak dôl rdâng đah âk ntŭl rlong, kơt: nkual tăm mô hŏ rgum, dŭt âk tăm srah đah cà phê; neh tăm hôm e jêt; nkual tăm dơi pă mrô tăm hôm e đêt; kơt dŏng công nghệ nkret njêng n’hanh mât prăp jêh pĕ lêh hun hao mô âk, uĕh kah mô rĭng, boăt nthoi trong khlay mô hŏ rjăp, ntung trong ngih wâl nkra njêng mô rĭng...

Ăp đại biểu an lah, gay dôh rklaih ăp ntŭk kol an geh nău lăp bah lĕ rngôch ăp ding, bah ƀon lan, ngih dak, nuĭh khoa học n’hanh doanh nghiệp. Tĭng Giáo sư, Tiến sĩ Trần Văn Hâu, uĕh kah sầu riêng an dơi uănh lah nkô̆ nău khlay ngăn, yor nê an uănh tât lôch jêh geh kỹ thuật tăm an tĭng nkual

He an ndâk njêng dăp rgum kỹ thuật tăm ta tĭng ntŭk, nkre tĭng nău blău, nău wât bah nuĭh ƀon lan ri mư dơi tăm geh luh ăp play sầu riêng uĕh kah. Uĕh kah sầu riêng lah nău khlay. Yor nê, ăp nuĭh râng tâm trôm khlay bah nuĭh ƀon lan an tât ngih dak, doanh nghiệp lĕ rngôch an wât uănh tât ndâk njêng ndơ sầu riêng bah ntŭk nơm n’hanh sầu riêng bah Việt Nam kơt nĕ mư dơi hun hao nâp nâl.

Hôm tĭng nuĭh way kan tuch tăm mât rong Nguyễn Thị Thành Thực, Việt Nam mô hŏ dơi an nghị định na nê̆  ntĭm mpeh ndâk njêng mrô mkra tăm, nău aơ dôl ƀư jêr jŏt, vĭ vĕ n’hanh knơm tĭng nuĭh êng, đê̆ đŏng mô ban tâm ƀônh nchră kan ndrel đah ăp nuĭh rnôk tăch n’gluh.

Mpôl hên mpŏng ŭch n’hanh dăn đă mpeh N’gâng kan tuch tăm mât rong n’hanh hun hao thôn ƀon, ăp n’gâng kan geh âk trong ntĭm mpeh mrô nkual tăm Việt Nam. Rnôk he mĭn lah n’hanh geh âk saơ mpeh nău khoa học bah mrô nkual tăm kơt nĕ ri he mư mpla nsơ ta lam ntŭr neh n’hanh dăn đă lam ntŭr neh kơp dơn. He an ƀư tơm, mô an geh nău mpet mô lah copy n’hanh lĭr bah ăp dak êng.

Bah n’hêl na nê̆ tăm sầu riêng ta n’gor, wa Trần Văn Thắng, ntoh măt Hợp tác xã rhŏ an nău kan lŏ mir uĕh kloh, nkuăl Krông Pắc, n’gor Dak Lak, mpŏng ngih dak geh trong hun hao nău kan ndơ sầu riêng jŏ jong ndrel ăp trong mkra dôh rklaih ngăch.

Tu tơm dŭt đêt mpeh tơm prăk, nău blău kỹ thuật, nuĭh kan... yor nê mpôl hên dŭt ŭch ăp ngih pah kan dơi kan dơi ntop kơl. Lah ntop kơl dơi đah prăk kaih ri dŭt uĕh mô lah ntop kơl mpeh khoa học kỹ thuật, ntĭm trong ƀư gay m’hâm ƀư uĕh ngăn dơi dŏng prăk đêt ngăn n’hanh n’hao uĕh ndơ đăp mpăn jŏ jong ri mư tâm di ntŭk tăch rwăt bah dak nglăp rwăt.

Lễ hội sầu riêng Krông pắc, n’gor Dak Lak rơh tal 2 năm 2024 lĕ lôch uĕh, n’glơi an âk nău uĕh têh tâm nuih n’hâm ƀon lan n’hanh năch pâl nđaih. Lễ hội wăch rgum rlău 350 ndrơng ndơ bah ăp doanh nghiệp, hợp tác xã, ntŭk nkra njêng-tăch ăp ntil ndơ sầu riêng, ndơ OCOP n’hanh lŏ mir ntĭt mpơl êng, ndơ ntop kơl pah kan lŏ mir... tâm n’hanh bah dih n’gor, rgop mpla nsơ, nkoch mbơh ndơ uĕh, ăp ntil play uĕh kah âk bah n’gor.

Ta lễ hội, rơh bôk năp ăp play sầu riêng uĕh ngăn bah Krông Pắc dơi ƀư tâm rlong khlay, mpôl rdâk ƀư lĕ uănh lah lôch uĕh 3 mlâm play “Nữ hoàng sầu riêng”, đah rnoh prăk 2,8 rmen prăk. Lĕ rngôch rnoh prăk sŏk geh tâm nar tâm rlong khlay dơi dŏng an ƀư trong kan đăp mpăn nău rêh jêng, tiăr nti, ntop kơl nuĭh tăm sầu riêng mpeh kỹ thuật tăm, mât chăm gay n’hao uĕh kah, tâm di nău ŭch tăch n’gluh.

Lễ hội Sầu riêng Krông Pắc, n’gor Dak Lak rơh tal 2 lĕ dơi geh ăp rnoh an ƀư n’gluh an. Năch pâl nđaih dak bah dih, ăp đại sứ quán, ăp doanh nghiệp tâm n’hanh bah dih dak uănh tât ntil nău sầu riêng n’hanh lơn lah nuĭh ƀon lan tâm n’hanh bah dih n’gor uănh tât m’hâm ƀư gay ndâk njêng nău kan ndơ sầu riêng nâp nâl