Jêh rnôk geh nău mbơh ntoh srê ji ndŭl sŭr châu Phi ta du rnăk mât ta xă Ea Kao, Ntŭk mât rong Thsu y nkual ƀon têh Buôn Ma Thuột, n’gor Dak Lak lĕ tâm rgop đah n’gâng kan ƀon lan ƀư ăp trong gay nking n’gang srê rêng. Ntŭk srê ji ndŭl sŭr châu Phi geh ta rnăk mât rong bah wa Bùi Đức Hoạch, ta thôn 1, xă Ea Kao, nkual ƀon têh Buôn Ma Thuột, n’gor Dak Lak.

Rnăk wa Hoạch geh mât 23 mlâm sŭr, tâm nĕ geh rlău 10 mlâm lĕ tăch n’gluh. Jêh uănh năl ntil srê ntưp đah kaman ji ndŭl sŭr châu Phi. Lĕ rngôch sŭr ntưp srê lĕ dơi tâp bôr ta kêng măng 22/8. Wa Hoàng Anh Dũng, Trạm trưởng Ntŭk mât rong Thú y nkual ƀon têh Buôn Ma Thuột, n’gor Dak Lak an gĭt: Ndrel đah tâp bôr rnoh sŭr ntưp srê, ntŭk kan lĕ tâm rgop đah n’gâng kan ƀon lan ntơm nkoch trêng an ăp rnăk mât rong. Ntĭm rđău nuĭh kan thú y bah dâng gĭt nu nău ta ntŭk, ntĭm nuĭh mât rong kơt dŏng ăp trong njrăng n’gang srê, tâp bôr di trong đah sŭr khĭt lah geh.