N’gor Sóc Trăng lah ntŭk geh tât rlău 35% rnoh nuĭh lah ƀon lan rnoi mpôl đê̆ gŭ rêh. Tâm ăp năm aơ, n’gor hŏ way uănh khlay tĭng ƀư năn ngăch, geh nău tam trong kơl bah Đảng n’hanh Ngih dak đah ƀon lan rnoi mpôl đê̆. Nơm geh kơt nê̆, nău rêh bah ƀon lan rnoi mpôl đê̆ lah nsum n’hanh kônh wa rnoi Khmer lah êng ta n’gor nar lơn ma dơi rgâl kloh.  

Dôl mât chăm 2 mblâm ndrôk lai sind deh kon mhe dơi ngih dak ntop kơl đah aƀaơ rlău 1 khay tâm trong nchrăp joi geh âk trong rêh, hun hao trong ntĭt leo n’hŭch ach o mpeh bôk nău kan gưl neh dak n’hŭch ach o jŏ jong, lvang năm 2021 – 2025, wa Trần Ngọc Phương ta xã Thuận Hòa, nkuâl Châu Thành mô mpôn dơi nău rhơn, yor đah nău nsrôih dja, rnăk păng mbra geh tay ndơ gay đăp mpăn nău rêh. Aƀaơ, wa Phương hŏ tăm tay pih ƀư ndơ sa an ndrôk, nkre manh 3 công neh ƀư mir gay tăm tay tơm táo hồng đah mpŏng rnăk geh tay wăng sa đăp mpăn, ơm nsan hao klaih rlău  ach o. wa Trần Ngọc Phương, nkoch: 

Dơi ngih dak ntop kơl he mbra nsrôih, mhâm ƀư an nsĭt geh wăng sa dŭt âk. Gâp hŏ tăm pih hôm, ndrung n’gor hŏ mon lôch hôm, đah kỹ thuật mât rong ri  dôl hăn nti đŏng.

Bôk nău kan n’hŭch ach o jŏ jong. Bôk nău kan gưl neh dak rdâk njêng ƀon  lan mhe, bôk nău kan gưl neh dak hun hao wăng sa- rêh jêng kon nuĭh nkual ƀon lan rnoi mpôl đê̆, ndrel âk bôk nău kan, trong nchrăp, trong kơl an rnoi nuĭh êng ƀa ƀă dơi ăp gưl, ăp n’gâng kan tâm n’gor Sóc Trăng rđău đă tĭng ƀư geh âk nău dơi khlay. Bah nê, rgop kơl an rnăk ach o, rnăk dăch kêng ach o lah nsum n’hanh rnăk ach o, rnăk dăch kêng ach o ƀon lan rnoi mpôl đê̆ lah êng tĭng kơn rgâl geh nău rêh, hun hao wăng sa, nsan hao klaih rlău ach o.

Mpeh nkuâl Trần Đề aƀaơ, mpôl hên năl dơi nău rgâl têh ta nkual ƀon lan rnoi mpôl đê̆. Nê lah ntung trong hăn tâm thôn ƀon nar lơn ma jêng têh hvi, nâp uĕh lơn. Êng tâm lvang năm năm 2019 – 2024, nkuâl hŏ rdâk njêng mhe 519 ntŭk, lôch jêh n’hanh n’glăp dŏng 451 ntŭk. Âk ndơ dŏng nsum lam rêh jêng kon nuĭh lôch jêh n’glăp dŏng hŏ nsĭt tay nău dơi geh ngăn ngăn, rgop ntrŭt ntrôl hun hao wăng sa- rêh jêng kon nuĭh hun hao, rgâl muh măt ƀon lan. Wa Thạch Soi, nuĭh ƀon lan ta ấp Hội Trung, thị trấn Lịch Hội Thượng, rhơn nđơr nkoch:

Ngih dak dŭt uănh khlay tât nău rêh ƀon lan lơn lah ƀon lan rnoi mpôl đê̆. Na nê̆, ntơm  nơh trong dja dơn hvi 2 mét dơm, aƀaơ hŏ pơk hvi luh 3 mét, ƀon lan dŭt tâm ban ŭch tĭng, rong neh an ngih dak ƀư trong, ntơm bah nê ma nău rsong hăn bah nuĭh ƀon lan dŭt dơh soih, oh kon hăn nti dơh đŏng.

Bah tơm prăk tâm pă rlău 103 rmen prăk bah bôk nău kan gưl neh dak hun hao wăng sa- rêh jêng kon nuĭh nkual ƀon lan rnoi mpôl đê̆ n’hanh bôk nău kan gưl neh n’hŭch ach o jŏ jong, lvang năm 2021 – 2025; nkuâl Trần Đề hŏ ntop kơl jay gŭ an 344 rnăk, ntop kơl neh gŭ an 37 rnăk, rgâl nău kan an rlău 360 rnăk, ntop kơl  dak dŏng an rlău 190 rnăk; ntuh kơl rdâk njêng 28 ntung, trong thôn ƀon, ấp, xã dŭt jêr jŏt. Rlău ma nê, rdâk njêng n’hanh nkra têh uĕh tay ntŭk tăch ndơ nkual ƀon lan rnoi mpôl đê̆, ntop kơl hun hao tuch tăm, âk trong joi geh nău rêh tâm ƀon lan, ntĭm nti nău kan… Wa Trịnh Văn Bé, Groi kruanh UBND nkuâl Trần Đề an gĭt, nkuâl way ntrŏng pah kan nkual ƀon lan rnoi mpôl đê̆ n’hanh trong kơl  an nkual ƀon lan rnoi mpôl đê̆ lah nău dơn kan khlay, yor kơt nê̆, tâm let năp tay, nkuâl mbra rgum tĭng ƀư âk trong nkra gay an tĭng ƀư geh nău dŭt tam.

Rgum ntuh kơl lor an ăp xã, ấp dŭt jêr jŏt mha êng kơt: nkra bah nău mô geh jay gŭ, neh gŭ, neh tuch tăm, dak dŏng; ntop kơl hun hao tuch tăm âk ntil trong rêh tâm ƀon lan; ntuh kơl ndơ dŏng khlay, rhŏ dŏng an nău kan tuch tăm  mât rong, nău rêh tâm nkual ƀon lan rnoi mpôl đê̆. Rdâk tay lam trong kan chính trị tâm dâng, uănh khlay kơi  năp nti, n’hao nău dơi kan cán bộ, lơn lah cán bộ nuĭh rnoi mpôl đê̆. An hun hao lor tơm nuĭh kan, n’hao nău gĭt blău nuĭh ƀon lan nkre đah ntĭm nti, ntĭm nti nău kan, nta joi nău kan an ƀon lan rnoi mpôl đê̆.

Tĭng Bí thư Tỉnh uỷ Sóc Trăng Lâm Văn Mẫn, Sóc Trăng hŏ rlău lvang năm 2019 - 2024 âk jêr jŏt đah âk rgoh n’gơ têh. Tâm rnôk nê, ta nâm nău rđău kan bah ăp gưl uỷ đảng, n’gâng kan n’hanh ƀon lan  tâm n’gor, lơn  lah nkual ƀon lan rnoi mpôl đê̆ hŏ ntik n’hao nău way ơm tâm rnglăp, nuih n’hâm rŏng dak, mbrôn suan tâm rlong, nsrôih ndôr, rlău jêr jŏt, ntul rlong, nsĭt geh âk nău dơi têh kuâng. Tâm lvang năm 2019 - 2024, wăng sa bah n’gor geh njuat hun hao tay. Êng 6 khay bôk năm 2024, nchroh geh rlău 6,5%, âk rlău rđĭl đah rĭng geh nsum lam dak (6,42%), dâk tâl 6 nkual đồng bằng sông Cửu Long. GRDP rĭng geh tĭng bôk nuĭh tât kêng dŭt năm 2023 geh rlău 60 rkeh prăk/nuĭh/năm.

Wa Lâm Văn Mẫn lah rjăp đŏng, bah tơm ndơ bah 3 bôk nău kan gưl neh dak dơi ndop nsum, an tĭng ƀư geh nău tam gay ntuh kơl, n’hao nkra, ƀư mhe tâm păch pêng ndơ dŏng wăng sa- rêh jêng kon nuĭh nkual ƀon lan rnoi nuĭh đê̆, nơm geh kơt nê̆, tât aƀaơ, lĕ rngôch ăp xã geh trong ndeh ô tô tât nklang xã; rlău 99% rnăk nkual ƀon lan rnoi nuĭh đê̆ dơi dŏng trong rse điện neh dak; rnoh âk rnăk dŏng dak kloh rsang geh rlău 99,6%. Lơn lah, pah kan n’hŭch ach o ta nkual ƀon lan rnoi nuĭh đê̆ geh nău rgâl uĕh; lam n’gor hŏ ntop kơl rgâl nău kan an 4.600 rnăk đah 67 trong ntĭt leo hun hao tuch tăm mât rong, rgop âk ntil trong joi geh nău rêh ƀon lan n’hanh n’hŭch ach o jŏ jong. Kơp tât kêng dŭt năm 2023, ta n’gor hôm rlău 4.000 rnăk ach o lah nuĭh nkual ƀon lan rnoi nuĭh đê̆, hŭch rlău 6.500 rnăk rđĭl đah năm 2021.

Rnoh âk rnăk ach o rĭng hŭch geh 2%/năm; tâm nê, hŭch rnoh rnăk Khmer ach o 3%/năm. Ăp trong kơl đăp mpăn lam rêh jêng kon nuĭh dơi tĭng ƀư năn ngăch, di nuĭh. Tâm lvang năm 2019 - 2024, n’gor hŏ ntop kơl rdâk njêng 14.826 mblâm jay an rnăk ach o; tâm nê, geh 6.184 mblâm jay an rnăk ach o nuĭh rnoi mpôl đê̆...

Ăp nău dơi geh lah nău nsrôih chính trị n’hanh nău rđău đă lĕ n’hâm suan bah gưl ủy Đảng, n’gâng kan ăp gưl tâm n’gor Sóc Trăng, bah meng nê lah nău nsrôih, rlău jêr jŏt nsan hao bah ƀon  lan ăp rnoi mpôl đê̆ ta n’gor, bah nê, hŏ tĭng kơn ƀư “lhut săk rgâl ntô” nkual ƀon lan rnoi nuĭh đê̆./.