Ƀư tĭng Bôk nău kan rƀŏng tĭng lam dak hun hao wăng sa-rêh jêng nkual rnoi mpôl đêt n’hanh nkual yôk, ăp năm bah năp, xă Ba Vinh, n’gor Quảng Ngãi lĕ kơl lor prăk ntuh kơl ndâk ƀư ntung trong, ngih wâl thôn ƀon, ngih văn hóa, ndơ rhŏ an gŭ âm nsum mpôl n’hanh mât chăm săk soan nuĭh ƀon lan. Ndrel đah prăk ntuh kơl bah Ngih dak, ăp bôk nău kan an manh prăk kơl an lah nuih n’hâm, ntŭk nsing kơl âk rnăk janh hun hao nkra njêng. Ntoh lư kơt rnăk wa Phạm Văn Rôm. Bah tơm prăk manh kơl an, wa Phạm Văn Rôm janh ntuh kơl tăm 4 ha keo, mât rong sŭr, djăr, knơm nĕ wăng sa rnăk wâl ntơm đăp mpăn: “Dơi nău ntop kơl bah Ngih dak, Ngân hàng Chính sách nta nơih an nuĭh ƀon lan manh prăk ƀư sa ri lah nsum nuĭh ƀon lan dơi geh hun hao wăng sa rnăk wâl, ntơm jŭt jăng nău ach o”.

Lvang 2026-2035, xă Ba Vinh mĭn nău mât na nao n’hâm soan, mât ndrăy n’hanh hun hao ăp nău kan way ơm lah trong hăn khlay gay nta joi nău rêh jŏ jong an nuĭh ƀon lan. Wa Trần Thị Thanh Thúy, Groi Kruanh UBND xă Ba Vinh an gĭt: “Bôk nău kan rƀŏng tĭng lam dak geh tât prăk nău kan, ri lor lah ƀon lan rgum tâm rgop gay ntop kơl n’hanh mât na nao ăp ntrong ƀư bah năp đaơ kônh wa lĕ ƀư. Ntĭt nsa kơt jrô nti cheh tanh, aơ lah ăp nău ƀư lĕ dơi ntop kơl mbra dơi pơk hvi tay n’hanh ƀư jêng trong geh ndơ an kônh wa. Yơn prăk aơ dơi jao prăk mô âk jêng ƀon lan ŭch mbra tâm rgop lĕ rngôch ăp bôk nău kan rƀŏng tĭng gay ntuh kơl ndơ an kônh wa nơm dâ".

5 năm bah năp, bah tơm prăk ăp bôk nău kan rƀŏng tĭng lam dak, n’gor Quảng Ngãi lĕ mbơh ƀư 26 nău nchrăp ƀư ntop kơl hun hao nkra njêng tĭng trong khlay ndơ n’hanh 399 nău nchrăp ƀư hun hao nsum mpôl, kơl nuĭh nuĭh ƀon lan ntơm nchrăp lor nkra njêng, n’hŭk knơm tâm ntop kơl. Êng tâm năm 2026, Quảng Ngãi mbơh tâm pă rlău 1.000 rmen prăk bah tơm prăk Bôk nău kan rƀŏng tĭng lam dak hun hao wăng sa-rêh jêng nkual rnoi mpôl đêt n’hanh nkual yôk năm 2025 ndơ̆ rgâl. Ăp ntŭk dôl săch ăp ntrong ƀư tâm di gay mât nău dơh tĭng nkual. Nĕ lah hun hao nkual tăm rpŭng kai hăn ndrel đah nkret njêng ta xă Ba Vì, pơk hvi ăp ntrong tăm cau, mât rong ta Ba Xa n’hanh hun hao nkual tăm dak si ta Măng Ri.

Wa Xiêng Thanh Phúc, Giám đốc N’gâng kan Dân tộc n’hanh Tôn giáo n’gor Quảng Ngãi, an gĭt: “Bôk nău kan rƀŏng tĭng lam dak lvang 2026-2030, nău mbơh ƀư tĭng ăp bôk nău kan rƀŏng tĭng lam dak hun hao nkual ƀon lan rnoi mpôl đêt mbra ƀư êp lơn nu nău ngăn. Mbra mbơh ƀư ăp ntrong kan ntoh lư nuĭh rnoi mpôl đêt ta lam n’gor săk rnglăy lơn, êp lơn, geh săk rnglăy lơn n’hanh geh ndơ na nê̆, hăn ndrel đah nău kơl nuĭh ƀon lan rklaih ach o n’hanh rklaih ach o nâp nâl”.

Đah nău uănh kơl bah Đảng, Ngih dak ndrel nău nsrôih hao bah nuĭh ƀon lan, ăp bôk nău kan rƀŏng tĭng lam dak mbra mât ueh tay săk nglăy, nta an n’hâm soan dăng an hun hao wăng sa-rêh jêng nkual rnoi mpôl đêt n’hanh nkual yôk ta lam n’gor Quảng Ngãi tâm lvang mhe.