Ăp play sầu riêng dôl dơi koh jŭr bah nkual mir hvi 3,6 ha bah wa Hồ Thị Huệ, ta thôn 19/5, xă Krông Pắc, n’gor Dak Lak. Yan aơ, rnăk wâl wa lêh rlău 90 tấn sầu riêng. Lĕ rngôch rnoh ndơ dơi doanh nghiệp ký ton rwăt đah rnoh khlay rĭng lĕ rngôch 68.000 prăk/kg. Wa Huệ an gĭt, rnoh khlay aơ dơi nglăp nsum ta ntŭk tâm rlong khlay ƀư ta nkual tăm dâl. “Mpôl hên mpŏng ăp rơh tâm rlong khlay aơ mbra hun hao gay ndơ̆ ndơ bah kônh wa dơi tăch du trong kloh rah wah n’hanh na nê̆ lơn”.

Ndrel đah mir wa Huệ, 9 rnăk êng ta xă Krông Pắc, n’gor Dak Lak geh dĭng lĕ rnoh neh rlău 14 ha, dơi săch râng rơh tâm rlong khlay. Aơ lah ăp mir sầu riêng Dona geh samƀŭt rhăch nău, keh mrô nkual tăm n’hanh nău mbơh mpeh trong nkra njêng, phân poh dak si bôk lăp, joi tu tơm, đăp mpăn ndơ n’hanh dơi rhŏ an tăch n’gluh.

Ta năp an rnoh khlay, doanh nghiệp dơi boăt nthoi gay na nê̆ tât mir hăn uănh. Bah rnoh khlay bôk năp 55.000 prăk/kg, jêh 2 rơh nklăch phiếu, rnoh khlay dơi geh nglăp nsum ta 68.000 prăk/kg. Dĭng lĕ rnoh khlay tâm ton bơi 24 rmen prăk, âk lơn rnoh khlay bôk năp nklăp 4,5 rmen prăk. Wa Đinh Thị Hoa, Giám đốc Công ty TNHH Xuất nhập khẩu Nông nghiệp Nguyên Thuận an gĭt. “Công ty mpôl hên lĕ hăn uănh tĭng mir n’hanh saơ geh 10 mir bah 10 rnăk ƀon lan lĕ geh ueh kah n’hanh geh rnoh ndơ tĭng công ty đă. Đah n’gâng kan ta ntŭk lĕ ntop kơl công ty gay dơi râng, nta nơih an doanh nghiệp n’hanh nuĭh ƀon lan dơi boăt nthoi nsum”.

Nău dơi uănh ngăn bah rơh tâm rlong khlay mô knŭng ta rnoh 68.000 prăk/kg, ma ta nău mbơh mpeh nkual tăm dơi ndơ̆ tâm tăch rgâl. Doanh nghiệp dơi gĭt tât lor đah samƀŭt mât prăp mpeh rnoh ndơ, trong nkra njêng, ueh kah n’hanh dơi tâm di ntŭk tăch; nuĭh tăm geh tay nkô̆ nău an gĭt rnoh khlay ndơ. Aơ lah trong gĭt tât tâm di đah nău mĭn wăng sa lŏ mir: Rgâl bah tăch ndơ an tăch ueh kah, samƀŭt mât prăp n’hanh dơi joi tu tơm. Wa Lại Đức Đại, Kruanh UBND xă Krông Pắc, an lah aơ du trong rlong ƀư tâm rnôk ndâk njêng trong nău kan ndoh ndơ, n’hao boăt nthoi na nê̆ đah nuĭh nkra njêng n’hanh ntŭk tăch: “Nuĭh ƀon lan mbra dơi tăch mô knŭng lah ndơ ma dơi tăch rnoh khlay đah ăp ndơ geh ma khân pơng tâm di nău geh dơn. Mpôl hên mpŏng boăt nthoi đah ntŭk tăch n’hanh nuĭh nkra njêng du trong na nê̆, ngăch ngăn, săk rnglăy ngăn, geh nău tâm di an ăp ding tăch kơt đah rwăt”.

Bah n’hêl na nê̆ aơ, tâm rlong khlay dơi jêng du ndơ ntrŭt ngăch tăch rgâl, ngăn lah đah ăp mir ueh kah âk, ndơ rĭng tâm ban, samƀŭt rhăch nău kloh n’hanh tŏng ăp ueh nău đă tăch n’gluh. Khlay lơn, pơng geh nău uănh, mpla nsơ ueh kah n’hanh kơl ntŭk tăch năl săk ăp nkual tăm ueh. Wa Đặng Thị Thủy, Groi Giám đốc N’gâng kan Tuch tăm mât rong n’hanh Ntŭk ntô gŭ âm n’gor Dak Lak uănh lah trong ƀư aơ geh tay n’hâm soan gay nuĭh tăm uănh tât lơn ueh n’hanh boăt nthoi trong. “Trong ƀư mĭn mhe n’hanh ngăn ngên gay nuĭh ƀon lan rhơn nđơr n’hanh dơi geh ăp nău rgâm mhe tâm nău mĭn, bah rdâk ƀư nkra njêng lŏ mir way ơm ri mbra rgâl an nău mĭn mpeh trong ƀư wăng sa lŏ mir, geh rnoh khlay ueh kah ndơ an lor bôk năp”.

Du rơh tâm rlong khlay mô hŏ rgâl trong ƀư tăch bah lĕ nău kan ndoh ndơ. Yơn lah lôch jêh tay, nău uănh năl ueh kah, rnoh ndơ geh n’hanh trong nkra njêng dơi jêng n’gâng tơm an du trong ntrŭt ngăch tăch rgâl săk rnglăy, ngăn lah đah ăp nkual tăm, mbŭch ndơ ueh kah âk, tŏng ăp ueh nău đă ntŭk tăch.