Sơn La: Cxiv tsa qơư truôx tuk por hưv têx nhuôs zâu tox siêz

Muk txos trâu têx jêx jok tox siêz Vân Hồ thiêz ntâu thax tsav qơư txơưr đuô nhoz tỉnh Sơn La, thâuv têx luz six hơưv so, yênhx paz mê nhuôs shir phaz lus siz zâuv uô si đhiê hluô, lok sik pok muôs tsir gâuv ntơưv yar tiêx thiêz têx cêr muk lol hâur jêx jok; iz cxiê lênhx nhuôs tuz mak sâuv têx yêz shôngz, yêz ntông chiv chir đhok uô siz thơưz cheix muk lol uô si, muôx kênh thâuv trâus pôngz yêz, ntos yêz lok cux luôs shir phaz lus…

Muôx 2 tus nhuôv zâu, iz tus 8 shông thiêz iz tus 2 shông, tix lâus Triệu Văn Trung, heir nênhs Cho, nhoz jok Hợp Thành, xã Vân Hồ heik pâuz, khênhr heik kriê tsi cxoz muk đrav têx pak đêx, cưx đês cưx ha uô si thâuv tsi muôx chor lâul đros muk. Lar heik zos thâuv tix lâus oz niêv txir muk liêx, têz lok sik muk kror tưs muôx hâux lưv mak puôr lênhx tso mê nhuôv trâu pos zơưs seiz, taz por mê nhuôs thâuv tưs cux nhoz jê đros têx lâul nênhs chiê truôx tuk:

“Iz ndis jok muôx iz tus đêx ntưk đhâu, đêx lok six lox. Cur thâuv tưs tưz heik têx mê nhuôv tiêk, tsi tâu muk tov tus đêx ntơư thiêz tsi đros chor hloz muk đa đêx, viv hâur jok cux muôx chor niêv lâuk hloz mê njik tâu niêv txir tso muk đêx. Cur mê nhuôv tsênhv zâu viv li cur tsuv seiz shuôs thiêz heik njôngr; ntâu jiês cux tsuv sir jos heik tiês thiêz uô đrux chiê mê nhuôv tsi muk uô si trâu tov đêx viv lok six riêz nênhs”.

Ntơưv jok Hợp Thành nhiv no muôx 200 ntâu lênhx nhuôs zâu nhoz hnuz nhôngs cơưv txix cxênhx nhuôs zâu txos cxênhx 2. Thâuv tưs txos cheix so sor, chor nhuôs so ntơưr jov jơưk, cấp ủy, chor hloz hâur jok tưz choz ciês trâu têx đoanx thêv li hluôk nênhs, pox niêv sêiz car, seiz kaz thiêz tsưr tsix têx txux chi cêr xênhz huôx uô si lov jêv trâu chor nhuôs hâur cheix so sor. Pos Phạm Thị Thơ, Phưv Bí thư Chi bộ jok Hợp Thành puz pâuz, yênhx ntu hâur shông, hâur jiês cơưv chi bộ, cơưv jêx jok, cấp ủy, hâu nov ntơưv qơư puôr lênhx heik têx đảng viên thiêz shux xênhz niêv txir moz siêz txos tsoz phưz, por hưv zuk têx nhuôs tsi chiê njiz trâus tsi jông, riêz nênhs. Iz chas ntơư, muôz jông six hơưv fuô uô têx cêr xênhz huôx lov jêv, truôx tuk chiê mê nhuôv tâu cơưv ntâuz ntơưr, uô si lov jêv, shir phaz lus.

“Cấp ủy, ban sêiz car jok tsik so yax kriê txos trâu tsôngv pêx xênhv, sơưr đơưk cux lok six jông siêz thiêz đros sêiz car zuk têx tuz nhuôs lok six jông, tsik chiê muôx yưv têx riêz nênhs, phiv liv tưs hlo, iz zav li: Trâus pôngz đêx lok sik  ntos yêz, uô yêz siz yar siz tsông tâus cêr....”

Jok Mường Men muôx tus đêx Tân ntưk đhâu ntêr 3 cêik ntâu. Hâur jok nhiv no muôx 236 ziv chuôz zis, zuôr xar 950 lênhx nênhs, phênhv ntâu zos nênhs Poz Ziz thiêz Cho uô nênhx nhoz. Txix hâur shôngk shông txos nhiv no, sâuv thax tsav tsi tâu pov muôx iz txuz tưs nhuôs zâu trâus moz trâus saz hlo, lar heik zos trâus pôngz đêx, txơưv hâur thax tsav muôx ntâu pak đêx, pak njêl, đêx lox ntưk đhâu. Chiê uô tâu truôx jông têx li heik no, zơưv Hà Văn Hiền, Bí thư chi bộ, Tsar jok puz pâuz, cấp ủy, chor nênhs uô hâux lưv seiz car jêx jok tsi so yax mông gra siêz tsôngv niêv txir  cưr tix nênhx tsa txux chi, tsưr ziv jênhv pâuz lok moz siêz, por hưv têx nhuôs zâu, hâur co tsuv chênhr phax tir thêir tsi chiê muôx yưv trâus pôngz đêx hâur cheix ntux sor:

“Pêz jok tsik so yax kriê lok sâuv zuôv nhuôs zâu uô đaz uô tuôs thiêz trâus pôngz đêx, txơưv tsik tâu muôx iz txuz tư hlos, taz sik cux tsuv tsi so yax kriê chiê tsôngv niêv txir lax pêx xênhv pâuz tâu, muk yax kriê trâu têx tuz nhuôs chênhr phax, tsưx phưv truôx tuk”.

Xã Vân Hồ nhiv no muôx zuôr xar 8 cxênhz lênhx nhuôs zâu, hâur co muôx 107 lênhx nhuôs zâu tsênhv tâu sơưv têz qơưk paz nhiêx txiêx yênhx hli thiêz zuôr xar 1.200 lênhx nhuôs zâu muôx vax tsêr zos chuôz zis pluôs, chuôz zis zuôr xar pluôs zôngx ziv njiz trâus têx phiv liv. No zos têx lênhx nhuôs tsuv tâu moz siêz txos, sêiz shuôk thiêz paz tsik so. Zơưv Nguyễn Huy Anh, Bí thư Đảng ủy xã Vân Hồ puz pâuz, hâur ntu đhâu, cấp ủy xã chox car, chox kriê têx nganhx, đoanx thêv fuô uô ntâu hâux lưv tsênhv tsênhz kriê nzir tsưr ziv por hưv, phax tar ntâuk tsiv, uô hiêv thiêz trâus moz trâus saz trâu nhuôs zâu, niêv txir; xã nhiv no cux muôx 36 lênhx lês uô hâux lưv paz nhuôs zâu ntơưv qơư.

“Xar tsi so yax xa mông, fuô kriê trâu pêx xênhv pâuz thiêz pâuz tâu lok têx nhuôs zâu vax huôv, lar heik zos pêx xênhv nhoz thax tsav tox siêz đêz đrôngs, thax tsav txov nhêv chiê phax txar têx tsik jông, riêz nênhs. Nhiv no chor pox niêv puôr lênhx muôx têx paz txiv ngaz ntơưv qơư, iz  paz muôx 3 lênhx nênhs. Thâuv muôx  têx hâux lưv tưs cik txos nhuôs zâu yưv siv mak zuôr heik zênhx max trâu sơưr đơưk pâuz, taz por truôx tuk cux xưk li por hưv tâu nhuôs zâu truôx jông”.

Phax tar pôngz đêx trâu nhuôs zâu tsi tiêk zos yênhx ziv chuôz zis li hâux lưv, mak tsênhv zos tas nro xã hội li. Tsuôk thâuv muôx tas nro cxuô cấp, cxuô nganhx sik thôngx siêz, côngv têk muôz tâu têx qơư uô si jông, truôx tuk, đros trâu chuôz zis cêr moz siêz seiz shuôs njôngr thiêz hluz txos, pêz thiêx por hưv tâu truôx jông têx nhuôs. Co tsi tiêk zos tsưr ziv pêz por hưv têx nhuôs zâu, mak tsênhv zos luk chos tsês, sik paz sik đros tsưx phưv truôx tuk trâu têx tuz nhuôs./.

                                                                                                        Thu Thùy-Riê Lâux cxeik, nhênhv