Grê buô khênhx txu grês ntâu, nênhs tu zus njiz ntâu phêv liv

Hâur 2 luz hlik đhâu, grê buô khênhx tưz txu grês ntâu, txix 65 cxênhz đeiv iz cir grês yuôr 50 cxênhz iz cir, uô chuôz zis zơưv Nguyễn Văn Trúc, nhoz tuêv 7, xã Thanh Chăn, huyện Điện Biên siêz tsik khênhr. Chuôz zis chor buô muôx 30 tul tâu seiz zos phênhv sâu tsênhv, taz sik nhiv no tsi car muôs viv grê txo grês kis, iz hnuz buô nox tas muôx nhos 3 sênhr krâur, grê zuôr krâur tu zus tsênhv chuôz ndê siêz, viv li chuôz zis cux njiz ntâu phêv liv: “Niêv ciêz nhiv no tror tu zus cux sâu tsi tâu liv, grês yuôr 50 cxênhz đeiv iz cir mak tưz trâus pôngz pênhr lơưv. Txix 62 cxênhz đeiv iz cir grês jux jus, nhiv no 50 cxênhz đeiv mak tsôngv box njiz lok six ntâu phêv liv. Môngr jông tsi muôx hâux lưv txơưr pir li paz buô muôx 1 tul trâus tuôs mak ziv trâus pôngz pênhr ntâu đuô”.

          Chuôz zis zơưv Hoàng Văn Vương nhoz xã Thanh Nưa, huyện Điện Biên cux tsênhv xar njôngr grê zuôr krâur tu zus txu grês, viv chor buô muôx 40 tul tsênhv sir jos tu zus chiê thâuv tưs buô tsar ndê grê li muôs: “Nhiv no tsuôk pâuz sir jos tror tu zus thiêz tos xưz, tsôngv box nôngx mênhx mak cux tsi pâuz zuôr uô li chas thiêz. Txos nhiv no tsi pâuz grê zuôr grês txos bâuv li chas, taz sik niêv ciêz muôs greix buô mak lơưr kênhz tuôx zuôr buô hênhr. Tiv zix zos grê krâur li nhiv no, chuôz zis tu zus hênhr mak cux yuôr, tsi li mak zuôr trâus pôngz pênhr. Xav chungz fênhx 100 cir buô pôngz lơưv muôx nhos 10 sênhr krâur, muôx nhos 350 cxênhz đeiv iz sênhr, buô uô nôngz mak 1 tsov đeiv thiêz, đêx cxuô zav, yuôx phax moz mak grê muôs 50 cxênhz đeiv iz cir zuôr sâu tsi tâu tul tsi”.

          Tsi xưk li tsôngv box tu zus li siêz cxơưx, têx lênhx tuz luôv muôv muôs greix buô ntơưv têx ciêz nhoz sâuv thax tsav ho tso siêz đuô, viv grê greix buô cux tsênhv nhoz phênhv siêz. Muôx têx zos buô greix kaz mak muôs đros grê 150 cxênhz đeiv iz cir. Ntơưv têx ciêz feik tuô buô, têx tuz luôv zuôr greix buô đros grê zos 90 cxênhz đeiv iz cir. “Tsi txu grês tul tsi hlo, txix hâur shông txos nhiv no grê six fênhx li ntơưv, 90 cxênhz đeiv iz cir buô xeir, muk ntês buô khênhx cux siêz tsi zos xaz zênhz đuô. Muôs tơưv trâu niêv ciêz mak buô xeir cux zos 150 cxênhz đeiv iz cir, heik cxuô tsi pov txu grês tul tsi”.

          Zơưv Vũ Duy Dũng, cán bộ phongx muôv muôs, Công ty zav nox tu zus Vina Hà Nam tsênhv phưv txơưx tỉnh Điện Biên puz pâuz: Grê zav nox tu zus chuôz ndê txix kaz shôngk shông 2022, tax siêz tiv zix zos kaz hli 12. Txix co txos nhiv no, grê six fênhx siêz thiêz tsi pov txu grês. Ntu no, têx qơư tu zus puôr lênhx njiz phêv liv. Têx công ty muôv muôs buô krâur tsi muôx tsưr ziv hlôngr yiêz grê, taz sik cux tsênhv tso tơưv têx tsưr ziv paz max nênhs tu zus: “Ntu no, phênhv ntâu têx qơư tu zus puôr lênhx njiz phêv liv thiêz trâus pôngz pênhr. Têx công ty cux tsi pov txu grês grê viv nhiêx yưv zuôr nguyên liệu tsênhv siêz. Taz sik chiê paz nênhs tu zus mak têx công ty cux puôr lênhx muôx têx chính sách paz txưv pir li khơưk muôz sênhr lok sik txu grês grê muôs iz cxiê xiv huv tu zus txơưr muôx lênhx coaz txos buô. Li ntơưv no mak cux paz tsôngv box zos zuôr 30 sênhr krâur mak zuôr khơưk muôz cxaz 1 sênhr”./.

Vũ Lợi-Txâur Vax cxeik nhênhv