Zơưv Zax Xênhv Muôk nhoz ntus đriv Nậm Pồ uô bluô nux txix hlôngr yiêz tsưr ziv xar, uô nox

Thâuv ntêx no, zơưv Zax Xênhv Muôk ziv chuôz zis cux li ntâu ziv chuôz zis hâur jok tsuôk pâuz khưr kôngz lôngk xưk li cxôngx nzor zos chos blêx, poz cưk thiêz kok ntông… pox nhuôs nhoz no luz nênhx njiz lok six ntâu cêr txov. Khov hlôngr yiêz đuô tsưr ziv xar, uô nox, ntâu ziv chuôz zis nhoz ntơưv no tưz hlôngr yiêz đuô tsưr ziv uô nox tổng hợp, sir jos uô bluô nux.

Đros xar huôv tsar kinh têr chiê tơưv đhâu yêiz pluôs, zơưv Zax Xênhv Muôk (55 shông), mênhx cxưx Hmôngz, nhoz jok Nậm Chim 1, xar Si Pa Phìn, huyện Nậm Pồ (tỉnh Điện Biên) tsik so xar tsuv piz txix kror tưs, tu zus đaz tsi, chos tsoz chos tưs thiêx paz trâu zuk hlôngr yiêz đuô luz nênhx… Shông 2017, tâu Hôiv Nôngx mênhx xar yax kriê lok têx tsênhv chêi paz thiêz cxơưz cxiz huôv tsar uô kinh têr, zơưv Zax oz niêv txir tưz kir txêik 100 triệu đêiv txix Zênhx hangx tsênhv chêi xar hôiv huyện Nậm Pồ chiê khơưz pak njêl zus njêl. Muôx chor pênhr nhiêx kir txêik tâu, đros chor nhiêx cxênhx tsês tâu, pov chuôz zis li 7.000 thiêr ndis ar têz muôx đêx ntâu, zoưv tưz khơưz pak njêl chiê zus muôx 4.000 tuk njêl rô phi đơn tính, 2.000 tuk njêl nox jâuz.

Zơưv Zax Xênhv Muôk phêiz kênh thâuv nhiv kruôr piz khơưz pak đêx zus njêl, tiv tsik tâu muôx chênhz zênhv, njiz qiv hơưv phiv liv, chor njêl ho trâus muôx moz, uô ruôr hiêv tsik tsơưs trâu ziv chuôz zis. Chiê đơưk kho têx phiv liv, phax moz trâu chor njêl, zơưv tưz sir jos nriêr pâuz, cơưv shâuv đhâu têx ntâuz ntơưr, pov tsir. Muôx nzir txux chi, muôx chênhz zênhv, zơưv tsik so uô vêv xênhz têx pak njêl cov hur si, hlôngr đuô đêx thâuv hlôngr chêix… Khov sir zôngv khoa học, kỹ thuật huv zos hâur tu zus, zơưv chuôz zis chor njêl tsik so muôx jos, tsơưs trâus muôx moz, tax tâu tsơưr lươngv siêz. Chiê txo grêk tsơưs nhiêx txiêx zuôr zav nox công nghiệp, zơưv chos nzir 1,5 héc ta kok ntông, tâu nxư chiê uô zav nox trâu chor njêl. Khov co, zơưv chuôz zis chor njêl tâu muôx txix 2,5-3 tấn, paz sâu tâu txix 50-70 triệu đêiv iz shông.

Shông 2018, zơưv tror yưv pênhr uô qơư tu zus 15 tuk tưv, yênhx puô tuk kêiz ol, đros chos ntâu zav tsoz chos muôx tsiv gri kinh têr siêz li txir suôz câur, mắc ca thiêz ntông nox txir sâuv têx ar têz tsênhv yuôr. Chiê muôx nzir txux chi, zơưv cxaz chuôz ntâu lớp kriê tsưr ziv uô nox, cơưv shâuv chênhz zênhv uô nox txix chor tsưr ziv tưz uô tâu jông ntơưv têx thax tsav qơư txơưr thiêz sir jos nriêr pâuz nzir. Jux juk, zơưv Zax tưz pâuz sir zôngv kỹ thuật, uô jông lơưr têx tsưr ziv phax, tar caz moz trâu chor tsiêx cxu li moz đôngs nyar, tơưv ndâux hle trâu… đros trâu cxax yuôx phax moz huv six hơưv, uô vêv xênhz têx tsêr guôx cov hur si paz trâu zơưv chor tsiêx cxu hloz lox thiêz huôv tsar jông.

Tsưr ziv huôv tsar uô nox txix tu zus tsiêx cxu lox zâu, khơưz pak đêx zus shuôz njêk, chos cxuô zav tsoz chos ntông nox txir đar muôx 8.000 thiêr ndis zos zus njêl, tsiêx cxu, kêiz ol, tsoz chos công nghiệp, ntông nox txir tưz paz muôx tâu kinh têr siêz, paz trâu zơưv Zax ziv chuôz zis muôx tâu phênhv sâu truôx tuk txix 100-130 triệu đêiv iz shông. Khov co, zơưv chuôz zis tưz txoz cxơưx tâu trâu 6 lênhx tuz nhuôs hloz lox, yênhx nênhs, muôx tâu luz nênhx jông. Shông 2020, zơưv chuôz zis tưz zuôr tâu yêz ô tô…

Chủ tịch Ủy ban xar Si Pa Phìn Hòa Xênhv Muôk puz pâuz, zơưv Zax Xênhv Muôk ziv chuôz zis tưz tsik zos txơưx uô kinh têr xưz mak tsênhv tsik so uô ntêx hlo lok uô trơưk Đảng, Têz qơưk têx cêr chêi thiêz thax tsav qơư têx cui tênhv. Tsik so cxaz chuôz uô jông chor tsưr tsix chinhr triv, xar hôi li têx huôx tôngv; paz trâu chor chuôz zis txov nhêv huôv tsar uô nox. Zơưv Zax Xênhv Muôk tsênhv tsênhz zos lênhx nênhs txơưx huôv tsar uô nox trâu tsôngv box mênhx cxưx nhoz ntơưv thax tsav tox siêz cơưv shâuv thiêz uô trơưk.

Phênhv “Nôngx mênhx zuôr tsuv pâuz” hnuz no tsuôk xâuk li no xưz. Phênhv no zos Đaix nta suôz Việt Nam nhoz thax tsav faz Bắc sik côngv đros tsênhv qơư cxơưz cxiz uô kôngz têz qơưk uô./.

Lik Thox uô thiêz cxêik nhênhv