Têx blêx tir tâuk ntux kruôr tưz paz muôx cêr chiê siêz trâu tsôngv pêx xênhv nhoz thax tsav kruôr gis

Huyện tox siêz Mù Cang Chải nhiv no muôx 1.830 ha liêx đêx. Tiv thax tsav qơư cux iz zav li ntux uô ruôr hiêv viv li niêx shông muôx txos 500 ha liêx tsi muôx đêx, lêix uô tsi tâu….. Co cux zos iz hâur têx qir tiv uô thax tsav nhoz tsaz yênhx 30a no huôv tsar tsi tâuk, pêx xênhv luz nênhx txov nhêv tas li. Xar cov uô tâu 2 chiv, muôx têx 3 chiv blêx zos tsôngv box Hmôngz nhoz co li tsưr ziv, siêz xar njôngr ntêr lok no.

Têx tsưr ziv nor nhiv no tưz muôx tsênhz tiês thâuv muôx têx nôngz blêx tir tâuk ntux kruôr gis ADI 73.

Tix lâus Hồng Xênhv Zax nhoz jok La Phu Khơ, xã Kim Nọi chox pêz muk seiz par liêx đêx Háng Tê 2 hâur jok thiêz tơư têk kriê pâuz li no: Par liêx ntơư muôx nhos 14 ha, taz sik 3 ha tưz muôx tsi txâuk đêx uô viv li tsêz chos tsi tâu têx blêx, lar heik zos chiv ntux tsâus yiêz, tsôngv box nhoz no li iz hâur têx chiv  kôngz chênhr. Txơưv li ntơư taz sik chiv kôngz shông no, chor liêx tsi muôx txâuk đêx uô co tưz tâu tsêz chos zav nôngz blêx ADI 73, zos chor nôngz blêx tir tâuk kruôr gis, jông uô trâu thax tsav tox siêz.

Đros thiêz muôz têx nôngz blêx tir tâuk kruôr li co lok tsêz chos ntơưv têx liêx têz muôx tsi txâuk đêx uô tưz paz tsôngv box jok La Phu Khơ uô tâu tas hur si têx liêx têz hâur niêx shông: “Chor nôngz blêx no tir tâuk kruôr gis lok six jông, uô hlêis cux tâu nju thiêz tâu ntâu lênhx pêx xênhv lơưr njênhs njôngr, nhiêv uô, lưv shông muôx têx sơưr đơưk zuôr tsêz chos ntâu đuô chor blêx no”.

Zơưv Sang xênhv muôk, Phưv Chủ tịch Uỷ ban xã Kim Nọi heik pâuz nzir, tas nro xã nhiv no muôx 196 ha ntâu blêx liêx, hâur co muôx 10 ha ntâu tsi muôx đêx uô, tsôngv pêx xênhv tsuv muôz hlôngr chos lưv zav tsoz chos txơưr đuô, viv li uô ruôr hiêv txos têx kôngz sâu tâu. Txix thâuv huyện heik kriê cov muôz chor nôngz blêx tir tâuk kruôr gis li: ADI 73 ntơư lok tsêz chos siv ntơưv têx liêx têz muôx tsi txâuk đêx, xã Kim Nọi tưz vênhv tôngv tsôngv niêv txir lax pêx xênhv uô tâu 3 ha. Đhâu thâuv muôz lok tsêz chos, chor blêx co hloz lox lok six jông; txơưv muôz uô ntơưv têx liêx têz nhiv kruôr krêz uô yiêz, muôx tsi txâuk đêx, tưz kruôr tâu 2 luz hlik ntơư lok cux hloz lox jông, njuôk xav tax tâu 6 tênhr blêx iz ha, chor cxur nox cux kaz hur si: “Muôx têx nôngz blêx tir tâuk kruôr gis li no uô mak paz tâu tsôngv box li: Têx liêx têz nhoz Kim Nọi muôx tsi txâuk đêx lok sơưr đơưk cux puôr lênhx uô tâu kôngz hur si. Nhiv no tsôngv box tsêz chos li nor lok six jông, lưv shông muôx têx sơưr đơưk zuôr đas cir uô ntâu đuô, zuôr paz tâu xã huôv tsar kinh tế”.

Tâu pâuz shông 2021, huyện Mù Cang Chải tưz sir jos muôz chor nôngz blêx tir tâuk kruôr gis ADI 73 lok uô siv. Đhâu 2 chiv tso pov, zav nôngz blêx no zôngx ziv uô, tir tâuk kruôr gis, txơưv muôx tsi txâuk đêx lok tsêz chos tâu cux hloz lox lok six jông. Iz chas ntơư, zav nôngz blêx no tsênhv jông iz kro thiêz, zos tsi yuô trâul caz hmoz tho nox uô ruôr hiêv.

Đros trâu têx uô tâu yênhx côngz co, hâur ntu zuôr txos, chor nôngz blêx no tror tâu chos ntâu nhoz têx thax tsav kruôr gis hâur Mù Cang Chải, paz taz por truôx tuk têx kôngz nhoz tox siêz.

Iz chas zav nôngz blêx tir tâuk kruôr gis, muk txos trâu cxuô xã thax tsav tox siêz Mù Cang Chải, kror tưs cux pov têx tsoz chos, nôngz tsiêx cxu yiêz tưz thiêz tsênhv tâu tsôngv pêx xênhv ntơưv qơư uô, tu zus đros têx tsưr ziv hlôngr yiêz tâu trơưk tsưr ziv, siêz xar. Têx zav nôngz tsiêx cxu li: Buô têz, keiz đuz grêix Hmôngz, ok Lục Yên… txos trâu têx jâuz tâuv, yuôx đrox njuôz, txir juôx Tai Nung….

Bí thư Huyện uỷ Nông Việt Yên heik pâuz: Huyện xav hur si liêx têz lok six đar, muôx 3 thax tsav nhiêk jông txơưr nhiêk tsi siz thôngx. Seiz lok têx đêx ar, qơư uô nox nhiêk jông txơưr nhiêk co, huyện njuôk xav, hlôngr yiêz tsưr ziv uô kôngz, tu zus tsiêx cxu li chas cov huv đros ntơưv qơư. Muôz têx zuz nôngz yiêz thiêz jông lok tsêz chos sâuv têx liêx têz uô tsi jông blêx, poz cưk zos iz hâur têx tsưr ziv zov chênhr  paz cxuz cêr yeiz pluôs truôx, hâu cêr yiêz chiê tsôngv box heir nênhs tsơưs nhoz no huôv tsar uô nox uô hnar, muôx luz nênhx vav mênhx: “Huyện tsưr ziv zos zuôr tror cxiz hlôngr yiêz ngênhx kôngz nuv khov lok sâuv uô lơưr têx muôx jông chiê cxiz huôv tsar têx xiv huv chênhr, xiv huv jông hâur thax tsav qơư, taz sik tsuv tsiv uô ntâu, muôx grik. Hâux lưv tiv 2 hâur huôv tsar kôngz nuv, co zos uô lơưr têx tsưr ziv yiêz, muôz têx nôngz kôngz yiêz lok tsêz chos….”.

Huyện tox siêz Mù Cang Chải iz shông txo grêk tsơưs tâu 8% ntâu têx chuôz zis pluôs. Đros thiêz tas nro cxix luôs chính trị sik côngv têk thiêz tsôngv box Hmôngz li têx sir jos, hlôngr yiêz tsưr ziv huôv tsar uô nox, huôv tsar kinh tế, txos shông 2025, huyện tox siêz no muôx têx zuôr hla đhâu huyện pluôs./.

                                                (VOVTB-Riê Lâux cxeik, nhênhv)