Chor nênhs nhiêv sênhr chêr hu gâux, heik cưr cxiêx hâur tas nro têz qơưk siz chuôs njiz jiês tiv 7-shông 2022

Nhiv kruôr đhâu, ntơưv Cung Vênhx huôv Việt Nhật TP Hạ Long, chôngz lênhx ntâu tus nhiêv sênhr chêr hu gâux, heik cưr cxiêx nhoz ntâu tỉnh, TP tưz siz zâuv tuôx seiz nthuôr uô lov jêv hâur hmo krêz uô têx cêr lov jêv li heik sâuv.  Zơưv Dương Tuấn, kuz qơư nhoz Thái Bình, nhiv no uô nênhx nhoz ntơưv TP Hạ Long, tỉnh Quảng Ninh, iz lênhx lok six nhiêv têx txux chi cêr lov jêv sâuv tuôx đros côngv cêr lov jêv heik:

“Cur zos iz lênhx tuz nhuôs nhoz Thái Bình, lok six nhiêv cêr lov jêv hu gâux li chor lâul thâuv ntêx têx txux chi sênhr chêr uô si lov jêv taz sik ho uô nênhx nhoz tỉnh Quảng Ninh. Cur vav chiê siêz, 2 tỉnh puôr lênhx pâuz tsênhz lok zav txux chi no zov chênhr li chas hâur luz nênhx vênhx huôv xênhz huôx. Ndax têx jiês li no thiêz muôx têx Đeix nta suôz Việt Nam, chor câu lạc bộ têx lênhx nênhs nhiêv zav txux chi cêr lov jêv no hâur tas nro têz qơưk tsuv phuôx huiz, tuôr tsês jông tsi chiê pôngz plox”.

Chor nênhs nhiêv sênhr chêr nthuôr uô txux chi cêr lov jêv hâur tas nro têz qơưk siz chuôs njiz jiês tiv 7-shông 2022 tsưr tsix hâur 3 hnuz, muôx têx lênhx txơưx hu gâux, heik cưr cxiêx sênhr chêr uô si nhoz chor tỉnh: Thái Nguyên, Yên Bái, Thái Bình, Bắc Giang, Hà Nội, Bắc Ninh, Hải Dương, Quảng Ninh….tuôx nthuôr uô 118 jax txux chi sênhr suôz heik cưr cxiêx uô si lov jêv. Zơưv Mai Văn Lạng, Tsar phongx hu gâux, heik cưr cxiêx, ntâuk trax Đeix nta suôz Việt Nam heik pâuz:

“Hâur ntâu shông đhâu, txux chi sênhr chêr heik cưr cxiêx li heik sâuv thâuv tưs tưz tâu tuôr tsês thiêz huôv tsar nthuôr uô lov jêv. Taz sik, muôx iz ntuk tsi yuô muôx lênhx tưs sênhr chêr nthuôr uô zav txux chi co, cux jux juk trâul pôngz plox, hmôngr lok six jông zos mạng facebook, youtobe huôv tsar, têx lênhx nênhs nhiêv mnôngs zav txux chi sênhr chêr, sênhr suôz heik cưr cxiêx co, nênhs Việt Nam ho tror zok nriêr mnôngs, cơưv shâuv txux chi sênhr suôz heik. 7 shông đhâu, tưz muôx yênhx cxênhz lênhx nênhs nhiêv zav txux chi heik sâuv tâu sênhr chêr nthuôr uô lov jêv trâu sơưr đơưk seiz thiêz mnôngs. Tsi tas li, cur cux pov chor nênhs nhiêv zav txux chi no ziv hnuz ziv muôx chôngz lênhx ntâu tus đuô, zok nriêr cêr tuôx cơưv shâuv sênhr chêr, sênhr suôz heik, nthuôr uô si lov jêv”./.

(VOVĐB-Riê Lâux cxeik, nhênhv)

Ndis shuôk têz qơưs lov jêv lul hâur chêix ntux sor nhoz Bình Định

          Hâur kaz hli 4 đhâu, tsênhv qơư khoa học thiêz hlôngr yiêz tỉnh Bình Định ntơưv phươngx Ghềnh Ráng, đrôngl Quy Nhơn tưz huôv tsar uô chiê tsôngv kruô ndis shuôk têz qơưs tuôx sêiz txos. Ntơư tâu xav zos iz tsênhv qơư khoa học vũ trụ jiês xuz thơưx ntơưv VN thiêz tsênhv qơư tiv 2 ntơưv Đông Nam Á, tsuôk uô kaz sinh ga po. Txix hâur chêix ntux sor txos trâu nhiv no, xav kror đruôz đraz hâur iz hnuz, tsênhv qơư no tưz tok tâu iz cxênhz ntâu lênhx kruô tuôx sêiz shuôk, ndis uô si. Tus muôv An Bích Ngọc, iz lênhx kruô nhoz đrôngl HCM shir phaz lul hêik pâuz tiêk: tus muôv co đros 7 lênhx fôngx zưs uô cê tuôx sêiz shuôk têz qơưs trâu thax tsav qơư no tâu 3 hnuz, 2 hmo; tâu sêiz pov muôx ntâu zav jông jav, tâu nox ntâu zav nox kaz muôx nhoz tỉnh Bình Định.

          “Cur tuôx ndis uô si, sêiz shuôk têz qơưs trâu thax tsav qơư no, cur jông siêz hênhr. Têx vax tsêr ntơưv jông jav, nziv tsôngv kruô sđ siêz nhiêv đros trâu muôx ntâu zav hlôngr yiêz jông”

          Tỉnh Bình Định nhiv no muôx 390 ntâu qơư, 12 cxênhz ntâu qar tsêr tsês trâu tsôngv kruô tuôx so, nox nhoz muk lok sêiz shuôk têz qơưs; phênhv ntâu chêx chôngk trâu đrôngl Quy Nhơn. Chiê muôx têx qơư jông jav nziv tsôngv kruô siêz nhiêv, hur si cxuô luz tsêr tok kruô, tưz hlôngr yiêz cxiv uô cxuô zav huv đros: Xav txix têx lênhx nênhs chơưx kruô, tok kruô tuôx ndis uô si, sêiz shuôk têz qơưs. Zơưv Lê Thanh Sang, Giám đốc sêiz car tsêr tok kruô Hải Âu shir phaz lul hêik pâuz:

          “Chor nênhs muôx txâuk tsưr ziv txux chi chơưx kruô, tok kruôr hâur tsêr tok kruô tsik muôx txâuk, tsuv zok nriêr xêir zuôr yiêz thiêz tsuv tso chor chơưx kruô co muk cơưv cxaz nzir tsưr ziv txux chi thiêx uô tâu luôs hauax lưv zok muôz hâur tsêr tok kruô”

          Xav txix hâur shôngk shông txos trâu nhiv no, ngênhx du lix tỉnh Bình Định tưz fuô uô ntâu faz tsưr ziv cxơưz cxiz huôv tsar du lix. Hâur ntơư, tưz tsưr tsix kriz ntâu ntênhk hội chiê tsôngv kruô hâur têz qơưs thiêz kruô oz chas têz qơưs pâuz txos Bình Định. Chênhr zos li hêik ntơư, xav txix hâur shôngk shông txos trâu nhiv no, ngênhx du lix Bình định tưz tok tâu 2,3 triệu lênhx kruô tuôx ndis uô si, sêiz shuôk têz qơưs; cxuô zav hax huv muôs trâu tsôngv kruô, muôx phêmnhv sâu tâu nhiêx txiêx tax tâu 4.180 tỷ đêiv; tsar ndê 161% pir li shông uô ntêx.

          Chiê cxơưz cxiz tsôngv kruô ndis shuôk têz qơưs tuôx trâu Bình Định hâur chêix ntux sor no, Sở du lix tỉnh Bình Định tưz đros uỷ Ban thành phố Quy Nhơn bax jông cxuô luôs hâux lưv zuôr uô hâur ntu zuôr txos li: Jiês tưr têx nxêik jông gâux ntiêx têz VN shông 2022; ntênhk hội njêk ngừ Đại dương; sik tưr hêik gâux…txuôk đros uô cxuô zav nox kaz cov tsôngv kruô hâur têz qơưs thiêz kruô oz chas têz qơưs pâuz txos. Zơưv Nguyễn Phi Long, chủ tịch uỷ ban tỉnh Bình Định hêik pâuz:

          “ Ngênhx du lix tsuv đros cxuô tsênhv qơư njuôk xav cxuô faz tsưr ziv, tsiv uô cxuô zav hax huv du lix yiêz. Cxuô luôs hâux lưv uô,  ngênhx vênhx huôv; ngênhx du lix thiêz uỷ ban thành phố Quy Nhơn, tsuv sik côngv đas jos tsưr ziv đros Ban tsưr tsix uô. Sir jos iz shông tsuv tsưr tsix kriz uô 1-2 ntênhk hội lox cov tsôngv kruô pâuz txos cxuô zav txux chi, vênhx huôv jông nhoz Bình Định”./.

                                       Tsu cxêik nhênhv- VOV Đông Bắc