Tsôngv pêx xênhv tox siêz Lai Châu bax jông tsưr ziv phax tar no trâu tsiêx cxu

Têx tsưr ziv tu zustsiêx cxu hâur ntâu shông đhâu, tsi so sox seiz njôngr ntux txơưr txar đhâu heik pâuz sâuv đeix, ntơưr pov tsir, txix ciês thâuv jiês no njiv nhiv kruôr đhâu, zơưv Tẩn Mìn Hiển nhoz thị trấn Sìn Hồ, huyện Sìn Hồ (Lai Châu) tưz bax chaz thiêz lơưr chuôz zis têx tsiêx lok tsêr gâuv no. Chuôz zis paz tưv muôx zuôr xar 10 tus tâu cơư hâur qơư hur si, kruôr krơưr thiêz hlêis jâuz puz, muôz têx kuôr blêx chuôz zis bax khơưk tsês tâu trâu nox, viv li tas nro chor tưv puôr lênhx muôx đas jos truôx tuk, tsi trâus uô ruôr hiêv li chas hlo: “Chuôz zis cux tu zus nhux tưv thiêz txos cheix ntux no nor mak chuôz zis cux tưz chaz lok tsêr, xor thêir qơư ntov cơư cov chuô txiêk tsi yâu thiêz hlêis jâuz puz trâu nox xưz”.

Thị trấn Sìn Hồ zos thax tsav tox siêz, chênhr zos li heik co niêx shông huôz pok huôz niêz xưz. Muôx nhos iz ciêz đhâu, hâur thax tsav thâuv hmo thiêz tas cik sơưr nzor thâuv tưs cux no njiv. Txơưv li co, taz sik khov hâu nov ntơưv qơư thiêz pêx xênhv bax jông tsưr ziv phax tar, viv li txos nhiv no 1.600 ntâu tus tsiêx hâur thax tsav cux tsi trâus uô ruôr hiêv li chas hlo. Zơưv Tẩn A San, Chủ tịch Ủy ban thị trấn Sìn Hồ heik pâuz: “No zos thax tsav tox siêz, niêx shông lok six no njiv, uô ruôr hiêv txos huôv tsar tu zus tsiêx cxu, lar heik zos têx tsiêx lox. Yênhx shông Ủy ban thị trấn puôr lênhx cxiv tsa tsưr ziv thiêz tso lênhx nênhs muk đros têx lênhx tsar jok yax kriê trâu chor chuôz zis tu zus bax phax tar no trâu nhux tưv”.

Hâur tas nro huyện Sìn Hồ, chor hnuz đhâu, txơưv ntâu thax tsav lok tê thiêz no njiv, taz sik têx tsiêx hâur huyện muôx zuôr xar 83 cxênhz tus cux tsi trâus uô ruôr hiêv li chas hlo. Zơưv Bế Văn Tiệp, Phưv Giám đốc Tsênhv qơư dịch vụ Kôngz nuv huyện Sìn Hồ heik pâuz, txix têx njuôk xav hâur thax tsav zuôr muôx no njiv, Ủy ban huyện Sìn Hồ tưz chox kriê cxuô cơ quan lês car uô đreiv têx hâux lưv li heik sâuv tso canr bôv muk hâur xã, jêx jok, hux jos đros hâu nov cxuô thax tsav qơư qênhz yuôx, yax kriê, vênhv tôngv têx chuôz zis tu zus sir jos phax tar no trâu tsiêx cxu: “Pêz tưz muk yax kriê, vênhv tôngv, heik pêx xênhv uô lơưr cxuô faz tsưr ziv phax tar thiêz yeiz trâu tsoz chos, tsiêx tu zus thiêz têx shuôz njêl. Bax kriê pêx xênhv xor thêir qơư cơư tsiêx cov ntov tsi chiê chuô txiêk yâu; nas yiê ntuz”.

Tas nro tỉnh Lai Châu nhiv no muôx 370 cxênhz ntâu tus tsiêx, hâur co nhux tưv muôx nhos 120 cxênhz tus. Iz chas 250 ntâu qơư huôv tsar tu zus ntâu tsiêx cxu, nhiv no hâur thax tsav muôx zuôr xar 46 cxênhz chuôz zis tu zus têx tsiêx lox, taz sik chor chuôz zis tu zus muôx qơư cơư tsiêx nhiv kruôr tax 74%. Chiê tsưx phưv truôx tuk têx tsiêx cxu, ngênhx kôngz nuv tưz bax fuô uô ntâu faz tsưr ziv tsênhv tsênhz. Zơưv Nguyễn Thành Đồng, Phưv Giám đốc Sở Kôngz nuv thiêz huôv tsar tox siêz tỉnh Lai Châu heik pâuz: “Txix ntux têx txơưr txar, no njiv, tỉnh tưz chox kriê cxuô thax tsav qơư bax phax tar no thiêz yeiz trâu tsoz chos, tsiêx tu zus. Hâur co, sir jos sox seiz njôngr ntux li txơưr txar, mông heik pâuz chiê kriê pêx xênhv zênhx max bax phax tar no trâu têx kôngz, tsiêx tu zus. Tiv 2, kriê pêx xênhv chaz thiêz lơưr têx nhux tưv pêv yar jâuz lok gâuv no, hlêis jâuz puz. Tiv 3, kriê sơưr đơưk uô  thiêz xor thêir ntov têx qơư cơư tsiêx chiê chuô txiêk tsi yâu, taz por muôx txâuk jâuz, krâur puz tsiêx cxu hâur têx hnuz no njiv. Iz kro thiêz zos, choz hâux lưv trâu cxuô thax tsav tsi so qênhz yuôx, heik tsôngv niêv txir lax pêx xênhv tsưx phưv truôx tuk đas jos thiêz uô jông têx luôs hâux lưv heik sâuv chiê txo grêk tsơưs têx trâus ruôr hiêv”.

Txix cxuô faz tsưr ziv tu zus tsiêx cxu hâur ntâu shông đhâu, bax fuô uô tâu truôx jông, Lai Châu sir jos tsưx phưv truôx tuk tsiêx cxu hâur têx hnuz no njiv./.           

Khắc Kiên-Riê Lâux cxeik, nhênhv