Hnuz 15/1, zơưv Nguyễn Thiện Nhân-Ủy viên bộ chính trị, chủ tịch Ủy ban Trung ương mặt Trận têz qơưk Việt Nam đros đoanx côngz xưv tưz chuôr yuô thiêz phôngv tsiêz iz cxiê chuôz zis thiêz tiv phaz ntoưv tỉnh Sơn La. Đoanx cux muôx jiês uô hâux lưv đros lênhx tov tỉnh Sơn La. Ntơưv jiês uô hâux lưv đros lênhx tov tỉnh Sơn La, Chủ tịch MTTQ Việt Nam Nguyễn Thiện Nhân tưz mnôngs lênhx tov tỉnh hêik pâuz lok qênhx shênhx kinh tế-xã hội hâur shông đhâu. Zơưv Nguyễn Thiện Nhân hênhr kruôk Đảng bộ, chính quyền thiêz pêx xênhv cxuô mênhx cxưx tỉnh Sơn La li têx sir jos uô tâu hâur shông đhâu. Thôngx cxix, hêik tỉnh Sơn La tsuv sir jos uô yưv pênhr, chuôz ndê kinh tế, taz por ngaz tuk côx phax, zoz zux, y tế, thiv pluôs truôx đrênhk…Tiv zix hâur jiês tsiêz kêiz shông 2017 hêik cxuô cấp, cxuô nganhx tỉnh Sơn La tsuv tsov cưv tsoz phưz tsiêz trâu tsôngv box, tiv zix zos chuôz zis tâu sơưv cêr chêi, chuôz zis pluôs, txar qơư nhoz yiêz…taz por lênhx tưs cux tâu nox tsiêz shir phaz, tsâu sor./.

(TTTB-Lik Thox cxêik nhênhv)

Hnuz 14/1, Ủy viên Bộ chính trị, Bí thư T.Ư Đảng, seiz car Ủy ban qênhz yuôx T.Ư Trần Quốc Vượng tưz muk seiz shuôs thiêz muôz huv puz trâu têx ziv chuôz zis muôx côngz têz qơưs, nênhs pluôs, tsôngv box heir nênhs tsơưs ntơưv xã Y Can, huyện Trấn Yên thiêz xã Quang Minh, huyện Văn Yên, tỉnh Yên bái. Đros muk muôx hâu nov Ủy ban qênhz yuôx T.Ư thiêz T.Ư hội chữ thâp đỏ VN. Đôngx chir Trần Quốc Vượng heik tơưv cêr shir phaz txix ntơưv qơư têx luôs hâux lưv sir jos uô hâur txiv ngaz XH thiêz têx hlôngr yiêz hâur cxiv tsa jêx jok yiêz nhoz tox siêz. Iz chas ntơư heik cấp ủy, hâu nov ntơưv qơư tror uô jông hâux lưv cxiv kho têx qơư zoz zux, y tế chiê gra siêz txux chi tsưr ziv trâu tsôngv box sđ thiêz uô jông hâux lưv tsoz phưz đas jos trâu tsôngv box, paz cxuz cêr yeiz pluôs truôx vênhk. Ntơưv têx thax tsav, suôv qơư muk txos sâuv, đôngx chir Trần Quốc Vượng tưz muôz 100 poz huv tsiêz, iz poz tsiv grê nhos 1,1 tsov đeiv puz trâu têx chuôz zis tâu sơưv têz qơưs têx chei paz thiêz nênhs pluôs./.

(Tuấn Xuân-Riê Lâux cxeik, nhênhv)

Nhiv kruôr đhâu, pos Đặng Thị Ngọc Thịnh, Ủy viên BCH trung ương Đảng, phưv chủ tịch têz qơưk Việt Nam thiêz đoanx côngz xưv chuôr yuô, uô hâux lưv đros tỉnh Điện Biên. Phưv chủ tịch têz qơưk Đặng Thị Ngọc Thịnh thiêz đoanx côngz xưv tưz muk hlơưr sahz ndo txos chor zênhz shôngx liệt sĩ ntơưv qơư nza liệt sĩ A1; chuôr yuô, khơưk muôz huv tsiêz tsiv gri 30 triệu đêiv trâu cán bộ, chiến sĩ đônx pênhz phax Thanh Luông; chuôr yuô, qênhz yuôx qênhx shênhx uô jênhv vưv huôv star kinh tế-xã hội, taz por ngaz tuk-côx phax, cxiv sta jêx jok yiêz thiêz khơưk muôz huv trâu 50 chuôz zis tâu sơưv cêr chêi, chuôz zis pluôs ntơưv xã Ẳng Nưa, huyện Mường Ảng; khơưk muôz 40 suất học bổng  trâu nhuôs zâu muôx luz nênhx txov nhêv ntơưv tsênhv qơư paz txưv xã hội tỉnh; khơưk muôz 100 triệu đêiv trâu cuiv viv nênhs pluôs hâur tỉnh; muôz chor nhiêx 100 triệu đêiv txix cuiv paz txưv Việt Nam (Bộ lox tôngv-xaz pênhz thiêz xã hội) trâu nhuôs zâu muôx luz nênhx txov nhêv tiv zix tỉnh Điện Biên./.

(KT-Lik Thox cxêik nhênhv)

Hnuz 14/1, Phongx cảnh sát qênhz yuôx têx nênhs fêv nhiês zuôr muôs, uô luôv zax zênhz, Công an tỉnh Lai Châu tưz tso chei ntêk zênhx max Cuôv Xênhv Lâux, xênhz shông 1988, nhoz ntơưv jok Keo Lôm 2, xã Keo Lôm, huyện Điện Biên Đông, tỉnh Điện Biên nhiês thâux gra 10 poz zênhz đơưz tsi trơưk chei. Xuz thơưx, Cuôv tưz tsi lênhk zuk cêr cxâuv zos tsưr têx zênhz đơưz ntơư. Taz sik, đhâu thâuv xav jênhv, pâuz tsênhz chor hmôngr đơưz heik sâuv zos zax zênhz thiêz txeik tâu mông txix Phongx Cảnh sát zoz thôngz, Phongx Cảnh sát qênhz yuôx nênhs fêv nhiês zuôr muôs, uô luôv zax zênhz tưz đros Phongx kỹ thuật hình sự, Phongx Cảnh sát cơ động, Công an tỉnh Lai Châu qir yơưz vơưz, qênhz shuôs ntơưv qơư, sâu tsês tâu têx zax zênhz, uô ntơưr chiê qênhz yuôx. Đhâu zuôr xar iz six hơưv nus muk nus lok, Cuôv Xênhv Lâux tưz lênhk nhav chor zênhz đơưz heik sâuv. Cuôv krêz tiêk, chor zênhz heik no zos iz lênhx nênhs nhoz Lok Tsuôk li, nưk ntiêr Cuôv thâux gra txix Điện Biên muk trâus Lào Cai 30 tsov đeiv. Nhiv no txuz plâuz heik co tsênhv tâu Cơ quan muôx vax huôv tỉnh lai Châu tror qênhz yuôx, uô tsênhz mênhx./.

(Khắc Kiên-Riê Lâux cxeik, nhênhv)