Hâur hnuz 29/6, ntơưv tỉnh Sơn La cux tsênhv muôx ntux nas txos lok nas lox. Lơưr chor tiv phaz thôngz sâu sêi, hâur 3 hnuz no ntơưv tỉnh Sơn La đêx nas tưz cuôr yôngz iz lênhx nênhs, phiv liv txos xar muôx 180 luz tsêr, hâur co 4 luz tsêr tsuv txar qơư nhoz sêi đrơưv; 22.000 ntâu yiv ndis blêx, poz cưk trâus hiêv; ntâu côngz trinhx đêx liv, cưx đêx, cêr muk lok trâus poz, cxuz. Tas nro têx trâus hiêv xav muôx 1,5 tiv đêiv ntâu…Zơưv Hà Quyết Nghị, phưv ban thường trực Ban sêiz car ntux têz uô hiêv thiêz zok nriêr chơưv paz tỉnh Sơn La puz pâuz:

“Ban sêiz car phax tar ntux nas chuô tưz chox kriê tas chor taz viv, chor huyện têx qơư muôx ntux nas mak bax tsưr ziv tir tar. Chor lưx lươngv cux uô jông côngz zưv hêik pâuz têx xor mông sâuv cxuô chuôz zênhx xa mông. Hêik pâuz trâu chor chuôz zis pêx xênhv txar qơư nhoz ntơưv têx qơư muôx ntux nas lox tsik so…”./.

(Hồng Việt-Lik Thox cxêik nhênhv)

         Trơưk li mông txix Ban seiz car phax ntux uô ruôr hiêv thiêz zok nriêr chơưv paz lênhx nênhs huyện Mường Chà, tỉnh Điện Biên nhiv kruôr no heik, hâur têx hnuz txix hnuz 27-28/6, hâur thax tsav huyện ntux lok nas lox ntêr hnuz, uô tox poz ar lơưk thiêz đêx nas cuôr yôngz tas tsôngv box nhoz iz cxiê xã hâur huyện ntâu chuôz zênhx chuôz tas. Tsênhv tsênhz hmo 27/6, ntux nas lox tưz cuôr yôngz, uô ar cxuz tas tsôngv box ntơưv jok tin Tốc, xã Mường tùng xar muôx 7 ha blêx thiêz iz tuk tưv; uô tsôngv box ntơưv jok Huổi Toóng 2, xã Huổi Lèng iz cxiê vax tsêr trâus xưz, poz; thiêz uô ar, poz jêz poz ntâu lok cxuz tá siz cxiê ntu txox cêr lox số 12 ntơưv cêik cêr 119, ntu muk đhâu jok Huổi Toóng 2, xã Huổi Lèng. PV nhoz iz suôv faz Tây Bắc zuôr tror sox seiz, heik trâu sơưr đơưk pâuz nzir lok têx mông no./.

(Vũ Lợi-Riê Lâux cxeik, nhênhv)

         Nhiv kruôr đhâu, Liên đoanx Lox tôngv tỉnh Lai Châu tsưr tsix mít tinh uô lơưr luz hlik phax tar zax zênhz shông 2017. Six hơưv đhâu, luôs hâux lưv phax tar zax zênhz thiêz phax tir thêir moz HIV/AIDS tưz tâu Tỉnh ủy, HĐND, UBND tỉnh, cxuô cấp, ngênhx, Ủy ban MTTQ thiêz têx đoanx thêv, hâu nov chox kriê uô jông luôs hâux lưv heik sâuv, jux juk txo grêk tsơưs têx lênhx nênhs trâul muôx zênhk zax zênhz; qênhz shuôs, tir thêir tsi chiê tsar ndê lênhx nênhs uô cxâuv zax zênhz hâur côngv thôngx; ruôr por tsês ntâu txuz nhiês thâux gra, zuôr muôs, uô luôv zax zênhz cux li têx qơư lơưr nhiês zuôr muôs zax zênhz. Hâur 6 luz hlik hâur shôngk shông no, lưv lươngv phax tar zax zênhz tỉnh Lai Châu tưz qênhz pov, ntêk tâu 150 txuz, 195 lênhx nênhs; sâu tsês tâu 27 cir zênhz đơưz; 2,5 cir zênhz đuz./.

(KT-Riê Lâux cxeik, nhênhv)

        Zar hnuz kêix 28/6, Hội cxơưz cxiz cơưv ntơưr tỉnh Lào Cai tsưr tsix jiês cơưv Ban chấp hành jiês tiv 6, khóa 3 six cxiv 2015-2020 thiêz sơ kết côngz xưv cxơưz cxiz cơưv ntơưr 6 luz hli hâur shôngk shông. 6 luz hli hâur shôngk shông no, côngz xưv cxơưz cxiz cơưv ntơưr, cxiv tsa xã hội cơưv ntơưr zos yênhx huôx tôngv tsik so tâu pêx xênhv cxuô mênhx cxưx hâur tỉnh thôngx ziv uô trơưk. Phongz yaox cxiv tsa chuôz zis cơưv ntơưr, xênhv nênhs cơưv ntơưr, côngv thôngx cơưv ntơưr thiêz taz viv cơưv ntơưr tâu uô đêz đar. Đhâu co, paz trâu côngz sưv zoz zux Lào Cai huôv tsar, paz cxiv tsa jêx jok yiêz thiêz uô lơưr Đề án “Sir jos uô phôngz yaox cơưv ntơưr tas siv nênhx hâur chuôz zis, xênhv nênhs, côngv thôngx txos shông 2020”./.

(KT-Lik Thox cxêik nhênhv)