Tung mê, Luât mơ’no liăn cheăng (‘mâi rơnêu) ƀă hên troăng pơhlêh ki kal, kơdroh rơdêi pro hlá mơ-éa; pro kơdroh chât kơvâ cheăng tê mơdró ai tơ’lêi hlâu; kơjo ó rơdêi ăm kŏng ngê̆ rơxông nếo, pơhlêh nếo tơmiât pêi rơkê, cheăng kâ kruá lĕm kong prâi; pro tơ’lêi hlâu ăm khu mơ’no liăn cheăng kong têa ê...

Kuô̆k hô̆i xuân tơbleăng ăm pêi pro Tơdroăng pơkâ mơnúa mâu troăng pơkâ pêi, troăng hơlâ ki phá tơ-ê vâ pêi pro mâu tơdroăng tơkêa bro ki kân, ki kal tung pơlê kong xiâm Hà Nội; Tơdroăng pơkâ ‘mâi rơnêu, tơ’nôm mâu troăng pơkâ pêi, troăng hơlâ ki phá tơ-ê mơnhông pơlê kong kân Đà Nẵng.

‘Na mâu troăng pơkâ pêi, troăng hơlâ tah lôi pá puât, tơvâ tơvân tung tơkŭm pêi pro luât tơnêi tơníu, Kuô̆k hô̆i tơbleăng ăm pêi pro Tơdroăng pơkâ tơ’nôm mâu ngế ki Tơnêi têa xo tơvêh tơnêi xúa pơkâ xiâm gâk kring tơnêi têa, gâk kring ƀă mơnhông cheăng kâ - rêh ối pơlê pơla, ƀă kĭ troăng chêl thiê̆n, tŏng gum, vêh xĕn kuăn pơlê, ôh tá riân mâu ngế ki thâ.

Tung kơvâ khăm pơlât, tiô Tơdroăng pơkâ dêi Kuô̆k hô̆i, sap hâi lơ 1/1/2026, ngế vâ chê kơtiê ƀă mơngế sap ing 75 hơnăm tơngiê klêng châ chêl 100% kơxô̆ liăn khăm pơlât; khu ki ôh tá ai kơbố rak ngăn, pêi lo liăn iâ châ mơdêk kơlo châ mơhá ƀaoh hiêm khăm pơlât. Sap hơnăm 2030 kô pêi pro troăng pêi ăm tê kơtiê kơxô̆ liăn. Kuô̆k hô̆i xuân hiăng tơbleăng ăm pêi pro Tơdroăng pơkâ kĭ troăng hơlâ mơ’no liăn Tơdroăng xiâm tơnêi têa ‘na thôn pơlê nếo, kơdroh kơtiê krá tơniăn ƀă mơnhông cheăng kâ - rêh ối pơlê pơla kơpong kuăn pơlê hdroâng kuăn ngo ƀă kong ngo hneăng hơnăm 2026 – 2035; rơtế mâu luât, tơdroăng pơkâ ki kal ki ê.