Troh nôkố, Vi ƀan tâ phĭu rah xo kăn pơkuâ kong pơlê Dak Lak hiăng tơbleăng Pơkâ pêi; Tơdroăng pơkâ pêi tơdroăng tâ phĭu rah xo kăn pơkuâ; Tơdroăng pơkâ mơjiâng mâu tiêuh ƀan: Tiêu ƀan tơmeăm khoăng, Tiêuh ƀan Tơdroăng kal – Pơtâng tối, Toiêuh ƀan gâk kring, tơniăn pơlê pơla ƀă khăm pơlât, Tiêuh ƀan tơleăng xăm tối, xăm kêng, Tôh gum cheăng, Tôh pêi cheăng gum rĕng; mơjiâng trang Tơdroăng kal điê̆n tưh dêi Vi ƀan tâ phĭu kong pơlê.

Khu hnê mơhno tơdroăng tâ phĭu rah xo kăn pơkuâ kong pơlê Dak Lak hiăng tơkŭm po Hneăng hôp pêi pro tơdroăng tâ phĭu rah xo tiô troăng tơdrêng a tíu pêi cheăng Tĭnh ủi ƀă tơdrêng a tíu mơ’no hyôh măng 102 cheăm, bêng ƀă lối 10.000 kăn teăng mâ veăng. Hô̆i đong kong pơlê tơkŭm pơtâp pêi pro tơdroăng tâ phĭu rah xo kăn pơkuâ ăm 48 cheăm, bêng peăng mâ hâi Lo Dak Lak ƀă dâng 400 kăn teăng mâ veăng. Vi ƀan Măt trâ̆n Tơnêi têa Việt Nam kong pơlê hbrâ mâu tơdroăng xiâm ƀă hiăng tơkŭm po tơpui tơno roh má môi a hâi lơ 8/12.

Ai 100% mâu cheăm, bêng pêi pro teăm tơdrêng mâu tơdroăng xiâm ki tơdjâk troh tơdroăng tâ phĭu rah xo tiô pơkâ; kêi đeăng tiô tối hdrối rah xo ƀă pơtroh mơngế châ tơbleăng to pro kăn teăng mâ Hô̆i đong kuăn pơlê râ cheăm ƀă hiăng tơkŭm po Hneăng hôp kal kí roh má môi.