VOV4.Xơ Đăng - Pơtối tơdroăng kơ-êng bă hlối tiâ tơdroăng kơ êng, kơxo lơ 11/11, pôa Đào Ngọc Dung, Ngế xiâm ngăn cheăng pêi - mô đôi rong ƀă rêh ối pơlê pơla pơtối tiâ tơdroăng kơ-êng ƀă mâu khu tơdroăng pêi cheăng, khu lêng ngăn ‘na pơlê pơla rêh ối. Pơtối mê pôa Nguyễn Kim Sơn, Ngế xiâm ngăn hnê hriâm ƀă hnê mơjiâng tuăn ngôa tơkê xuân hiăng đăng tơdroăng tiâ kơ êng ‘na khu tung tơdroăng hnê hriâm ƀă hnê mơjiâng tuăn ngôa rơkê ‘na tơdroăng pơkâ ƀă ‘no liăn mơjiâng tơmeăm khoăng. Tung rôh kơ-êng kơxêi hnah (10/11), Ngế xiâm ngăn cheăng pêi Mô đô̆i tro rong ƀă rêh ối pơlê pơla hiăng tơkŭm mơnhên a mâu troăng rơhlâ tơmâng ăm vâi hdrêng kuăn tê, klêi kơ’nâi hiăng tâi pơreăng. Klêi tiâ kơ-êng dêi pôa Đào Ngọc Dung, kơxo kố, Kuô̆k hô̆i pơtối tơdroăng kơ-êng khu ‘na tơdroăng ki má pái dêi tơdroăng hnê hriâm ƀă hnê mơjiâng tuăn ngôa rơkê.

Tung kơxê 11/11, Kuô̆k hô̆i pơtối kơ-êng khu ‘na tơdroăng má pŭn dêi tơdroăng pơkâ ƀă ‘no liăn cheăng, tơkŭm a mâu tơdroăng ‘mâi mơnhông ƀă mơnhông cheăng kâ tung pơla ai tơdroăng nếo; Troăng rơhlâ mơ-eăm, tâk ki xơpá ăm khu mơdró, khu pêi cheăng tơrŭm, rơpŏng mơdró kâ vâ ‘mâi mơnhông cheăng kâ, pêi chiâk deăng, tê mơdró.