Tung tơdroăng trâm mâ pú hmâ, tâi ihiâm mơno, péa kăn xiâm pơkuâ tơpui tơno trâu rơdâ ‘na tơdroăng rêm tơnêi têa, tơrŭm pơla péa pâ ƀă mâu tơdroăng kơpong, lâp plâi tơnêi rơtế rơhêng vâ ‘nâi plĕng.  Péa pâ tối rơdêi tơdroăng pêi pro troăng tơmiât pêi la ngiâ ton xŏn ‘na tơdjêp cheăng kâ tung tơdroăng ki nếo, tơmiât troh pơkâ pêi lo liăn ngân tê mơdró pơla péa pâ châ 150 rơtal dollars a hơnăm 2030; tơdrêng amê tơkêa pơtối pro tơ’lêi hlâu tê mơdró, lôu péa kơchơ mơdró ƀă tŏng gum khu tê mơdró Việt Nam veăng trâu tâ tung tơdroăng pơtroh tơmeăm khoăng dêi Hàn Quốc.

Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế péa pâ mơdêk tơrŭm cheăng hriăn plĕng, hnê kŏng ngê̆, ki má lối cho pêi pro châ tơƀrê Tơdroăng tơkêa bro mơjiâng Viê̆n Khoa hok ƀă Kŏng ngê̆ Việt Nam – Hàn Quốc (VKIST). Pôa Lee Jae Myung tối ăm ‘nâi, Hàn Quốc hbrâ hnê kŏng ngê̆ tung mâu kơvâ kơmăi kơmok tung la ngiâ môi tiah phân mêm rơkê xua kuăn mơngế pro, kế ki chiâng hrik mơ’no hyôh, on tơhrik krúa lĕm, hnê mơjiâng mơngế pêi cheăng, veăng tung tơdroăng gum tơnêi têa mơnhông tiô rơxông nếo ƀă mơnhông khoa hok kŏng ngê̆ ki rơkê dêi Việt Nam; pơkâ thế péa pâ thăm tơdjêp mâu tơdroăng ki ai tơdjâk troh pơhlêh nếo tơmiât pêi rơkê, pơxiâm tăng cheăng tơmiêt pêi rơkê pơla péa tơnêi têa.