Luâ 7 hơnăm tơbleăng pêi Pơkâ 36, Tỉnh ủi Dak Lak hiăng pơkâ pêi 7 tơdroăng pêi pro, nhên pêi 6 tơdroăng tơƀrê; Vi ƀan kuăn pơlê kong pơlê ƀă mâu tíu pêi cheăng, kơvâ cheăng ai pơkâ pêi hên tơdroăng, hlá mơ-éa hnê mơhno, tơrêm tơdroăng chôa pê klêi luât pơkâ mơnhông cheăng kâ a têa kơxĭ.

Pôa Lương Nguyễn Minh Triết, Kăn hnê ngăn Tỉnh ủi Dak Lak pơkâ thế tung la ngiâ, lâp tung kong pơlê tơkŭm pơ’lêh rơdêi ing tuăn tơmiât sap “tăng pêi’’ troh “cheăng kâ têa kơxĭ krá tơniăn”, xo kring vế hyôh kong prâi têa kơxĭ pro xiâm. Tung mê, pêi ahdrối cho tah “theh trĭng” IUU, rak ngăn nhên khât khu tuk, tăng ‘nâi xiâm rêi ká ki tơnăng, mơjiâng cheăng tơnăng ká pêi cheăng tro tơdroăng, tơrŭm ƀă lâp plâi tơnêi.

Kăn pơkuâ hnê ngăn Tỉnh ủi Dak Lak tối nhên mâu tơdroăng ki xiâm cheăng kâ a têa kơxĭ ki kong pơlê tơkŭm mơnhông pêi, mê cho ôm hyô a têa kơxĭ ăm tơƀrê; kơmăi kơmok uâ mơdiê kế tơmeăm, tê ká ăm kong têa ê, tiô troăng pơkâ; logistic têa kơxĭ, kơno têa kơxĭ, on tơhrik ‘mâi pro a têa kơxĭ. Tơdroăng tơxâng vâ tối  cho troăng mơnhông ki lâi rơtế ƀă túa lĕm tro hlối rak vế hyôh kong prâi.