Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa mơnhên, leh tơbâ trâu hơngế mâu tơdroăng ki pleăng kân kĭn dêi pôa Hà Huy Tập, Kăn xiâm pơkuâ hnê ngăn Đảng hneăng hdrối ƀă tơdroăng mơjiâng kăch măng, tơdrêng amê mơnhông tơdroăng ki hâk tơngăm, tơdroăng ki khŏm mơ-eăm, tơdroăng ki vâ xông tơtêk ƀă pôu râng hnoăng cheăng a ngiâ Tơnêi têa.

Tơdroăng rêh ối pêi cheăng kăch măng dêi pôa Hà Huy Tập cho um ki lĕm mơnâ mâ ngăn dêi môi tuăn ngôa rơkê hơnăm ối nếo pêng păm hiâm mơno pâ nhuô̆m tơnêi têa, rĕng plĕng tơdroăng ki vâ pêi ki lĕm vâ châ tơdroăng ki ‘na ihiâm mơno vô sản ƀă troăng tŏng gum tơnêi têa dêi pôa Nguyễn Ái Quốc, Kăn xiâm pơkuâ hnê ngăn tơnêi têa hneăng apoăng. Klêi mê, pôa ối tơkŭm tâi tâng troăng tơmiât tơpui leăng rơdâ, heăn trâu, ihiâm mơno khên tơnôu, ihiâm mơno mơngế kŏng sản ai hiâm mơno lĕm, plâ rơxông pleăng ăm tơdroăng pêi cheăng kăch măng dêi Đảng ƀă hdroâng mơngế. Mơhé vâ pá puât má môi, tro pâm xiê̆n ƀă kơdê hlâ, pôa xuân môi ihiâm mơno khŏm môi tuăn ƀă Đảng, ƀă Kuăn pơlê.

Tiô Kăn xiâm pơkuâ hnê ngăn Đảng, Kăn xiâm hnê ngăn tơnêi têa, tung hneăng nếo, ihiâm mơno lĕm mê thế chiâng tơdroăng ki xiâm pêi pro dêi rêm kăn ƀô̆, đảng viên: khên tơmiât, khên pêi, khên châ tơƀrê hluâ pơkâ, khên pôu râng hnoăng cheăng, khên pêi xua pơxúa tơdjuôm; xo tơdroăng ki châ tơƀrê pro loăng rĕk, xo tơdroăng ki vâ môi tuăn, hơniâp ro dêi Kuăn pơlê pro pơkâ ki kân má môi.