Drêng ai tơdroăng ki pá puât ‘na kơxô̆ liăn ki mơ’no tê mơdró kâ, xua khu kế tơmeăm to kơnâ yă, kong prâi ôh tá tơniăn, pơreăng tâ tú, xâu xía hên tơdroăng ƀă pơkal athế mâu kế tơmeăm pêi lo thăm rế dâi lĕm, krúa hơ’djâ, Khu ngăn ‘na pêi cheăng tơrŭm Vĩnh Cường, ối a cheăm Vĩnh Mỹ, kong pơlê Cà Mau hiăng tơkŭm thăm mơdêk tơdroăng ki veăng tơrŭm pêi cheăng kâ - mơ’no tê báu phái tiô Tơdroăng tơkêa bro ai 1 rơtuh ha báu ki xú lĕm, mơ’no hyôh ‘mêi iâ má môi a kong Tơbăng kroăng Cửu Long. Dế nôkố, túa pêi chiâk pêi deăng dêi Khu ngăn ‘na pê cheăng tơrŭm Vĩnh Cường ai lối 10.000ha, tung mê, ai dâng 5.000ha tơrŭm cheăng mơdâ pêt báu tro tiô tơdroăng pơkâ ki dâi lĕm má môi.

Ki phá tâ hdrối mê hía nah, tung troăng tơrŭm mê ai tá khu mơdró kâ ki veăng tơrŭm pêi ing apoăng. Tơdroăng ki gum hdrê, hnê mơhno tối ‘na kih thuât mơdâ pêt, rak ngăn, chôu ‘măn ta troh a tí tăng rôe báu phái pơrá châ pêi pro tiô kĭ tơkêa nhên khât.

Pôa Trịnh Văn Cường - Kăn Khu ngăn ‘na pêi cheăng tơrŭm Vĩnh Cường tối ăm ‘nâi, ki tơƀrê dêi troăng tơrŭm cheăng ôh tá xê to vâ mơhno to drăng ki pêi lo liăn ngân rế tâk hên, mê ối pơhlêh ‘na túa tơmiât, túa tơchĕng tung pêi chiâk pêi deăng dêi kuăn pơlê. Ing tơdroăng ki kơtâu khŏm pêi lo châ hên báu phái, mê mâu kuăn pơlê ki cheăng tung Khu ngăn ‘na pê cheăng tơrŭm kố hiăng ‘nâi nhên ki kal mê cho hnoăng pêi lo kế tơmeăm ki dâi lĕm khât, châ mơnhên xiâm rêi dêi báu phái ƀă báu phái mê krúa lĕm má môi. Pôa Trịnh Văn Cường tối ăm ngin ‘nâi:

“Khu ngăn ‘na pêi cheăng tơrŭm ôh tá pơkuâ hnê djâ pêi tiô troăng ton, tâng ôh tá tơdrăng, ôh tá ƀlêi chiâng ƀă rơhêng vâ veăng pêi pro tiô túa cheăng kâ krê pá kong. Khu ngăn ‘na pêi cheăng tơrŭm athế ai khu ki pơkuâ ngăn rơkê plĕng khât, ai troăng hơlâ ki rơkê tung mơdró kâ, rơkê tung rak ngăn liăn ngân, ai troăng pêi pro krá tơniăn ton tung mơdró kâ a kơchơ, troăng hơlâ ki cheăng tơro khât, rơkê păng ‘nâng, bu loi tơngah Khu ngăn ‘na pêi cheăng tơrŭm chiâng môi khu ki cheăng kâ ki păng ‘nâng, kâi chiâng vâ châ mot tơrŭm cheăng tung khu ki tơrŭm hên kơvâ, hên ki kơnâ git khât”.

Túa pêi cheăng kâ dêi Việt Nam dế pơhlêh tiô troăng hơlâ ki tơ’lêi hlâu, pêi pro tơtro ƀă cheăng kơxô̆, xua ti mê, kơpong pêi cheăng kâ tơdjuôm, khu ngăn ‘na pêi cheăng tơrŭm dế athế ‘mâi rơnêu, pơhlêh nếo tung tơrŭm kơvâ cheăng ‘na tuăn tơmiât tung tơkŭm hnê tơdjâ pêi cheăng kâ. Hnoăng cheăng ki tơrŭm ƀă mâu kơvâ cheăng kâ krê pá kong châ ngăn cho troăng prôk ki kal vâ khu ngăn ‘na pêi cheăng tơrŭm thăm mơdêk tơdroăng ki tơbriât cheăng kâ, tơbriât tê mơdró, tơtro ƀă tơdroăng ki kal vâ dêi kơchơ.

Tiô jâ Nguyễn Thị Hoàng Yến-Phŏ Kăn ngăn ‘na pêi cheăng kâ ƀă mơnhông mơdêk thôn pơlê, ối tung Khu xiâm ngăn ‘na Chiâk deăng ƀă Hyôh kong prâi tối ăm ngin ‘nâi, hên Khu ngăn ‘na pêi cheăng tơrŭm ki ai túa pêi cheăng kâ kŭn, iâ êt, ôh tá ai tŭm kơmăi vâ têng, uâ ƀă ôh tá hâi châ tơrŭm ƀă kơchơ mơdró kâ. Ing mâu tơdroăng ti mê, khoh pro báu phái ki pêi lo chiâng trâm “châ hên la yă rơpâ”, pêi cheăng kâ ôh tá tro troăng prôk ki ton xŏn la ngiâ.

Tung pơla mê, kơpong pêi cheăng kâ krê pá gong ga ai tơ’lêi hlâu ‘na liăn ngân, ‘na kŏng ngê̆, ing khu râ ki veăng cheăng ƀă ivá ki kâi châ tơrŭm tê mơdró kâ tung tơnêi têa ƀă kong têa ê. Tơdroăng ki thăm mơdêk tơrŭm cheăng pơla Khu ngăn ‘na pêi cheăng kâ ƀă khu ngăn ‘na mơdró kâ krê pá gong hiăng chôa ‘lâng mơjiâng chiâng mâu troăng hơlâ ki krá tơniăn. Jâ Nguyễn Thị Hoàng Yến ai tối tiah kố:

“Tâng kơvâ chiâk deăng pơhlêh tiô túa ki cheăng kâ ki kân ó tâ, rak tơniăn ƀă chôu vế, pro tiô troăng pơkâ, ki pơkal athế pêi pro má môi mê cho athế mơnhên xiâm kối dêi hdrê pêt, tơnêi tíu ki pêt mơjiâng vâ ing mê, tơdroăng tơrŭm tê mơdró nếo tơdrăng lĕm khât, ƀă ngin xuân hiăng hlo trối kố, tâng khu mơdró kâ mơ’no liăn, kŏng ngê̆ ƀă pơkuâ mê Khu ngăn ‘na pêi cheăng tơrŭm kô tơkŭm po pêi chiâk deăng ki châ pơkuâ ngăn ki dâi lĕm dêi báu phái. Tâng chiâng pêi pro 2 tơdroăng tơdrêng, mê pin kô hlo nhên tơdroăng ki pơxúa dêi khu mơdró kâ, Khu ngăn ‘na pêi cheăng tơrŭm tơveăng tung tơdroăng ki tơrŭm ƀă khu mơdró, tơdroăng ki vâ kơdroh iâ, kơnôm ai tơdroăng ki tơkêa ki rôe xúa ƀă kơxô̆ liăn ki tơniăn”.

Jâ Cao Xuân Thu Vân-Kăn hnê ngăn Khu ngăn ‘na pêi cheăng tơrŭm Việt Nam tối tiah kố, mơnhông khu tơrŭm cheăng cho tơdroăng ki kal tơdrêng vâ mơjiâng túa cheăng kâ mơngế pú hên krá tơniăn. Tơrŭm cheăng mê kô mơjiâng ivá cheăng ki vâ thăm mơdêk ki rơkê túa cheăng tiô kơ tơdroăng ki xúa kơxô̆ tung kơpong cheăng kâ mơngế kơdrâm, khu ngăn ‘na pêi cheăng tơrŭm. Ing tơdroăng kố, gum thăm mơdêk tơdroăng ki tơdrăng, ki rơkê plĕng khât tung pêi dêi hnoăng cheăng ƀă tơ’mot hên khu ngế hơnăm ối nếo mot pêi cheăng tung kơpong ki ngăn ‘na pê cheăng kâ tơrŭm.

Xua ti mê, tơdroăng ki tơrŭm ƀă Khu ngăn ‘na pêi cheăng tơrŭm rơtế ƀă mâu kơvâ ki ai tơdjâk trối pêi cheăng kâ krê pá kong ôh tá xê cho hnoăng athế pêi pro, mê ối cho ki pơklât athế pêi pro vâ thăm mơdêk ivá ki tơbriât pêi cheăng, tê mơdró kâ dêi kế tơmeăm Việt Nam tung mơ’no tê kế tơmeăm troh tung lâp plâi tơnêi. Jâ Cao Xuân Thu tối nhên tiah kố:

“Tung tơrŭm cheăng mê pin kal tơngah tơdroăng ki hơ-ui gum dêi vâi ki ê cho pá puih păng ‘nâng, xua mê, kal athế ai tơdroăng ki tơdâng, tơ’mô, vâ tơdâng tơ’mô, mê tơdroăng cheăng kâ thế tro ƀă tơdroăng pơkâ. Ki má péa nếo, vêh mơnhên xiâm rêi dêi kế tơmeăm pêi lo tŭm têk vâ khu mơdró tơveăng gum Khu ngăn ‘na pêi cheăng tơrŭm. Drêng hiăng châ mê Khu ngăn ‘na pêi cheăng tơrŭm kô ai mơngế ki thăm mơdêk ivá cheăng dêi Hô̆i đong pơkuâ ngăn ƀă mơ’no dêi liăn ing kơtong tơná”.

 Ƀă mâu tơdroăng ki pơhlêh nếo ‘na túa cheăng, troăng hơlâ dêi Chin phuh tung hneăng ki nếo, khu ngăn ‘na pêi cheăng kâ mơngế krâm, khu ngăn ‘na pêi cheăng tơrŭm ôh tá xê to “khu ki ‘ro” xếo, mê ga kô chiâng môi “kơmâ tơdjêp” ki kal tung tŭm têk tơdroăng cheăng kâ krê pá kong. Drêng “kơmâ tơdjêp” dêi Khu ngăn’na pêi cheăng tơrŭm châ tŏng veăng tro tơdroăng mê kô chiâng ai ivá ki kal thăm mơdêk, khu tơrŭm cheăng dêi kơvâ ngăn ‘na chiâk deăng Việt Nam mơnhông krá tơniăn, ing mê, tơveăng gum mơnhông rêh kâ ối, mơdêk pêi lo liăn ngân ăm kuăn pơlê pêi chiâk pêi deăng a tơnêi têa pin.