A Hâi ki Po Mơdĭng mê, kuăn pơlê ƀă tơmối châ ngăn, châ hlo  hên mâu tơdroăng rơkâu xối, tơdroăng ki xah hêi ro dêi Têt Bunpimay trối tĭng pleăng Tắc-bạt, mơhum Xeăng Phop, ƀá prế a nhái kŏng, tơbêng prêi pro thôt, kơ’nê reăng on a têa, kơxế têa rơkâu pâ tơdroăng pon mơhúa. Kố cho mâu túa ki pro vâ pói tơngah ai tơdroăng ki krúa lĕm, rơkâu pâ tơdroăng tơniăn lĕm ƀă tơbêng i hiâm mơno ki pêng păm tơdroăng ki pon mơhúa ăm hơnăm nếo.

Ƀă hên rơpŏng mơngế Lếo ki rêh ối ton hơnăm a Buôn Đôn, Têt vâi krâ roh nah ôh tá xê to roh ki vâ châ trâm mâ, hơniâp ro mê ối cho túa ki vâ rak vế khôi túa, vêa vong dêi chal vâi krâ roh nah. Jâ Khăm Bo Lào, ối a buôn Trí, cheăm Ƀuôn Đôn ai tối tiah kố:

“Á lăm rơkâu, pleăng reăng, plâi, kơƀăn kĕo ƀă môi iâ kế tơmeăm vâ ăm mâu sư thái vâ rơkâu ivá, tơdroăng rêh kâ ối hơniâp ro ăm dêi rơpŏng hngêi. Á xuân lăm mơhum um xeăng Phop vâ rơkâu pâ tơdroăng ki tơniăn lĕm ăm dêi rơpŏng hngêi, kuăn cháu”.

Pakĭng mê, mâu tơmối ối châ troh ngăn, troh hlo ki hơniâp ro, ki kơdrâm kơdrĕng dêi leh xah hêi ro, ai kơhnhon xuăng Lăm Vông, túa kơhnhon xuăng Chăm-pa, mơdưĭng ting tông Apía Rơnó Hơngui Nang Sangkhane, leh xah hêi kơhnhon xuăng drô troăng kơphô̆; veăng pêi pro mâu tơdroăng ki xah ôm hêi ƀă rui, châ ngăn tơdroăng ngê̆ thuât hơdruê xuăng ƀă tơ’noăng pế pơchên hmê kơchâi. Nâ Hoàng Thúy Lư, ối a bêng Ea Kao, kong pơlê Dak Lak tối ăm ngin ‘nâi:

“Hâi kố, á troh a Ƀuôn Đôn ƀă veăng hơniâp ro hâi Têt dêi mơngế Lếo. Á tâ, á hlo tơdroăng kố hơniâp ro ƀă hâk tơngăm khât ‘na khôi túa, vêa vong dêi hdrông mơngế Lếo a Ƀuôn Đôn. Á tâ tơxâng hâk vâ khât mâu ếo pơtâk tiô khôi hmâ kố, mâu tơdroăng xah hêi Têt akố á mơnâ mâ, tâ hơniâp ro khât drêng châ kơxế têa, rêm ngế châ xah hêi kơxế têa hơniâp ro, sôk suâ ó păng ‘nâng”.

Ƀuôn Đôn, tiô nâl dêi mơngế Lếo cho “pơlê rơlố tơdế têa”, cho pơlê ki ối akố hiăng ton ing nah dêi lối hrĭng mơngế Việt Nam, la xiâm rêi ing kong têa Lếo, tơkŭm rêh ối a kong pơlê Dak Lak.

Tiô pôa Nguyễn Cảnh Tùng, Kăn hnê ngăn Vi ƀan cheăm Ƀuôn Đôn tối ăm ngin ‘nâi, klêi kơ’nâi tơmot mâu cheăm bêng, lâp cheăm ai 15 khu hdrông kuăn ngo rơtế rêh ối, tung mê, ai lối 400 ngế xiâm rêi cho Lếo. Tơdroăng ki pơtối rak vế Têt Bunpimay ôh ta xê to kal châ rak vế khôi túa lĕm tro dêi kuăn pơlê mê ối cho vâ mơjiâng tíu ki trâm mâ, tơpui tơno, rơtế mơnhông ‘na tơrŭm dêi pó, thăm mơdêk vâ mơnhông pêi cheăng kâ-rêh ối pơlê pơla.

“Pơlê pơla dêi mơngế Lếo akố ai dâng 400 ngế ki rêh ối a cheăm Ƀuôn Đôn. Kố cho khôi túa, vêa vong dêi hdrông mơngế Lếo ki châ rak vế hiăng ai sap ing ton nah. Rêm hơnăm, ngin xuân hmâ tơkŭm po hâi leh Têt ăm mơngế Việt Nam xiâm rêi Lếo ki rêh ối akố vâ ing mê, mơjiâng hiâm mơno ki tơrŭm tơrôa pơla mâu hdrông kuăn ngo tung pơlê pơla a mâu pơlê cheăm, tơveăng gum, rơtế veăng dêi pó tung mơnhông pêi cheăng kâ-pêi lo kế tơmeăm, rêh ối pơlê pơla a lâp cheăm Ƀuôn Đôn”.