A plông kân dêi thôn Như Ngọc, cheăm Phước Hữu, kong pơlê Khánh Hòa, ai hrĭng ngế droh rơtăm kuăn ngo Chăm tung pơlê sap dêi ếo pơtâk kuăn ngo tơná tiô khôi vâi krâ nah veăng xuăng tơkŭm  pú hên tiô idrâp dêi hơkâ Paranưng ƀă Khiê̆n Saranai hơniâp ro.  Mâu ƀai hơdruê, mâu tơdrá ki chuât mê hiăng pro vâ mơhno tơbâ tơdroăng rêh ối, pêi cheăng kâ dêi kuăn pơlê mơngế Chăm, sap um méa pôu báu, pơchoh klâng, teăn hmôu jiâ troh mâu túa kơhnhon xuăng tiô chal krâ nah ki lĕm ro. Veăng xah hêi ƀă tơmối ki veăng mơdĭng kơdrâm kơdrĕng, jâ Đàng Thị Hơi, cheăm Phước Hữu, kong pơlê Khánh Hòa  tối:

“Mơdĭng hơnăm kố châ tơkŭm po sap ing go pơlê troh mơ’nui pơlê hơniâp ro, lĕm krip ‘nâng. Hên mâu ƀai hơdruê xuăng hmâng hơniâp ro, mâu ngế hơdruê xuăng xuân hâk ro bro dêi châ tơná rơmuăn drêng hơdruê, xuăng hâk vâ mơđah khât ăm mâu ki tơmâng ngăn”.

Raja Nagar cho mơdĭng tơdah ro mot hơnăm nếo dêi mơngế Chăm, ƀă hên mâu tơdroăng pro mơdĭng rơkâu pâ kong mêi tro tô ‘lo, báu prá alâi pêt xông mo dâi lĕm tơdroăng rêh ối dêi kuăn pơlê tơniăn ro, sôk suâ.

Rêm pơlê Chăm tơkŭm po mơdĭng tung 2 hâi ƀă mâu tơdroăng pro mơdĭng, xối xeăng rơkâu pâ tiô túa tơlá vâi krâ  nah, la tung pơla tơkŭm po xuân ai tíu ki pơrá phá, mê cho tơdroăng pro mơdrĭng hmâ po ton hâi tung kuăn pơlê. Nâ Trần Thị Dung, tơmối lo ing Hà Nội tối:

“Á hiăng veăng pêi ngăn hên hâi pro mơdrĭng a mâu kơpong sap peăng kơnhŏng troh peăng Hdroh la kố cho hâi mơdĭng  dêi kuăn ngo Chăm ki tơviah krê xêh. Mê cho tơdroăng tơrŭm môi tuăn dêi kuăn pơlê, pơ-eăng túa lĕm tro dêi pơlê. A hlo lĕm tơviah, mơnê khât, phiu ro châ veăng ngăn pro mơdĭng a kơpong tơnêi ki kố”.

 Mơdĭng Rija Nagar cho tíu ki ối rak hên túa mơđah hơdruê pú hên ki ro tơviah dêi kuăn pơlê mơngế Chăm, sap ing ƀai hơdruê, ing tơdrá prôa, túa kơhnhŏn xuăng troh mơdĭng tơbleăng tiô khôi hmâ. Kố cho rôh ki vâ mơhno kơnía git túa lĕm tro ton ing nah pơtối rak vế hlối hnê ăm hên mâu rơxông kơ’nâi. Pôa Lưu Sanh Thanh, Phŏ ngăn tơdroăng khôp Phop, cheăm Phước Hữu, kong pơlê Khánh Hòa ăm ‘nâi:

 “Mơdĭng hơnăm kố hâi lơ 1/1 tiô Lĭt Chăm klăng a hâi lơ 16/4 riân tiô mâ hâi, xuân cho hơnăm tơbâ hâi châ tơleăng kong pơlê Ninh Thuận ton nah, kuăn pơlê hâk phiu ro. Đảng, Tơnêi têa pơla mâu hâi hdrối kô nah hiăng tơmâng khât hên troh tơdroăng rêh ối kuăn pơlê. Ngin púi vâ hâi leh mơdĭng Rija Nagar pơtối châ rak vế ƀă rĕng châ chêh ‘mot tung inâi ‘măn mâu túa lĕm tro ki kơnía git dêi tơnêi têa”.

Mâu idrâp hơkâ Paranưng ƀă idrâp khiê̆n Saranai chuât têi xơtó rêm rôh mơdĭng, rơtế tơdjuôm ƀă rak vế tung tuăn ngôa túa lĕm tro kuăn mơngế Chăm. Ƀă mâu tơdroăng pro mơdĭng môi tiah mơdĭng Rija Nagar, khôi túa, vêa vong Chăm châ pơtối rak vế, tơbleăng rak vế, pêi pro tung rêh ối kuăn pơlê dế nôkố./.