Ki nhên, tung 4 tơdroăng tơkêa bro kố, ai 3 tơdroăng tơkêa bro on tơhrik ki kơtâu ƀă mâ hâi ƀă 1 tơdroăng tơkêa bro on tơhrik kơtâu ƀă khía, ai tâi tâng ivá on tơhrik 230MW, tiô tối hdrối châ pêi pro a cheăm Ia Le ƀă moi iâ cheăm Chư Pưh. Khu râ kăn pơkuâ cheăm Ia Le ƀă cheăm Chư Pưh pôu râng hnoăng cheăng chêl thiê̆n, tŏng gum, vêh xĕn ối ƀă tăng ƀăng tơnêi gum ăm tơdroăng tơkêa bro.

Vi ƀan kong pơlê Gia Lai xuân pơkâ mâu khu mơ’no liăn cheăng tiô pơkâ luât ‘na mơ’no liăn cheăng, mơjiâng, tơnêi tơníu ƀă kong prâi; tơniăn kơxô̆ liăn, xúa kơmăi kơmok châ tiô pơkâ kih thuât ƀă ôh tá chiâng ăm dêi pó troăng tơkêa drêng tá hâi châ kơ koan ai hnoăng môi tuăn.