Ai lối 1 ha plâi sầu riêng dêi rơpŏng pôa Nguyễn Thị Hồng, cheăm Ea Knuêč, kong pơlê Dak Lak dế mot tung rơnó lo reăng, cho roh ki kal tung tơdroăng ki vâ ai plâi kơtốu, tơxâu plâi. Méluâ ti mê, kong tôu mơdrăng tiah kố, mê rơpŏng jâ athế pơhlêh tâi tâng túa ki tôh têa trối ahdrối mê hía nah. Jâ Hồng ai tối tiah kố:

“Kong tô mơdrăng khăng khoăng tiah kố ngin athế riu a kơxo má ing 3 chôu lo lăm ngăn dêi chiâk deăng, klêi tôh têa dâng 8 troh 9 chôu kơxo ngin pơtê. Xua lối tôu luâ râ, ôh pa kâi, tơbrê tơbrêh, kuăn pơlê pêi chiâk xahpá ó khât”.

Ôh ta xê to rak ngăn plâi sầu riêng, mê mâu hdrê loăng ki ê, tung mê, ai 210.000 ha loăng kơphế, ai vâ chê 29.000 ha xiâm kơxái tiu xuân dế trâm hên tơdroăng pá ki kân xua ôh tá bê têa tôh. Hên kuăn pơlê hiăng hbrâ pơhlêh túa tôh têa ki lối hên trối hdrối mê hía nah, pơhlêh tôh tiô túa ki kơdĭng, tôh cho chôa, tôh lo têa i iâ, la pro ăm xiâm loăng đi đo hngiâm kơchoh tŭm. Pôa Nguyễn An Sơn, ối a cheăm Čư̆ Mgar tối ăm ngin ‘nâi, rơpŏng pôa hiăng krâ dêi kơmăi ki tôh têa ing péa hơnăm kố, gum kơdroh ki mơ’nhê 1/3 kơxô̆ têa tôh tâng vâ pơchông ngăn ƀă ahdrối nah.

“Pơhlêh ôh tá xê trối ahdrối nah, pin tôh têa ƀă klŏng triăng ki kân, laga mơdoh hên chôu phut, hâi khế ó ‘nâng. Dế nôkố, khu kơmăi ki tôh têa kơdĭng mê pơtối châ rak dêi têa, rế kodroh mơngế pêi cheăng, tơdroăng pêi cheăng kâ xuân châ rơhéa, pêi lo kế tơmeăm tâk hên luâ tâ”.

Tơdrêng ƀă tơdroăng ki hbrâ tơdroăng pêi pro dêi kuăn pơlê, khu kăn hnê ngăn ƀă kơvâ cheăng ki ngăn ‘na pêi chiâk deăng xuân hiăng pơkâ pêi pro hên troăng hơlâ vâ hbrâ mơdât tơdroăng ki khăng khoăng têa, tôu mơdrăng ton hâi, ah thăm rế pro khăng kho. A mâu cheăm, mâu hno têa, thông têa pơrá hiăng châ ‘mâi rơnêu, châ hrik mơ’no têa tro tơdroăng; tơdrêng amê, hnê mơhnhôk kuăn pơlê xúa, dâi têa athế ‘nâi kơdĭng, tôh têa tro tơdroăng. Pôa Nguyễn Văn Kiên, Phŏ ngăn ‘na Tíu xiâm ngăn ‘na chêh bro hlá mơ-éa dêi cheăm Ea Knốp, kong pơlê Dak Lak tối ăm ngin ‘nâi:

“Vi ƀan hnê ngăn cheăm hiăng pơcháu ăm khu ki hnê ngăn ‘na cheăng vâ séa mơnhên ngăn tâi tâng hno têa, thông têa vâ klâ xing xoăng têa tro tiô tơdroăng. Tơdrêng amê, hnê mơhnhôk kuăn pơlê dâi têa tro tơdroăng, xúa kơmăi tôh têa ki chiâng kơdĭng vâ rak vế tơniăn ai bê têa ki vâ tôh klâng chiâk tung rơnó ki tôu mơdrăng khăng khoăng”.

Tiô tơdroăng tối tơbleăng, a kong pơlê Dak Lak kong xuân ối tô mơdrăng khăng khoăng, mơni kô ôh tá bê têa vâ tôh ăm klâng chiâk, ki rơhêng vâ tối, a mâu kơpong ki hơngế ing kơnhŏng têa lơ khu hno têa, thông têa tá hâi teăm bê têa toh. Jâ Đặng Thị Thuỷ, Phŏ hnê ngăn na Chiâk deăng ƀă Hyôh kong prâi dêi kong pơlê Dak Lak tối ăm ngin ‘nâi, kong pơlê hiăng hbrâ mâu troăng hơlâ ki vâ ví ing tơdroăng ki tro tô mơdrăng khăng khoăng, tơkŭm pêi chiâk pêi deăng tro tơdroăng vâ khoh bê têa tôh:

“Mâu khu râ, kơvâ cheăng dế tơrŭm tí tăng mơnhên ngăn vâ hlê plĕng nhên hyôh kong prâi tung rơnó Xeăng Tôu ƀă hâi khế ki tơtro la ngiâ vâ klâ xing xoăng têa ăm i tơtro. Tơdrêng amê, hbrâ vâ pêi chiâk pêi deăng a rơnó Xeăng Têa, hnê tối vâi krâ-nhŏng o ‘mâi rơnêu, pơhlêh mâu hdrê loăng ki pêt tro tơdroăng ƀă tơnêi, hyôh kong prâi, bê têa tôh. Pakĭng mê, pơtối séa mơnhên ngăn mâu long, rơchôa têa, hbrâ mơdâ pêt mâu hdrê loăng, hbrâ têa i tŭm vâ tơ’lêi tung tơdroăng ki pêi chiâk pêi deăng ƀă xúa tơdroăng rêh kâ ối”.