Pơla kong tô téa a kong kế, ngo ngối Trường Sơn, sap ing kơxo má ối ai inoâ lâm, tơrêm khu mơngế lo ing mâu pơlê dêi tơring Kà Lừm, kong pơlê Sekong, Lếo, kơpong achê tíu tơkăng kong dêi cheăm Hùng Sơn, Pơlê kong kân Đà Nẵng (tơring Tây Giang, kong pơlê Quảng Nam ton nah) hiăng krếo djâ dêi rơpó lăm troh a thôn A Tu 1, cheăm Hùng Sơn môi tiah vâi prôk lăm ngăn hâi leh mơdĭng. Tơrêm khu mơngế ing pá tá tíu tơkăng kong, ngế ki lâi xuân rơnuâ hmân ếo pơtâk lĕm má môi.

Ngiâ méa ngế ki lâi xuân ro rih, vâi tơpui tó, tơpui tơno ƀă dêi rơpó dế kong ối tô há. Ai mâu ki ‘nâ djâ mâu hiăng krâ, djâ dêi kuăn ‘nĕng ối kŭn. Ai ngế ki ‘nâ pôu dêi pong tâ tơmeăm hdroăng dêi pơlê… Pôa Savandi phiu ro tối, tâng tối a cheăm Hùng Sơn tơkŭm po Têt Bunpimay, kuăn pơlê brôk dêi rơpó prôk chêng lăm troh pôu veăng xah hêi ro.

“Hơnăm ki lâi xuân trối mê, drêng troh hâi Têt Bunpimay, kuăn pơlê tung pơlê xuân púi vâ châ veăng hêi ro… Troh akố ngế ki lâi xuân tâ hơniâp ro, tơtô tung hiâm mơno. Kố cho Têt dêi jâ nôa tơná ing nah, la mâu vâi pú Việt Nam tơkŭm po krâu lĕm, ro rih ‘nâng môi tiah Têt tiô khôi hmâ dêi vâi pú mê há.  Troh akố châ trâm, tơpui tơno ƀă nhŏng o, châ kâ ôu, xah hêi ro, tơdah Têt hơnăm nếo rơtế ƀă dêi rơpó… ro môi tiah Têt dêi a hngêi há”.

A cheăm Hùng Sơn, mâu kơchâi kâ tiô khôi hmâ roh nah dêi mơngế Cơ Tu xuân châ hbrâ tŭm, pêi pro tá hiâm mơno, hlế rơkê kơ tơmối kuăn ngo. Pôa Plong Rang, Kăn hnê ngăn Chi ƀô̆ thôn A Tu 1 phiu ro tối, ngế ki lâi xuăn ngăn mê cho tơdroăng pêi pro tơdjuôm dêi pơlê, ôh tá êa krếo ngế ki lâi xuân xông pêi xêh hnoăng cheăng, veăng ‘no dêi hnoăng cheăng tơná.

“Pro hơpăm, hơkôp, hbrâ pro plông hơdruê; thế kuăn pơlê kriê kơchâi, lâk pôm loăng vâ pế pơchên mâu kơchâi, kế kâ tiah hmâ ing nah ăm mâu ki troh veăng hêi ro Têt Lếo vâ i kâ. Mâu kơchâi, kế kâ mê cho hơ’nêh mâm chu, mâm í, ká, tơxông prông, kơƀăn kái kơpôu châ hbrâ vâ tơdah vâi krâ nhŏng o kong têa pú hmâ. Hâi mê ai kơdrâm mơngế, hên mơngiơk ki bâ eăng lĕm, ro rih păng ‘nâng”.

Hâi mơ’nui măng tĭng ai rơpâu ngế lo ing pơlê dêi tơring Kà Lừm, kong pơlê Sekong djâ tơdroăng phiu niu, ro rih Têt Bunpimay pro hơniâp ro lâp lu kong kế, ngo ngối tíu tơkăng kong Hùng Sơn. Tâng to idrâp tơpui tó nâ ƀă idrâp tơdrá chuât dêi khu prôa hơkâ a tơdế kong ngo. Mâu tơdroăng xah hêi môi tiah vâi krâ nah mê cho xah tơhrot kơxái, to chĕng klĕng, kơ’nŏng tơdúa kơxâk ƀă hên tơdroăng, tơ’mot krâm kuăn pơlê péa pâ tíu tơkăng kong rơtế veăng xah hêi ro, têa kŏng, tríu hâk.

Ki vâ tối dêi hâi mơdĭng mê cho Kơchơ Têt Bunpimay  tơrŭm tơrôa a tíu tơkăng kong Việt Nam - Lếo. Amê, kuăn pơlê ôh ti xê to lăm kơchơ tê rôe kế tơmeăm mê ối châ “tơdah Têt’’ ƀă kâ mâu kơchâi kế kâ hmâ pơchên tiô túa vâi krâ nah. Mâu tơmeăm ăm mê cho phái, xup kơxŏng khăng, ká măm khăng, hmân ếo nếo ƀă hên tơmeăm ki ê, mê ai tá drê, vok, ‘nêk, mâu tơmeăm xúa ki hmâ hlo rêm hâi tung rêh ối, châ pơcháu a kŏng kuăn pơlê môi tiah tơmeăm Têt tuăn i hiâm mơjo pâ dêi rơpó.

Đăi tă Hoàng Văn Mẫn, Chính ủi Khu pơkuâ ngăn Mố đô̆i Gak tíu Tơkăng kong Đà Nẵng tối, mâu tơmeăm ki kơnía mê, cho tơmeăm pêi lo ing ivá dêi kuăn pơlê, troh mâu tơdroăng mơhno túa lĕm tro, tơ’noăng ivá… xuân pơrá veăng gum ăm peăng kuăn pơlê  dêi mơngế Lếo môi tiah mơngế nhŏng o tơná.

“Tung rôh Têt Lếo lơ Têt Việt Nam, ngin xuân tơkŭm po vâ kuăn pơlê rơtế veăng châ pêi pro, xah ôm hêi; kuăn pơlê Lếo châ phiu ro drêng tơkŭm po Têt Việt Nam, ƀă kuăn pơlê Việt Nam xuân châ sôk suâ a hâi Têt dêi Lếo. Mâu hơnăm hdrối, tuăn pâ dêi rơpó pơla kuăn pơlê péa pâ tíu tơkăng kong, mâu lêng kring vế tíu tơkăng kong, mâu kăn hnê ngăn péa pâ tíu tơkăng kong hmâ, hlê, achê ƀă dêi rơpó, veăng tơrŭm mơjiâng, kring vế, gak ngăn tíu tơkăng kong ki tơniăn, hơniâp ro, tơrŭm tơrôa dêi rơpó”.

A tơdế kong ngo Trường Sơn, Têt Bunpimay hơnăm kố tơ'nôm môi rôh nếo tơdjêp mâu hvêa chêng prôk dêi péa pâ tíu tơkăng kong. Mâu kơpeăng kŏng kuâ râng dêi rơpó, mâu rơkong tó trâm dêi rơpó lĕm ro, phiu niu tung hiâm mơno.