Sap mơ’nui khế 3/2026 troh nôkố, kong tô pơ-oh ton hâi hiăng pro 757 ha báu xeăng tôu a mâu klâng ‘na hdroh dêi mâu cheăm Hòa Thịnh, Hòa Mỹ, Tây Hòa ƀă Phú Hòa 2 ôh tá bê têa. Hơnăm nah, kong mêi têa lân lu pro tơ’nhiê mâu rơchôa kâng têa, thông mơ’no têa mê rơnó mơdâ pêt báu xeăng tôu hơnăm 2025-2026 chiâng hrá tâ 1 khế tâng vâ pơchông ƀă rêm hơnăm, pro báu hrá xôk ƀă xôk klăng a khế ki tô mơdrăng ó.

 Vâ tŏng gum báu, rêm hâi hlối tung 10 hâi kô nah, Kŏng ti pêi cheăng tiô rơnó Môi tung khu ngăn rơchôa Đồng Cảm hiăng rơtế po 7 tíu kơmăi hrik mơ’no têa. Tơdrêng ƀă mâu tíu hrik têa ki hmâ, kơmăi hrik têa ki pêi cheăng oh tá pơtê hiăng pêi cheăng rêm hâi. Têa a mâu kroăng châ hrik hên vâ toh tơ’nôm a mâu ƀăng klâng. Pôa Nguyễn Văn Nhành, Phŏ pơkuâ Kŏng ti pêi cheăng tiô rơnó Môi tung khu ngăn rơchôa Đồng Cảm ăm ‘nâi:

“Ƀă mâu klâng ki ôh tá ai têa tôh kơpêng 700 ha cho ƀăng klâng ki xua ing rơchôa peăng hdroh tối, troăng hơlâ pêi pro cho hrik têa tôh ăm teăm vâ pôi tá tơdjâk troh ki xông lĕm dêi báu. Tiô tối hdrối sap nôkố ta troh mơ’nui khế 4 kong rế tô ó mê măng tĭng kố ƀă măng tĭng kơ’nâi ah nếo cho rôh ki hơkăng, mê kŏng ti xuân tơkŭm hrik têa toh rêm hâi, drêng mê báu ki xôk hiăng kâ têa tôu, kŏng ti kô kơdroh nếo hrik toh báu”.

Vâ tơdroăng tôh têa pêi pro châ tơbrê, mâu khu ngăn rơchôa gak plâ hâi măng, môi pâ vâ po ngăn kơmăi a mâu tíu hrik têa vâ kơdroh khăng khoăng, môi pâ tơrŭm ƀă mâu ngế cheăng ngăn rơchôa dêi khu pêi cheăng tơrŭm chiâk deăng thế mơ’no têa ăm tơtro tiô tơdroăng mơ’no ing hơngế troh achê; kơdroh tơdroăng kuăn pơlê tô tuăn ah lơ hrik xo xêh têa, ah lơ pro  ôh ta tro tơdroăng pơkâ mơ’no kơdĭng têa. Pôa Đặng Quốc Hoàn Khu ngăn rơchôa kơpong Hòa Đồng, Hòa Mỹ tối:

“Mơdât xía vâ xua kong tô mơdrăng mê mâu nhŏng o ngin thế gak ngăn rêm hâi vâ po kơmăi mơ’no plâ hâi măng hrik têa djâ troh a mâu ƀăng klâng ki a ‘ngêi, klâng ki hơngế ing rơchôa dế kal têa tôh”.

Mơni kong tô mơdrăng rế ó tâ a mâu kong ngo peăng mâ hâi lo kong pơlê Dak Lak, mê ai hên long kơdoăng têa rế xiâ. Vâ chê 1 khế kố nah, tung 5 hâi, kô ai mâu rơpŏng kuăn pơlê a thôn Hòa Sơn, cheăm Sơn Hòa thế lăm a klâng ăm kơmăi hrik têa, hrik ing kloh ki khuăng vâ tôh dêi báu ki hiăng răng.

 Tiô kuăn pơlê, têa a long ôh pá ai xếo, bu tăng troăng khuăng têa kloh vâ hrik têa toh báu mơhé hiăng ‘nâi pro ti mê ‘no liăn hên.

“Hiăng hrik têa tôh môi rôh, nôkố hrik rôh ki kố nếo cho rôh má péa, tâng ôh báu kô ôh tá chiâng xôk, tá ai báu” .

Hlo kong tô ó môi tiah nôkố, Khu xiâm ngăn chiâk deăng ƀă Hyôh kong prâi kong pơlê Dak Lak hiăng pâ thế mâu kơ koan, tíu pêi cheăng lăm ngăn, tối vâ ‘nâi nhên tơdroăng ‘na têa a mâu rơchôa xuân tơbleăng tăng troăng vâ pêi, pơkâ xúa kơnhŏng têa ai pơxúa ‘nâi kơdĭng, tơtro, tơniăn ƀă tơdroăng kal vâ têa dêi tơrêm kơpong, tơrêm tíu, malối cho a mâu kơpong ki tơ’lêi khăng khoăng, ôh tá bê têa; hlối ai troăng hơlâ pêi cheăng ăm tơtro vâ kơdroh tro lŭp xua kong tô mơdrăng pro.