Pơtối mê, kơxô̆ tơnêi mơ’no ing Tơdroăng tơkêa bro troăng kân ăm phêp rơxế kơtâu têi Khánh Hòa – Buôn Ma Thuột dâng 30.000 m3, nôkố dế tơkŭm a ‘núa hvât tơmeăm lo pakong kơxô̆  (cheăm Vụ Bổn). Tơdroăng pơto tơnêi mơ’no lo pakong kố vâ xúa tơbêng troăng to a kông kuăn pơlê prôk lăm Krông Bông châ rah xo xua troăng pơto ôh tá hơngế tâng pơchông ƀă ‘núa ki ê.

Nôkố mâu tíu cheăng ki tơdjâk dế pêi kêi đeăng mâu hlá mơ-éa vâ mơ’nui khế 4 kố, mâu khu ki mơjiâng pro kô pêi pro tơdroăng ki pơto tơnêi ƀă tơbêng tơnêi. Kông kuăn pơlê prôk lăm Krông Bông ối tung tơdroăng tơkêa bro rah xo, tơniăn xĕn kuăn pơlê ki rêh ối hmâng vâ a cheăm Vụ Bổn (tơring Krông Păch ton). Kông ki xiâm hiăng kêi đeăng sap mơ’nui hơnăm 2023. Laga, xua ối trâm pá mâu rơpŏng kuăn pơlê tá hâi xĕn ƀă ôh tá tŭm tơnêi vâ tơbêng troăng prôk xua mê troh nôkố kông xuân tá hâi ăm xúa. Khu mơ’no liăn pro ƀă khu râ kăn pơkuâ cheăm tơkŭm rơnêu tơdroăng ki pá, mơ-eăm, djâ kong tung xúa sap ing khế 6 hơnăm kố.