Tơdroăng tơkêa bro ai tâi tâng ki xŏn lối 48,4 km, châ pro ki hên tiô pơkâ troăng râ má ƀă má IV kơpong kong ngo. Ngiâ troăng kân rơdâ 9m, ki apêng troăng kân ƀă ƀê tông chá kơxu ƀă ƀê tong, xơmong. Tơdroăng tơkêa bro xúa kơxô̆ liăn ngân Tơnêi têa dâng 2.000 rơtal liăn ƀă liăn ngân kong pơlê dâng 350 rơtal liăn. Tíu pêi pro a mâu cheăm Ba Tơ, Ba Tô, Ba Dinh, Ba Vì ƀă Kon Plông, kong pơlê Quảng Ngãi. Hâi khế pêi pro tiô tối hdrối sap hơnăm 2026 troh hơnăm 2028.

Tơdroăng tơkêa bro châ pói tơngah mơnhông hnoăng tơdjêp kơpong peăng mâ Hâi Lo kong pơlê Quảng Ngãi ƀă mâu kong pơlê kơpong tơbăng peăng hdroh pá tơdế tơnêi têa ƀă Tây Nguyên, ƀă mâu kơpong cheăng kâ, kơno têa kơxĭ kân môi tiah Chu Lai, Dung Quất; tơdrêng amê mơdêk trâm mâ mơhno khôi túa lĕm tro, mơnhông ôm hyô a mâu kơpong môi tiah Măng Deang, tíu tê mơdró ngi kong têa ê lâp plâi tơnêi Bờ Y.