A roh tơdah, pôa Lê Minh Hưng, Ngế pro xiâm hnê ngăn tơnêi têa nhuô̆m hdrối tơdroăng tơmâng tŏng gum dêi pơlê pơla khu tê mơdró Mih ƀă kơchơ mơdró Việt Nam, ngăn kố cho mơnhên ăm roh tơ’lêi tơrŭm cheăng kâ, tê mơdró ƀă mơ’no liăn cheăng rế hía rế trâu rơdâ pơla péa tơnêi têa. Tối rơdêi pơkâ mơnhông cheăng kâ rĕng laga thế krá tơniăn, xo pơkâ mơdêk tơdroăng rêh ối kuăn pơlê pro ki xiâm, Ngế pro xiâm hnê ngăn tơnêi têa tối ăm ‘nâi Việt Nam tơkŭm pro krá tơniăn tơdroăng ki pơkuâ xêh troăng pêi cheăng ton xŏn ƀă pơhlêh troăng pêi tơtêk tiô khoa hok kŏng ngê̆, pơhlêh nếo tơmiêt pêi rơkê ƀă pơhlêh xúa kŏng ngê̆.

Việt Nam tơkêa tah lôi tíu ki mơdât, kêi đeăng pơkâ pêi ƀă troăng hơlâ vâ mơjiâng tơdroăng ki lĕm tro má môi ăm tâi tâng mâu khu mơ’no liăn cheăng kong têa, ki rơhêng vâ tối cho khu tê mơdró Mih. Mơnhên Mih cho khu tơrŭm ki kal má môi, Ngế pro xiâm hnê ngăn tơnêi têa pói vâ mơdêk tơrŭm cheăng Khu tơrŭm cheăng ton xŏn tâi tâng Việt Nam – Mih prôk pêi păng ‘nâng, xua pơxúa dêi kuăn pơlê ƀă khu tê mơdró péa tơnêi têa, veăng gum ăm hơniâp lĕm ƀă mơnhông mơdêk krá tung kơpong.