Kŏng ti lo liăn pro meăm Thép Hòa Phát Dung Quất cho môi tung mâu khu mơdró kâ ki kân, xúa hên ngế pêi cheăng ƀă veăng gum ka khât tung thăm mơnhông cheăng kơmăi kơmok dêi kong pơlê Quảng Ngãi. Nôkố Kŏng ti ai 3 tơdroăng tơkêa bro dế pêi cheăng a kong pơlê Quảng Ngãi, mê cho: Kơpong tơkŭm mơjiâng pro meăm thep Hoà Phát Dung Quất 1; Kơpong tơkŭm mơjiâng pro meăm thep Hòa Phát Dung Quất 2; tơdroăng tơkêa bro kơno tuk tơkŭm mâu container Hòa Phát Dung Quất dế rế hía rế hiăng vâ pro klêi.

Pôa Hoàng Ngọc Phượng, Phŏ pơkuâ Kŏng ti tơlo liăn pro meăm Thép Hòa Phát Dung Quất ăm ‘nâi, sap ing khế 1 troh khế 3 hơnăm kố, meăm thép ki mơjiâng pro dêi tíu pêi cheăng kố pro châ 692 rơpâu tâ̆n. Khu mơdró kâ dế pơtối mơdêk pro meăm tung pơla sap ing khế 4 troh khế 6. Vâ mơdêk thăm mơnhông cheăng kơmăi kơmok dêi kong pơlê.

“Tíu pêi cheăng kố tơtrŏng tơkŭm mơjiâng pro, tê mơdró rơkê ƀă thăm mơnhông pơkuâ ngăn kơxô̆ liăn ‘no hrê; tơtrŏng ‘no liăn roê kơmăi kơmok, tơmeăm xúa, ứng dụng khoa hok, kong ngê̆, pơhlêh kơxô̆, vâ ăm gá dâi lĕm dêi meăm, tơmiât troh tơdroăng pro tơmeăm ki nếo, tơmeăm lĕm, ki tro ƀă kong prâi tơnêi tơníu ƀă pêi châ tơdroăng púi vâ mơnhên dêi kong têa ê. Kŏng ti xuân rơkê tung mơjiâng pro, tê ngi kong têa ê, mơdêk têi cheăng mơjiâng pro tro ƀă mơjiâng inâi dêi tơmeăm”.

Sap ing khế 1 troh khế 3 hơnăm 2026, thăm mơnhông GRDP dêi kong pơlê Quảng Ngãi châ 8,24%. Kơpong cheăng ƀă kơmăi kơmok pơtối cho cheăng ki djâ troăng ahdrối, veăng gum lối tơdế kơlo tâk tơdjuôm: kơvâ cheăng uâ pơliê, mơjiâng pro rak a kơlo tâk péa kơxô̆. Kơpong tê mơdró xuân ‘mâi mơnhông, tâi tâng kơlo tê ‘ngré tơmeăm ƀă kơxô̆ liăn châ xo tâk lối 15%; ôm hyô hlo mơnhông; tê tơmeăm ngi kong têa ê tâk péa kơxô̆. Kố cho mâu tơdroăng ki tơƀrê, pro chiâng ivá vâ kong pơlê pơtối tơbleăng mâu troăng hơlâ mơnhông tung la ngiâ.

La tiah mê, kơlo kơxô̆ tâk ‘na cheăng kâ tá hâi tơdâng. Ối ai mâu kơvâ cheăng môi tiah chiâ xo tơmeăm khoăng tung kơdâm tơnêi, pro tơmeăm ƀă péa kơdroh; nâp liăn chu kơdroh tâng vâ pơchông ƀă khế kố hơnăm nah. Ki rơhêng vâ tối, ‘no liăn pêi cheăng tơdjuôm ối hrá, nếo bu châ lối 7% túa pơcháu, cho tíu kreăng ki kân kal lêi tah.

Kơpong pêi chiâk, pêt kong, păn ká xixŏng bu tâk dâng 3% xua kơxô̆ liăn ‘no tâk hên sap ing khế 3, hlối toi mâu yă tê tơmeăm, pơto chơ tơmeăm to kơnâ, kuăn pơlê kơdroh ‘no liăn pêi cheăng mơjiâng pro tơmeăm. Kơvâ pêt loăng tro tơdjâk xua rôh pơtê Têt ton hâi; tơnăng ká xi xŏng trâm pá xua yă têa châu têa kơxăng to kơnâ. A kơpong cheăng ƀă kơmăi kơmok, mơjiâng pro tơmeăm, kơmăi kơmok tâk 12,76%, ki hên cho kơnôm ing mâu kế tơmeăm ki xiâm môi tiah têa châu ƀă meăm thep. Pôa Võ Thành Nhân, Ngế xiâm riân ngăn tơmeăm khoăng kong pơlê Quảng Ngãi tối tiah kố:

“Kơvâ mơjiâng pro kế tơmeăm nôkố châ 4,9% tung tơdroăng pơkâ cheăng kâ; mơjiâng pro tơmeăm kơdroh 8,8% hiăng pro ki tâk dêi GRDP tung lâp kong pơlê kơdroh. Tiah mê, maluâ châ kơxô̆ ki hên, la kơlo kơdroh dêi kơvâ cheăng kố xuân ối tơdjâk hên troh mơdêk tơdjuôm”.

‘No liăn cheăng tơdjuôm pơtối châ mơnhên cho ivá cheăng ki kal mơdêk thăm mơnhông hơnăm 2026. Laga, tơdroăng ‘no liăn ối iâ, troh mơ’nui khế 3 bu nếo châ dâng 7,2% túa pơcháu. Kong pơlê Quảng Ngãi dế hnê mơhno kơtăng tơdroăng ki lêi tah mâu tíu tơvâ tơvâ, vâ thăm mơdêk rĕng tơdroăng ki ‘no liăn pro tơmeăm khoăng.

Tiô pôa Nguyễn Công Hoàng, Phŏ kăn hnê ngăn Vi ƀan kong pơlê Quảng Ngãi, tơdroăng ki ‘no luăn pêi cheăng tơdjuôm dêi kong pơlê ối hrá xua hên tơdroăng. A râ cheăm, hên cheăm bêng tá hâi hbrâ rơnáu tŭm tung tơkŭm pêi pro, rah xo tơdroăng tơkêa bro nếo teăng ăm xúa mâu kế tơmeăm hiăng châ chêh tung hồ sơ, chiâng hrá ‘no liăn. A râ kong pơlê, tơvâ ki hên cho cheăng chêl thiê̆n, xo tơnêi, mơnhên yă tơnêi ƀă hiâm mơno ối xâu, xâu xôi. Pôa Nguyễn Công Hoàng pơkâ thế mâu kơvâ cheăng, mâu cheăm pêi pro kơtăng tơdroăng ki lêi tah xơpá, malối cho tung kơvâ tơnêi tơníu ƀă rak ngăn kơxô̆ liăn, vâ mơdêk rĕng tơdroăng ki pro kế tơmeăm.

“Ƀă mâu tơdroăng cheăng ki pơkuâ liăn ngân, pơkâ thế Khu ngăn liăn ngân kong pơlê Quảng Ngãi hbrâ rơnáu, rơkê tung xing xoăng ƀă pơkuâ ngăn kơxô̆ liăn. Ki khât gá dế ối hlo a tơdroăng ki kế tơmeăm kal pro hên la kơxô̆ liăn vâ pro ôh tá ai vâ ‘no, tung pơla ai mâu kơxô̆ liăn la tá hâi chiâng vâ xúa. Tơdroăng pơkuâ kal châ séa ngăn tŭm têk, malối cho tung pơla nâp liăn ngân sap ing liăn xúa tơnêi tá hâi châ tiô pơkâ. Hlối, kal séa ngăn kơtăng tơdroăng ki xúa liăn ngân ki nâp, ví tơkŭm tơdroăng tơngah tung môi kơxô̆ liăn ki tá hâi chiâng vâ xúa khât, ối xâu trâm tơdroăng ôh tá mơhúa kal pro tơdâng tơ’mô ‘na liăn ngân”.