Xông tơpui a tơdroăng kal, pôa Tập Cận Bình, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối kơtăn kố tro 1 hơnăm rơtế pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tơbleăng pơxiâm Troăng prôk ti tăng plĕng ‘na kăch măng, ‘na tuăn ihiâm Đảng ƀă tuăn pâ pú hmâ hriăn plĕng hriâm tâp,  troh nôkố droh rơtăm 2 tơnêi têa hiăng ai hên tơdroăng ki châ hlo hriâm tâp a dêi pó, gum dêi pó. Pôa pói vâ, ƀă tâi ihiâm mơno ƀă ivá hơnăm ối nếo, droh rơtăm 2 tơnêi têa pơtối tơrŭm môi tuăn, pôu râng hnoăng cheăng ai hên tơdroăng ki veăng hên tâ mê nếo tung tơdroăng 2 tơnêi têa Sinuâ ƀă Việt Nam tơdjuôm ivá prôk a troăng rơxông nếo, rơtế dêi pó pêi pro mâu tơdroăng ó rơdêi ‘na pơhlêh nếo tơmiêt pêi rơkê, lôu péa tơrŭm cheăng ƀă rơtế ƀlêi trâng.

‘Na peăng dêi tơná, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối, droh rơtăm, rơxông ối nếo 2 tơnêi têa pơrá kô chiâng hâk tơngăm ƀă nhuô̆m tơrŭm cheăng “rế cho khu pú, rế cho nhŏng o” pơla péa Đảng ƀă Kuăn pơlê péa tơnêi têa Việt Nam – Sinuâ xua Pôa Hồ Chí Minh, Kăn xiâm hnê ngăn tơnêi têa ƀă pôa Mao Trạch Đông, Kăn xiâm hnê ngăn kong têa Sinuâ hneăng hdrối rơtế mâu rơxông kăch măng péa tơnêi mơ’no ivá tơbêng. Pôa pói vâ rơxông ối nếo péa tơnêi têa thế mơjiâng ki khên tơnôu kal kí krá tơniăn, troăng tơmiât rêh tro; thăm hriâm dêi pó, mơnhông ‘na tuăn ihiâm pơhlêh nếo tơmiât pêi rơkê, pơkuâ khoa hok – kŏng ngê̆, mơdêk ihiâm mơno djâ troăng ahdrối pleăng hnoăng cheăng, veăng gum tơxâng ăm tơdroăng mơnhông mơdêk dêi rêm tơnêi têa ƀă tơrŭm pú hmâ péa tơnêi têa Việt Nam – Sinuâ.

Xuân tung kơhâi dế lơ 15/4, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa Việt Nam ƀă pôa Tập Cận Bình, Kăn xiâm pơkuâ hnê ngăn Đảng, Kăn xiâm hnê ngăn kong têa Sinuâ hiăng châ hlo Leh kĭ mâu mơ-éa ki kal tơrŭm ki má môi pơla mâu khu xiâm, kơvâ cheăng, kong pơlê péa tơnêi têa.