Ki má môi tung tơdroăng pêi cheăng la ngiâ cho Tơ’noăng Ôm hyô têa kơxĭ Khánh Hòa 2026 ƀă dó inâi ‘’Mơngiơk kơpong kân rơdâ têa kơxĭ – Xông râ lâp plâi tơnêi’’, tiô tối hdrối tơkŭm po a khế 7. Tung tơdroăng po tơ’noăng kô tơkŭm po hên tơdroăng môi tiah leh pro pơro drô troăng kơphô̆, po kân xah nhak lâp plâi tơnêi, leh hô̆i ếo xŏn, tíu mơđah kơchâi kâ; hôp tơpui tơno ôm hyô tuk têa kơxĭ lâp plâi tơnêi, mơđah tơbleăng um ngê̆ thuât, leh hô̆i kleăng chhá, mơ-éa, leh hô̆i plâi kâ ƀă mâu tơdroăng tơ’noăng ivá têa kơxĭ...

Pakĭng mê, kong pơlê xuân hbrâ tơkŭm po Hâi tơkŭm xah hêi ro Khôi túa lĕm tro mâu hdroâng kuăn ngo kong pơlê Khánh Hòa 2026 ƀă tơdroăng ki veăng dâng 35 tíu. Mơnhên ôm hyô cho môi tung pŭn trăng ki xiâm dêi cheăng kâ, Khánh Hòa hiăng tơbleăng troăng pêi cheăng ton xŏn mơnhông mơdêk, rah xo mơ’no liăn cheăng ki xiâm, vâ mơjiâng inâi krê ăm ôm hyô ƀă tơdroăng po ƀă ki kơlo kân râ lâp plâi tơnêi.