Dó inâi “Mơdêk tơrŭm cheăng kâ, po rơdâ rôh ‘no liăn cheăng pơla péa pâ”, rôh hôp kố ai tơdroăng veăng ai mâ dêi 400 ngế khu mơdró kâ 2 tơnêi têa tơkŭm tung mâu kơvâ cheăng môi tiah: kong ngê̆ pro kế kâ ƀă têa ôu, ICT, kong ngê̆ ki lĕm, on tơhrik vêh pro, viễn thông, mơjiâng pro tơmeăm, hâng pơklĕp meăm, liăn ngân, kơmăi kơmok, cheăng lêng, khăm pơlât, pơkeăng, gâk kring tơniăn tung măng, ƀaoh hiêm tê tơmeăm ngi kong têa ê, kơvâ cheăng luât ƀă hên ki ê.

Tơpui a Rôh hôp, Ngế pro xiâm hnê ngăn Kŏng hòa Slovakia tối nhên tơrŭm cheăng pơla péa tơnêi têa châ mơjiâng tung tơrŭm cheăng ki ton xŏn ƀă pơkâ pêi xiâm dêi rôh lăm pôu rôh kố cho hiăng châ rơhéa mâu tơdroăng tơkêa mơdêk tơrŭm cheăng chiâng Khu tơrŭm cheăng tung la ngiâ. Pôa Robert Fico, Ngế pro xiâm hnê ngăn kong têa tối nhên, Việt Nam cho pú hmâ ki kân má môi dêi Slovakia a Đông Nam Á. Slovakia rơhêng vâ thăm mơnhông tê tơmeăm ngi kong têa ê ƀă tơbleăng pro mâu tơdroăng tơkêa a Việt Nam, malối cho tung mâu kơvâ cheăng ki xiâm, mê cho: Cheăng lêng, hâng pơklĕp meăm, gâk kring măng, kơmăi kơmok pro ô tô ƀă khăm pơlât.

A rôh hôp, pôa Lê Minh Hưng, Ngế pro xiâm hnê ngăn tơnêi têa ăm ‘nâi rôh pôu Việt Nam rôh kố, 2 ngế pro xiâm hnê ngăn tơnêi têa hiăng tơbleăng tối tơdjuôm ‘na mơdêk tơrŭm cheăng Việt Nam – Slovakia chiâng Khu tơrŭm cheăng tung la ngiâ; ing mê ăm Việt Nam chiâng tơnêi têa apoăng a Đông Nam Á ai tơrŭm cheăng tung la ngiâ dêi péa tơnêi têa vâ pro ivá rơdêi ƀă po troăng ăm môi tơdroăng cheăng tung la ngiâ nếo vâ péa tơnêi têa rơtế ƀă dêi rơpó mot tung hneăng mơnhông nếo a ‘ngêi tâ, tơxâng tâ, trâu rơdâ tâ.