Ngế pro xiâm hnê ngăn tơnêi têa tối nhên, Chin phuh dế pêi pro kơtăng, tơkŭm hnê mơhno pơkâ tơleăng klêi mâu tơdroăng, tơdroăng tơkêa bro ki ối krêa ton, khŏm mơ-eăm pơkâ tơleăng, lêi tah mâu tơdroăng ki xơpá, tơvâ tơvân, tung mê ai mâu tơdroăng ki kal ối tung kơvâ pơkuâ ngăn dêi Khu xiâm ngăn pơkeăng pơlât. Ƀă tơdroăng tơkêa mơjiâng pro tíu pêi cheăng 2 dêi mâu Hngêi pơkeăng Bạch Mai, Hngêi pơkeăng Việt Đức, Ngế pro xiâm hnê ngăn tơnêi têa hnê mơhno mâu Khu xiâm ngăn pơkeăng, Khu xiâm mơjiâng pro, Khu xiâm pơkuâ ngăn lêng, Khu xiâm ngăn Kŏng an tiô kơvâ cheăng ki ai tơdjâk troh, hnoăng cheăng, hnoăng pơkuâ hnê mơhno mâu kơ koan ki ai tơdjâk troh tơkŭm mơhnhôk tơlo mâu kơxô̆ liăn, pêi pro tơdâng tơ’mô, kơtăng, tơƀrê vâ rĕng pro klêi mâu tơdroăng ki tá hâi teăm pro klêi, ối tơvâ, pro klêi ăm 2 toăng hngêi pơkeăng mot pêi cheăng a khế 6 troh khế 9 hơnăm 2026.

Pôa Lê Minh Hưng, Ngế pro xiâm hnê ngăn tơnêi têa pơkâ thế Khu xiâm ngăn pơkeăng pơlât rĕng pêi pro klêi hlá mơ-éa Tơniăn krúa kế kâ ‘mâi pơhlêh ƀă chêh pro klêi kơvâ cheăng ki ai tơdjâk troh pơkuâ ngăn tơnêi têa ‘na mơgrúa lĕm kế kâ; chêh pro túa pơkâ, troăng hơlâ tơbleăng khăm ivá rêm khế lơ khăm séa ngăn tê kơtê iâ hlái rêm hơnăm môi xôh ăm kuăn pơlê, tung mê, ai mâu ngế ki châ kơjo gum tơdrêng tung hơnăm 2026, malối cho a kơpong hngế hngo.