Vi ƀan pơkuâ Kuô̆k hô̆i mơnhên, mâu rơkong pâ thế hiăng châ tối tung tơbleăng tiô rơkong tơpui, pâ thế dêi kuăn pơlê ki tâ phĭu ƀă kuăn pơlê, mơjiâng tơdroăng ki kal ăm tơdroăng séa ngăn tơdroăng tơkŭm po pêi pro mâu kơ koan ki tơdjâk. Vi ƀan Pơkuâ Kuô̆k hô̆i pơkâ thế: Chin phuh, Ngế pro xiâm hnê ngăn Chin phuh, mâu khu xiâm, kơvâ cheăng Tơnêi têa tơkŭm hnê mơhno tơpui pêi pro tâi tâng mâu rơkong pâ thế ki u ối, ton xŏn; Thăm pôu râng hnoăng cheăng dêi ngế ối a ko, ƀă tơdroăng châ tơƀrê tơleăng pâ thế ƀă mơnhên pêi pro hnoăng cheăng.

Xuân a roh hôp, Vi ƀan pơkuâ Kuô̆k hô̆i hiăng tơpui ‘na mơ-éa chêh hdrối Tơdroăng pơkâ dêi Kuô̆k hô̆i ‘na mâu troăng pơkâ pêi, troăng hơlâ mơnhông khôi túa lĕm tro Việt Nam ƀă mơ-éa chêh hdrối Luât loi tĭng tiô khôp (‘mâi rơnêu). Viƀan pơkuâ Kuô̆k hô̆i séa ngăn, tơbleăng ăm pêi pro Tơdroăng pơkâ ‘na tơdroăng mơjiâng 10 bêng ối tung kong pơlê Đồng Nai; mơjiâng pơlê kong kơdrâm Đồng Nai ối tung Tơnêi têa.