A leh mơgêi, Khu tơkŭm po hiăng pơ-ôu pơ-eăng mâu ngế ki chêh ƀă diâp 24 pri Mêa; 37 pri Hâu, 71 pri Hlái; 60 pri Mơhnhôk ăm mâu ƀai chêh: Tơpui mơ’no tơdrêng, phŏng sư̆, phŏng sư̆ séa ngăn, tơdroăng tơpui nâl hdroâng kuăn ngo; podcast ƀă hiá hé. Tung mê, hên ƀai ai tơdroăng chêh ‘na ti tăng, châ hlo; hên troăng pêi cheăng tơpui tung rơ’jíu tiô rơxông nếo châ mâu ngế chêh hlá tơbeăng, mâu Hlá tơbeăng, Rơ’jíu, Um tơvi kong pơlê, pơlê kong kơdrâm pêi pro rơkê, tơmiât pêi rơkê, ai kơnâ ‘na tơdroăng cheăng ƀă pro tơdjâk rơdâ lĕm tung pơlê pơla.

Pakĭng mê, Khu tơkŭm po xuân diâp 29 pri ki ê, mê cho: Pri ngế hơ’muăn (host) rơkê; Pri ngế Tơpui djâ tung rơ’jíu, um tơvi tơdrêng rơkê má môi; Pri Ekip mơjiâng tơdroăng tơpui tơdrêng tung rơ’jíu, um tơvi rơkê; Pri tơpui tung rơ’jíu, um tơvi rơkê; Kih thuât viên ki rơkê. Veăng Tơ’noăng tơpui pơchuât tung rơ’jíu, um tơvi kố, VOV Tây Nguyên châ 1 Pri Mêa; 1 Pri Hâu ƀă 1 Pri mơhnhôk.