Hâi lơ 13/4, Khu pơkuâ xiâm Đảng tơkŭm po Rôh hôp lâp tơnêi têa hriăn ngăn, hriâm tâp, pơkâ pêi kơtăng ƀă tơbleăng pêi pro Pơkâ Rôh hôp má péa Khu pơkuâ ngăn xiâm Đảng hneăng XIV. Tơpui hnê mơhno a rôh hôp, pôa Tô Lâm, Kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa tối nhên túa tơmiât pêi, pơkâ thế mơ’no pêi klêi kơ’nâi hneăng hôp rôh kố cho ‘nâi nhên, tơkŭm tơbleăng pêi tiô túa ki kơtăng, tơdâng tơ’mô, tơƀrê, pro chiâng pơhlêh nhên tâ tung tâi tâng khu pơkuâ tơdroăng cheăng kal kí.

Pôa Tô Lâm, Kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa pơkâ thế, khŏm mơ-eăm ‘mâi mơnhông túa tơmiât ‘na chêh pro hlá mơ-éa, mâu khu xiâm kơvâ cheăng, hneăng cheăng tung túa pơkâ tơbleăng pêi, tiô tơdroăng cho rêm pơkâ mơnhông kong pơlê, túa pơkâ kơvâ cheăng athế châ ngăn tâi tâng, tro ƀă tơrŭm kơpong. Tung pơkâ tâi tâng athế tơtrŏng mơ-eăm pêi tiô tơdroăng pơkâ, tiô tơdroăng rơhêng vâ, tiô troăng hơlâ pâ – ăm, tiô hneăng cheăng, tiô túa pêi pa kong. Mâu tơdroăng tơkêa vâ tơbleăng pêi pơrá athế châ pơkâ tung tâi tâng, châ ngăn tiô túa ki nhên, kơtăng.