Klêi kơ’nâi tơmot chiâng môi, kong pơlê Dak Lak châ ai môi tíu ôm hyô ki lĕm má môi – tíu kơpong kân rơdâ Tây Nguyên trâm kong tơbăng achê têa kơxĭ Tơdế Tơnêi têa. Tung mê, kơpong kân rơdâ Tây Nguyên cho um mơhno dêi ivá rêh krá lĕm, pro chiâng tơdroăng ki trâu dêi khôi túa lĕm vâi krâ nah mâu hdroâng mơngế, mê kơpong kong tơbăng achê têa kơxĭ peăng mâ hâi Lo cho tơdroăng kơdrâm phiu ro, pêng păm ki lĕm ro dêi têa kơxĭ ƀă têa kơxĭ kân rơdâ. Tơtrŏng má môi, ing kơpong kân rơdâ chu troh a kong tơbăng dêi Dak Lak pơrá tơdjuôm ai tơnêi hmốu ngo on – bazan lĕm má môi, tơkoh tíu mơhno khôi túa lĕm tro chêng koăng ƀă Ƀài chòi Nam Trung bộ. Tung pơla kố nah, a Dak Lak hiăng po hên tơdroăng ôm hyô mơtiah: tơkŭm po khu famtrip séa ngăn ôm hyô rơtế lăm prôk hên, hlá tơbeăng, KOLs, KOCs; Roh hôp mơnhên tơdroăng châ tơƀrê troăng prôk ôm hyô ‘’Dak Lak – Vêh a kơpong ai tơmeăm kơnía’’, tơkŭm po Kơchơ tê mơdró – ôm hyô, OCOP ƀă tơmeăm ki kơhiêm krê pơlê; Tơdrá DJ – tơdroăng pro pơro gum ăm tơmối...

Pôa Lê Phúc Long, Phŏ Kăn pơkuâ Khu pơkuâ Khôi túa lĕm tro, Tơ’noăng ivá ƀă Ôm hyô Dak Lak tối:

"Tơmối ôm hyô troh Dak Lak peăng mâ hâi Luô mê mơnhên kô châ xúa, châ hlo ngăn khôi túa lĕm tro ‘na chêng koăng ƀă ngin kô ai mâu tơmeăm ôm hyô châ hlo, châ tâ môi tiah pro chêng koăng, tôu chêng koăng, châ hlo vâ rơnêu pât chêng koăng. Ƀă peăng mâ hâi Lo ai Ƀai Chòi mê ngin kô mơjiâng mâu tour Ƀài chòi. Môi tiah mê pin kô ăm tơmối châ hlo, châ rơhdruê, châ sâp hmân ếo vâi krâ nah; xúa mâu kế xah, mâu prôa, ting ning vâi krâ nah dêi kuăn pơlê, ing mê kô pro tơmối hâk vâ".

Tung măng tĭng apoăng pơxiâm po mâu tơdroăng ôm hyô kong pơlê Dak Lak hơnăm 2026, kuăn pơlê ƀă tơmối hiăng châ veăng tơná tung tơdroăng ngăn hlo ngê̆ thuât ki krip ro má môi. Pôa Cao Hữu Nhạc ối bêng Tuy Hòa, kong pơlê Dak Lak tối tơdroăng loi tơngah ‘na troăng mơnhông la ngiâ mơnhông ôm hyô pơlê kong pơlê.

"Á hâk vâ môi tuăn ‘na môi tơdroăng mơđah ngê̆ thuât ing Tây Nguyên kơpong kân rơdâ troh kong tơbăng achê têa kơxĭ, tối môi tơdroăng drêng tơmot chiâng môi mê ai mâu tơdroăng tơ’lêi krê. Kố cho roh tơ’lêi po ăm, tơdjêp pơla mâu kơpong kong laga lĕm má môi cho tơdjêp pơla Tây Nguyên ƀă kơpong Kong tơbăng achê têa kơxĭ, kố cho môi tơdroăng tơ’lêi ăm tơdroăng ki vâ mơnhông ôm hyô".

Tiô Khu pơkuâ ‘na Khôi túa lĕm tro, Tơ’noăng ivá ƀă Ôm hyô kong pơlê Dak Lak ăm ‘nâi, klêi kơ’nâi po rơdâ tíu mơnhông, ôm hyô kong pơlê ai hên tơdroăng vâ mơjiâng mâu tơmeăm tơdjêp pơla kơpong kân rơdâ ƀă kong tơbăng achê têa kơxĭ. Kố cho xiâm kối ki kal ai hên hĭn tơdroăng châ hlo, châ tâ, mơdêk ivá tơbriât dêi tíu troh. Hơnăm 2025, Dak Lak hiăng tơdah lối 7 rơtuh 300 rơpâu roh, tâk lối 31% tâng pơchông ƀă roh kố hơnăm nah. Krê pái khế apoăng hơnăm 2026, lâp kong pơlê tơdah dâng 2 rơtuh 300 rơpâu roh tơmối, pêi lo liăn ôm hyô châ lối 4.100 rơtal liăn, pơtối rak tơdroăng tơtêk hôm khât păng ‘nâng.

Kong pơlê mơnhên troăng prôk la ngiâ djâ ôm hyô chiâng kơvâ cheăng kâ ki xiâm, chôa ‘lâng mơjiâng inâi ‘’Dak Lak – Vêh a kơpong kơnía’’ chiâng tíu troh ki lĕm pro tơmối há vâ troh ăm mâu tơmối tung tơnêi têa ƀă kong têa ê. Ing tơdrá chêng chuât hơngế kơpong kân rơdâ troh tơdrá Ƀài Chòi kơdrâm phiu ro kong tơbăng achê têa kơxĭ. Ing tơdrá chêng chuât xơtó tíu kơpong kân rơdâ troh tơdrá Ƀài Chòi kơdrâm phiu ro kong tơbăng achê têa kơxĭ, um méa Dak Lak lo mơhno hên mơngiơk lĕm, mơhno ki lĕm dêi tơdroăng rêh ối ƀă mơhnhôk tơmối hâk vâ troh. Xua tơdroăng ki tơkoh mê dế mơjiâng ivá ki pro tơmối hâk vâ troh ki krê, krếo tơmối troh châ tâ châ hlo, châ ngăn ƀă tâ ki tŭm môi kơpong tơnêi pêng păm khôi túa lĕm tro, pêng păm tơdroăng rêh ối hơniâp ro.