Tung mâu hâi apoăng khế 4, a kŏng trương mơjiâng pro krâ ‘măn kơxô̆ 2 (XL02) dêi tơdroăng Tơkêa bro peăng má 2 troăng kân tơdrăng sap Khánh Hoà - Buôn Ma Thuột dế tơxup mơjiâng pro thâ rĕng klêi. Tơrêm khu kŏng nhân, kih sư rơtế ƀă hên mâu kơmăi, tơmeăm xúa tung pêi pro dêi Kong ti veăng Tơlo liăn ‘no mơjiâng pro ƀă pro troăng prôk Phương Thành dế thâ ok ƀê tong pro trăng,  meăn tơnông ki rokông ƀă toh chhá kơxu péa pâ xiâm kông. Ngoh Đõ Đình Huấn, vế rơxế muk vâ tŏng ok pro ăm tơbăng mê tối, tung pơla yă têa châu to kơnâ, tơdroăng pêi cheăng ƀă kơmăi châ pơkâ pêi nhên krâu khât, tơtro tâ ƀă ‘nâi kơdĭng kơxô̆ liăn hlối pro tơniăn tơdroăng mơjiâng pro.

“Nhŏng o hbrâ pêi hnoăng cheăng ki xúa kơmăi kơmok mê tiê a kơmăi tro chôu phut ga, têk dju kông athế ăm tơdâng, tơ’mô, ôh tá têk mơdêi tơdrêng. Drêng chơ têk djâ kô têk chôa lâng, rak vâ tơniăn, ví pro têi ga ah kô tâi têa châu. Mâu rôh tơkôm rơxế chơ djâ, lơ pơla pơtê iâ xuân tơpâ kơmăi vâ kơdĭng têa châu”.

Tiô pôa Lương Công Lý, ngế pơkuâ ngăn mơjiâng kơxô̆ liăn mơjiâng tơmeăm khoăng XL02, yă têa châu tâk hên ƀă xiâm vâ rôe ôh tá ai hiăng pro kơxô̆ liăn chơ djâ pêi ƀă kơmăi tâk hên, hlối pro tâk yă mâu tơmeăm ki mơjiâng pro môi tiah meăm thép, xơmong, prêi, hmốu to kơnâ troh 20%. Hlo tiah mê, tíu pêi cheăng hiăng hbrâ rơkê ƀeăn tung tơdroăng tăng têa châu diesel ƀă ‘mâi hơ’lêh pơkâ mơjiâng pro, vâ tơniăn bê têa châu ƀă rak tơdroăng tơkêa bro.

“Têa châu ƀă mâu tơmeăm vâ pro to kơnâ ƀă hlối ôh tá ai hên, ngin hiăng hbrâ tăng tơ’nôm vâ rak tơniăn tung pêi pro mâu hnoăng cheăng. Pakĭng mê, tíu pêi cheăng séa ngăn, tôm xo ƀă tơbleăng pêi mâu tíu ki kal pro cho tôh, ok cháa kơxu troăng, xơmong hmốu tơvât ƀă cháa kơxu drăng mâu troăng ki kal”.

Mơngế pêi pro thâ pêi rĕng xuân dế pro a tíu krâ ‘măn meăn pro a kơxô̆ (XL03) dêi tơdroăng tơkêa bro peăng má 2 dêi troăng kân tơdrăng Khánh Hoà - Buôn Ma Thuột. Kơxô̆ liăn ‘no pro mê kơnâ dâng 1.000 rơtal liăn, mê pro 2 to klôh mot pá kơdâm, ai kông a ngâ ƀă dâng 2,5km troăng. Pôa Trịnh Trung Lượng, ngế pơkuâ kơxô̆ liăn ‘no pro XL03 ăm ‘nâi, vâ chê môi khế hdrối, yă têa châu têa kơxăng to kơnâ, xiâm vâ rôe ai drêng ai drêng ôh pro mâu khu mơdró trâm hên xơpá.

Mơhé ti mê, tíu pêi cheăng xuân pơtối rak dâng 250 ngế kŏng nhân, kih sư rơtế ƀă 100 tơmeăm kơmăi kơmok, rơxế vâ tơniăn  tung mơjiâng pro.

 Nôkố dế rơnó tô mơdrăng ó, kong tô tơnêi khăng tơ’lêi ăm tơdroăng vâ pro mê rêm hâi tíu pêi cheăng kal dâng 4 rơpâu lit têa châu diesel vâ trêng a kơmăi vâ pêi cheăng. Xua mê, tiô pôa Trịnh Trung Lượng, tơdroăng tơniăn ai têa châu vâ rôe dế cho tơdroăng ki pro pá ăm tíu pêi cheăng dế vâ pêi.

“Yă têa châu to kơnâ hlối ôh tá ai vâ tí tăng rôe pro ngin thế hbrâ inhên khât. Ngin hiăng hbrâ pêi cheăng ƀă mâu tíu ki tê vâ rĕng châ rôe, rôe hên vâ ’măn kơdĭng. Nôkố ngin dế ‘măn kơdĭng 3 kơthung kân ki kân sap 15.000 troh 20.000 lit têa châu diesel ƀă kô châ xúa vâ pêi cheăng sap 1 khế troh 1 khế tơdế”.

Pơxiâm pro sap khế 6/2023 ƀă tâi tâng kơlo ‘no liăn pro vâ chê 22.000 rơtal liăn, troăng kân tơdrăng sap Khánh Hòa troh Buôn Ma Thuột tơngah pro tơƀrê ăm tơdroăng tơrŭm bă kơpong Tây Nguyên ƀă kơpong kĭng têa kơxĭ pá Hdroh Tơdế tơnêi têa. Tung pơla yă têa châu têa kơxăng to kơnâ, mâu khu mơjiâng pro tơdroăng tơkêa bro hiăng hbrâ tơbleăng pêi hên troăng ki rơkê ƀeăn vâ tơniăn tung pêi pro tiô hnê mơhno dêi Ngế pro xiâm hnê ngăn Chin phuh.