Kơxê lơ 8/4, pơtối Hneăng hôp má Môi, Kuô̆k hô̆i hneăng XVI, mâu kăn tơpui tơno a tôh ‘na pái tơdroăng tơkêa luât ‘mâi pơhlêh mê cho: Luât Pơlê kong xiâm, Luât Tơ’noăng, khĕn kơdeăn ƀă Luât loi tĭng tiô khôp. Tung mê, Kơxop hlá mơ-éa Luât Pơlê kong xiâm ‘mâi pơhlêh châ mơnhên cho luât ki kal cho thăm mơnhông klâ xoăng râ, xoăng hnoăng pơkuâ tâi tâng ăm kăn pơkuâ pơlê kong xiâm Hà Nội, tro ƀă rak vế mâu liăn ngân, troăng hơlâ séa ngăn ƀă hnoăng cheăng pôu râng tơpui tối leăng nhên.

Mâu troăng hơlâ tơmiât pêi troh tŏng gum xơpá ‘na troăng prôk, kong prâi tơnêi tơníu, kơphô̆ ƀă mơhnhôk tơlo liăn ngân mơjiâng pro krá tơniăn. Tơpui tung Luât Pơlê kong xiâm ‘mâi pơhlêh. Pôa Trần Thanh Mẫn, Kăn xiâm hnê ngăn Kuô̆k hô̆i ăm ‘nâi, tơdroăng dêi Luât rôh kố athế xoăng râ, xoăng hnoăng pơkuâ tŭm têk, ăm kăn pơkuâ pơlê kong kân Hà Nội tiô pơkâ: Hà Nội pơkâ, Hà Nội pêi, Hà Nội pôu râng dêi hnoăng.

Kăn xiâm hnê ngăn Kuô̆k hô̆i tối mâu tơdroăng ki tơƀrê dêi kơxop hlá mơ-éa luât, môi tiah: Po rơdâ pơkâ xúa luât; ‘mot tơ’nôm ôh tá êa pôu râng tơdroăng luât; mơjiâng tíu pêi cheăng; thăm mơdêk hnoăng pơkuâ khu tơrŭm kơ koan cheăng ăm Hô̆i đong hnê ngăn pơlê kong kân.