Hâi lơ 8/4, a Tíu pêi cheăng Kăn xiâm hnê ngăn tơnêi têa, tơkŭm po roh hôp tơbleăng tơdroăng pơkâ dêi Khu xiâm kal kí pơkâ rah xo Khu pơkuâ, Khu hnê mơhno, Kăn pơkuâ hnê ngăn Đảng, Phŏ Kăn pơkuâ hnê ngăn Đảng ủi Chin phuh ƀă tơbleăng mâu pơkâ rah xo mâu kăn xiâm Chin phuh hneăng hơnăm 2026 – 2031. Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa hiăng diâp tơdroăng pơkâ ăm pôa Lê Minh Hưng, Kăn pơkuâ Đảng ủi Chin phuh, Ngế pro xiâm hnê ngăn tơnêi têa rơtế mâu Kăn hnê mơhno má môi; tơdrêng amê diâp tơdroăng pơkâ rah xo pôa Phạm Gia Túc, Phŏ Ngế pro xiâm hnê mơhno má môi, Đăi tươ̆ng Phan Văn Giang to pro Phŏ Ngế pro xiâm hnê ngăn tơnêi têa, Ngế xiâm pơkuâ lêng, rơtế mâu Phŏ Ngế pro xiâm hnê ngăn tơnêi têa ƀă Ngế xiâm, kăn pơkuâ mâu kơ koan râ xiâm.

Xông tơpui a roh hôp, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên hneăng cheăng nếo ôh tá xê to tơdroăng ki pơtối tơdjêp mê thế cho troăng pơhlêh mơnhông tơtêk kân tâ, tơdroăng châ tơƀrê má mơ’nui thế châ vê ƀă tơdroăng ki dâi lĕm tơdroăng rêh ối dêi kuăn pơlê ƀă tíu pêi cheăng, tơdroăng ki loi tơngah dêi tơnêi têa.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên hnoăng cheăng ki kal má môi dêi Chin phuh hneăng nếo cho mơjiâng tíu mơnhông mơdêk, po tíu tơtêk, pro ivá tơtêk nếo ƀă mơdêk ivá tơkŭm po pêi pro vâ châ tơdroăng hiăng pơkâ mơ’no.