Tiô Khu xiâm ngăn Hnê hriâm ƀă Hnê mơjiâng tuăn ngôa rơkê kong pơlê Khánh Hòa, nôkố lâp tung kong pơlê  ai lối 64.000 ngế hok tro kuăn ngo, tung mê râ má môi ai lối 28.000 ngế vâi o. Krê kơpong peăng hdroh kong pơlê (cho kong pơlê Ninh Thuận hdrối) ai lối 60% ngế hok tro cho kuăn ngo.

Jâ Lê Thái Trường Thi, Phŏ pơkuâ Tíu xiâm ngăn Hnê hriâm ƀă Hnê mơjiâng tuăn ngôa rơkê dêi kong pơlê Khánh Hòa ăm ‘nâi, hdrối nah xua kơxô̆ liăn ngân xo iâ, kong pơlê Ninh Thuận ton bú tơbleăng pêi pro mâu luât tŏng gum môi tiah kơjo kum phái ăm hok tro ki kâ ối pơtê kơhâi dế ƀă hnoăng liăn hriâm ăm mâu hok tro kuăn ngo, tung pơla mê hên luât pơkâ krê ki ê hâi châ pêi pro tŭm.

Klêi tơ’mot tơdjuôm 2 kong pơlê sap hâi lơ 1/7/2025, tơdroăng tơbleăng mâu luât pơkâ tơdrêng tơ’mô hâi châ tơbleăng teăm tơdrêng. Jâ Lê Thái Trường Thi, tối:

“Tơdroăng tơbleăng Pơkâ môi tuăn tơdjuôm kô ối hên tơdroăng ki tơdjâk troh xua ối kơxô̆ liăn, troăng hơlâ. Xua tơdjâk troh hnê hriâm 2 rôh tung môi hâi, thái cô, hngêi trung, tíu ối tơmeăm khoăng, kế kâ... hên tơmeăm tơdjâk troh kâ kơhâi dế dêi vâi o. Ối hên tơdroăng xơpá. Kơpong Ninh Thuận ton nah hên tíu xuân hâi châ hnê 2 rôh tung môi hâi”.

Klê tâng tối dêi VOV ‘na tơdroăng hok tro kơpong peăng hdroh Khánh Hòa hâi châ xúa luât pơkâ tŏng gum ăm kâ kơhâi dế, Vi ƀan kuăn pơlê dêi kong pơlê Khánh Hòa ăm ‘nâi, hiăng pơcháu  ăm Khu xiâm ngăn hnê hriâm ƀă hnê mơjiâng tuăn ngôa rơkê  pơkuâ séa ngăn tâi tâng mâu luât tŏng gum pơla péa kong pơlê hdrối nah, ing mê tăng ‘nâi plĕng mơjiâng mâu pơkâ ki nếo pơtroh ăm Hô̆i đong kuăn pơlê dêi kong pơlê. Tơdroăng ki kal tơkŭm a mâu luât pơkâ kơjo kum ăm hok tro kơpong xơpá môi tiah hnoăng liăn hriâm ăm mâu hok tro kuăn ngo, kơjo kum liăn nâp, tơdroăng têa tôu ro hngêi trung tơdrêng ƀă mâu luât pơkâ tŏng gum ối pơtê kơhâi dế ƀă pơ’lêh tơdroăng hriâm ăm mâu hok tro kơpong kuăn ngo.

Tơdroăng mơjiâng mâu pơkâ ki nếo vâ pôi tá hơngế ki kơtăn dêi pó ‘na tơdroăng xúa luât pơkâ tŏng gum ăm pơla mâu kơpong, tơniăn ăm hok tro tung lâp kong pơlê Khánh Hòa klêi tơ’mot tơdjuôm châ achê tơdroăng hriâm ƀă châ rak ngăn ăm hok tro  kâ hên trếo kơhiâm tâ.

Pôa Nguyễn Thanh Hà, Phŏ kăn hnê ngăn Vi ƀan kuăn pơlê kong pơlê Khánh Hòa ăm ‘nâi, mâu pơkâ tối hdrối kô châ pơtroh ăm Hô̆i đong kuăn pơlê dêi kong pơlê Khánh Hòa a rôh hôp la ngiâ, klêi mê tơbleăng tơdrêng tâi tâng tung lâp kong pơlê, malối kơjo pêi ahdrối ăm kơpong kuăn ngo ƀă kơpong ối trâm hên xơpá.

“Tơdroăng kơjo gum ăm kâ kơhâi dế, ối pơtê kơhâi dế ăm mâu hok tro kuăn ngo pro pơxúa khât. Kum ăm mâu vâi o châ hriâm đi đo ôh tá pơtê. Kơjo kum vâi o tung lăm hriâm, kơjo kum ăm rơpŏng hngêi ki xơpá. Ing mê, kum ăm vâi o ai trếo kơhiâm tung châ, châ piê lĕm hlối ai ivá mo dâi vâ châ pơtối mơ-eăm hriâm tiô tơdroăng tơná púi vâ”.