Tung pơla kơxô̆ liăn pơto ƀă tơmeăm ki apoăng tâk, Kŏng ti Yến Sào Khánh Hòa xuân rak tơtêk păng ‘nâng. Pái khế apoăng hơnăm 2026, pêi lo liăn tơtro má môi dêi khu tê mơdró châ dâng 1.040 rơtal liăn, tâk 19% tâng pơchông ƀă roh kố hơnăm hdrối, kêi đeăng lối 30% pơkâ pêi lo liăn hơnăm. Tiô jâ Trịnh Thị Hồng Vân, Kăn hnê ngăn Hô̆i đong ngế tơrŭm cheăng Kŏng ti Yến sào Khánh Hòa, khu tê mơdró mơdêk mơhnhôk tê mơdró, po rơdâ tíu tê mơdró ngi kong têa ê, ki rơhêng vâ tối cho kơchơ kong têa Sinuâ. Tơdrêng amê, kŏng ti pêi pro hên troăng pêi kơdroh kơxô̆ liăn vâ rak tơniăn yă, tơniăn ivá tơbriât cheăng dêi tơmeăm.

‘’Mâu kơchơ mơdró ki pá môi tiah Mih, Úc, Canada pơrá ai pơkâ kân, laga pơkâ ti tăng xiâm kối dêi kơchơ kong têa Sinuâ ối krá tơniăn tâ, ing tơdroăng tăng, pro troh tê ngi kong têa ê ƀă tê. Xua mê, khu tê mơdró dế pơtối tơrŭm ƀă mâu khu tê mơdró ƀă grup pơkuâ kân a Sinuâ vâ po rơdâ kơchơ mơdró ƀă mơnhông inâi Yến sào Khánh Hòa’’.

Rơtế ƀă tơdroăng mơ-eăm dêi khu tê mơdró, tơdroăng mơhnhôk mơ’no liăn cheăng hơnăm 2026 dêi kong pơlê Khánh Hòa xuân tơkŭm mơhnhôk kơxô̆ liăn lâp plâi tơnêi a mâu kơvâ ki xiâm môi tiah kơmăi kơmok, têa châu têa kơxăng, ôm hyô – mơdró ƀă tíu pơlê kong kân - mơjiâng. Pơkâ xiâm tung hơnăm kố cho mơhnhôk ki vâ iâ 2 tơdroăng tơkêa bro FDI ai tâi tâng kơxô̆ liăn mơ’no cheăng sap ing 100 rơtuh dollars tơngi klêng. Pôa Trần Minh Chiến, Kăn pơkuâ Khu pơkuâ Kơpong cheăng kâ ƀă mâu Kơpong kơmăi kơmok kong pơlê Khánh Hòa tối ăm ‘nâi, tơdroăng mơhnhôk mơ’no liăn cheăng châ tíu cheăng mơnhên mâu khu tơrŭm cheăng inhên, tơdjêp ƀă mâu kơ koan tơpui kâ ƀă kong têa vâi ê ƀă khu tơrŭm lâp plâi tơnêi vâ tơbleăng roh tơ’lêi hlâu a kong pơlê.

“Drêng mâu khu mơ’no liăn cheăng kong têa ê ai tơdroăng kal vâ ti tăng plĕng, tiah hmâ vâi kô kơ-êng mâu kăn teăng mâ dêi tơnêi têa tơná hdrối. Xua mê, tâng pin tơbleăng tŭm tơdroăng ăm mâu kăn teăng mâ mê kô tơ’lêi hlâu. Ing tơrŭm kố, mâu kăn teăng mâ xuân chiâng vâ tơbleăng ƀă tŏng gum tơdjêp ƀă khu mơ’no liăn cheăng. Ngin kô krếo tơdrêng mâu khu mơ’no liăn cheăng pin vâ mơ’no liăn cheăng, krếo vâi lăm ngăn, séa ngăn, mơnhên’’.

Pakĭng mơhnhôk mơ’no liăn cheăng, Khánh Hòa xuân mơdêk mơhnhôk mơ’no liăn cheăng tê mơdró, tŏng gum khu tê mơdró po rơdâ kng têa ki tê tơmeăm khoăng. Môi troăng prôk nếo cho xúa kơchơ mơdró Halal, kơchơ mơdró ƀă lối 2 rơtal ngế xúa kế tơmeăm khoăng tung lâp plâi tơnêi. Mâu khu tê mơdró kong pơlê châ tŏng gum kêi đeăng troăng pêi mơnhên Halal, mơdêk pơkâ tơmeăm ƀă po rơdâ tê ngi kong têa ê mâu tơmeăm ki rơdêi.

Tung kơvâ ôm hyô, Khánh Hòa pơtối pêi pro rơdêi mâu kong têa tê mơdró ki xiâm môi tiah Hàn Quốc, Ấn Độ ƀă Rusi; tơdrêng amê tơkŭm po mâu khu famtrip dêi khu tê mơdró pêi ôm hyô lâp plâi tơnêi troh séa ngăn tíu troh ƀă tơmeăm ôm hyô. Tiô pôa Trương Văn Tiến, Kăn pơkuâ Tíu xiâm pêi pro rơdêi mơ’no liăn cheăng, Tê mơdró ƀă Ôm hyô kong pơlê Khánh Hòa, mâu tơdroăng pêi pro rơdêi kô gum po rơdâ kơchơ mơdró lâp plâi tơnêi, tơdrêng amê mơdêk xúa tơmeăm ƀă tê ngi kong têa ê tơdrêng ing ôm hyô.

‘’Tung pơla nôkố, ngin mơdêk tơdroăng tê tung tơnêi têa, tơdrêng amê pơtối po rơdâ a mâu kơchơ mơdró ki kong pơlê hiăng kĭ tơkêa tơrŭm, ki rơhêng vâ tối cho mâu kơpong iâ tro tơdjâk xua tơdroăng ki ôh tá tơniăn pakong.Ing mâu tơdroăng pêi pro rơdêi ƀă tơdjêp, ôm hyô xuân kô gum mơdêk tơdroăng rôe xúa ƀă tê ngi kong têa ê tơdrêng’’.

Tiô pôa Nguyễn Việt Hùng, Kăn hnê ngăn Vi ƀan kong pơlê Khánh Hòa tơdroăng pro ăm mơnhông mơdêk rĕng mơ’no liăn cheăng dêi kong pơlê dế pơhlêh ing pêi tơdjâk chiâng hbrâ xêh ti tăng mâu khu mơ’no liăn cheăng ton xŏn, tiô ki pơxúa ‘na cheăng kâ têa kơxĭ, kơno têa kơxĭ ƀă logistics:

“Khánh Hòa ai hên ki pơxúa hlâu, ki rơhêng vâ tối cho ‘na kơno têa kơxĭ ƀă logistics. Hâi khế la ngiâ, mơjiâng troăng pêi cheăng ton xŏn mơhnhôk mâu khu mơ’no liăn cheăng râ lâp plâi tơnêi tung mơ’no liăn cheăng. Drêng mâu khu mơ’no liăn cheăng kân mot tung kong pơlê, hê̆ sinh thái khu tê mơdró dêi vâi xuân kô mơjiâng, gum tơbêng mâu kơpong kơmăi kơmok’’.

Ƀă troăng prôk la ngiâ mơdêk tơpui kâ ƀă kong têa ê gum mơnhông tiô ‘na tuăn ihiâm mơno Tơdroăng pơkâ 59 – dêi Khu xiâm kal kí, rơtế troăng pêi rế hía rế hbrâ xêh ƀă tơtro tung pêi pro ăm rơdêi mơ’no liăn cheăng, tê mơdró ƀă ôm hyô, Khánh Hòa dế chôa ‘lâng po rơdâ tíu tê mơdró ngi kong têa ê, mơhnhôk tơ’nôm kơxô̆ liăn lâp plâi tơnêi, mơjiâng xiâm kối vâ kong pơlê mơnhông mơdêk rơdêi cheăng kâ têa kơxĭ ƀă mơdró tung kơpong Nam Trung Bộ.