Vi ƀan kong pơlê Gia Lai nếo tơkŭm po roh hôp tơpui pêi pro mâu tơdroăng ki tơdjâk troh tơdroăng tăng ƀăng tơnêi vâ pro Tơdroăng tơkêa bro troăng kân ăm phêp rơxế kơtâu têi Quy Nhơn – Pleiku. Hên tơdroăng trâm pá ki nhên hiăng châ kơnó, pơkâ tơdroăng mơ-eăm kân vâ tah lôi, tơmiât troh kêi đeăng hdrối hâi lơ 30/4 hơnăm kố.

‘Na mâu tơdroăng ki trâm pá, đơn yă chêl thiê̆n tiô Tơdroăng pơkâ 30/2025 dêi Vi ƀan kong pơlê Gia Lai iâ tâ tơdroăng ki nhên khât kơchơ mơdró, pro pá puât tung mơhnhôk kuăn pơlê pơcháu ƀăng tơnêi. Pôa Nguyễn Tự Công Hoàng, Phŏ Kăn hnê ngăn Vi ƀan kong pơlê Gia Lai pơkâ mâu cheăm bêng, tíu cheăng rĕng tăng ƀăng tơnêi tơniăn tơdrăng lĕm, tro tiô pơkâ; tơdrêng amê rĕng xĕn tíu ối, mơ-eăm pơcháu tơnêi hdrối hâi lơ 30/6, tơniăn tơdroăng rêh ối ki kal.

Tơdroăng tơkêa bro troăng kân ăm phêp rơxế kơtâu têi Quy Nhơn – Pleiku (kong pơlê Gia Lai) ai tâi tâng ki xŏn 125 km, troăng kân 4 hơlâ troăng, ăm phêp kơtâu têi 100km/h, prôk tơkâ hluâ 16 cheăm, bêng dêi kong pơlê Gia Lai. Tâi troăng kân ai dâng 4.789 rơpŏng tro tơdjâk, tung mê dâng 620 rơpŏng kal xĕn tíu ối, rơtế lối 6.300 kế tơmeăm, hngêi trăng troăng klông thế xĕn.