Teăng mâ mâu kăn Đảng, Tơnêi têa, pôa Lê Minh Hưng, Ngế pro xiâm hnê ngăn Chin phuh nhoăm diâp ăm inâi “Mâu lêng tơplâ khên tơnôu dêi kuăn pơlê” diâp ăm Mâu lêng tơplâ Kuân khu 4. Kố cho pro mơhá kơnâ dêi Đảng, Tơnêi têa ƀă kuăn pơlê, tơmâng xo mơnê mâu hnoăng hiăng ‘no kal kí, hlối tối nhên, tơdroăng tơplâ ton nah hiăng diâp ăm Kuân khu 4 mâu pơloăng mơnúa pá puât phá tơviah.

Tối nhên, Tơnêi têa dê chôa hvêa mot môi troăng nếo pơkâ châ pơkâ thế, tơdroăng cheăng pêi ki nếo ƀă tơdroăng cheăng lêng, kring tơniăn ƀă kring vế tơnêi têa, ăm mâu lêng, tung mê ai kuân khu 4, Ngế pro xiâm hnê ngăn tơnêi têa pơkâ thế, mâu lêng tơplâ Kuân khu 4 tơmâng ngăn nhên troăng pêi pro, tuăn tơmiêt, ki hlê nếo ‘na lêng, kring tơniăn Tơnêi têa tiô Pơkâ hneăng hôp má 14 dêi Đảng; pêi tro tơdroăng tối tơbleăng, tăng ‘nâi plĕng troăng hơlâ ‘na troăng pêi, luât tơpui kâ, troăng hơlâ, rak tơniăn hơniâp lĕm, tơniăn vâ mơjiâng, mơnhông tơnêi têa, pôi tá ăm kơdrâ, tung tŭm tơdroăng; tơkŭm mơjiâng mâu lêng tơplâ kuăn khu 4 kăch măng, mâu lêng rơkê, tơnôu, pêi cheăng rơkê tiô túa nếo nôkố; pơtối ‘mâi hơ’lêh tơkŭm pêi tro tiô troăng iâ mơngế, rơdêi, tơdâng tơ ‘mô, ai pơ xúa, rơkê ‘na kŏng ngê̆, hbrâ tơmeăm ki lĕm tiô túa rơkê nếo.