Tơpui tâi ihiâm mơno mâu kăn teăng mâ, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa mơnhên, tung mâu hơnăm hiăng hluâ, ing pơkuâ dêi Đảng, Tơnêi têa, tơdroăng ki veăng tơdâng tơ’mô dêi tá khu cheăng kal kí, rơtế ƀă tơdroăng mơ-eăm dêi mâu kong pơlê ƀă kuăn pơlê, tơdroăng rak vế ton ƀă mơnhông ki kơnâ khôi túa lĕm tro mâu hdroâng kuăn ngo hiăng châ tơƀrê hên kal khât, mơjiâng tơdroăng ki pơhlêh tá ‘na hlê plĕng ƀă tơdroăng rêh ối pơlê pơla.

Ki kal tâ mê nếo, tơdroăng rak vế ton khôi túa lĕm tro rế hía rế châ pro krá tơniăn ƀă pơlê pơla. Tung la ngiâ, pôa Tô Lâm pơkâ thế ƀă pói vâ, mâu ngê̆ nhân pơtối hnê ăm rơxông ối nếo, vâ rơkong tơpui, tơdrá rơhdruê tiô khôi vâi krâ nah châ tơdjêp xŏn tung tơdroăng rêh ối hâi kố. Kô chiâng vâ tối u ối rơkong tơpui, u ối mâu tơdrá rơhdruê, tơdrá kơhnhon xuăng, cho u ối hiâm mơno dêi hdroâng mơngế; tơdrêng amê, kal tơmâng pro tơ’lêi hlâu vâ khôi túa lĕm tro châ pêi pro tung tơdroăng rêh ối, ai tíu vâ rak ƀă troh lâp lu, vâ rêm ngế kuăn pơlê, rêm pơlê pơla păng ‘nâng chiâng ki xiâm dêi tơdroăng rak vế ton ƀă mơnhông khôi túa lĕm tro.