Veăng amê ai pôa Lê Minh Hưng, Ngế pro xiâm hnê ngăn tơnêi têa; pôa Trần Thanh Mẫn, Kăn xiâm hnê ngăn Kuô̆k hô̆i ƀă pôa Trần Cẩm Tú, Ngế pơkuâ khu kăn hnê ngăn Đảng. Rôh trâm mâ mơhno ki tơmâng khât dêi Đảng, Tơnêi têa ƀă mâu kuăn ngo tối hnoăng cheăng rế kal dêi khu kăn Kuô̆k hô̆i cho mâu kuăn ngo tung khu cheăng kal kí.

Tơpui ƀă mâu kăn, pôa Tô Lâm tối, tung hơnăm hdrối tơdroăng cheăng Kuô̆k hô̆i ing mâu hneăng pơtối châ pơ’lêh tiô troăng ki ai khât tâ; tơdroăng mơjiâng luât châ mơdêk pêi tơbrê, séa ngăn rế kơtăng khât; tung mê mâu kăn Kuô̆k hô̆i cho mâu kuăn ngo rế mơhno nhên hnoăng cheăng tơná tung tơdroăng cheăng ‘na tŏng gum, séa ngăn nhên khât ƀă pêi pro hlối tơdjêp pơla Kuô̆k hô̆i ƀă mâu kuăn pơlê.

Vâ ai tiah tơdroăng pơkâ kal mơnhông tơbrê tung mâu hơnăm la ngiâ, pôa Tô Lâm pơkâ thế, pơtối pơ’lêh mâu tơdroăng tuăn tơmiât tung tơdroăng cheăng ‘na kuăn ngo ƀă ’na tŏng gum mâu kuăn ngo, ki kal ôh tá xê to veăng kum, mê thế pơ’lêh rơdêi troh tơdroăng pro hlâu vâ mơnhông tơƀrê, tăng rôh ki tơ’lêi vâ kuăn pơlê mơ-eăm.

Ki xiâm ôh tá pơkâ to a xăm kơtiê, mê thế mơdêk pê lo liăn, pơ’lêh hlối mơnhông tơdroăng rêh ối krá, pôi tá hơngế ki kơtăn dêi rơpó tung mơnhông tơƀrê ƀă tơniăn ôh tá pơrah dêi rơpó. Tung pơla mê, mâu kăn Kuô̆k hô̆i cho kuăn ngo kal hbrâ pêi ahdrối tơdroăng tối nhên ki tơvâ tơvân ing pơlê cheăm, pơkâ thế mâu luât tong gum tơtro ƀă tơdroăng ki ai khât dêi tơrêm kơpong, tơrêm kuăn ngo. Rêm tơdroăng pâ thế mê thế ing tơdroăng ki ai khât, rơtế ƀă ivá vâ pêi pro ƀă mơhno nhên troăng vâ pêi ăm tơƀrê .