VOV4.Xơ Đăng - Australia ƀă Hàn Quốc hiăng mơdêk tơrŭm cheăng chiâng tơrŭm cheăng ton xŏn tŭm têk. Tơdroăng kố tơkŭm po drêng pôa Moon Jae-in, Kăn xiâm pơkuâ kong têa Hàn Quốc dế ối lăm pôu pêi cheăng kong têa Australia klăng roh 2 kong têa leh tơbâ 60 hơnăm hâi mơjiâng tơrŭm cheăng tơpui kâ.

Xông tơpui a roh hôp khu chêh hlá tơbeăng tơdjuôm ƀă pôa Scott Morrison, Ngế pro xiâm hnê ngăn kong têa Australia, pôa Moon Jae-in, Kăn xiâm pơkuâ kong têa Hàn Quốc tối ăm ‘nâi, tối dêi pó hên tơdroăng ki kơnâ tơdjuôm môi tiah kuăn pơlê pơkuâ dêi hnoăng cheăng, hnoăng kuăn mơngế, cheăng kâ tung kơchơ tê mơdró, Hàn Quốc ƀă Australia kô pơtối tơrŭm krá tơniăn tâ vâ rơtế trâm mâ ƀă pơloăng mơnúa nếo.

Pôa Moon Jae-in, Kăn xiâm pơkuâ kong têa Hàn Quốc mơnhên, 60 hơnăm hiăng hluâ hiăng mơjiâng tơrŭm cheăng ƀă loi tơngah dêi pó pơla péa tơnêi têa ƀă kố cho mâu tơdroăng ki xiâm krá tơniăn vâ péa tơnêi têa mot tung môi hneăng nếo ƀă hnoăng cheăng cho kăn pơkuâ lâp plâi tơnêi vâ rơtế tơmiât troh môi tơdroăng la ngiâ mơnhông mơdêk, châ tơƀrê tơdjuôm.

Katarina Nga tơplôu ƀă tơbleăng