VOV4.Sêdang - Kơxê hâi lơ 06/10/2021 , a Viện Vệ sinh Dịch tễ Trung ương, jâ  Robyn Modie, kăn teăng mâ Australia a Việt Nam hiăng pơcháu ăm pôa Trương Quốc Cường, Ngế pro xiâm hnê ngăn Pơkeăng pơlât tơ’nôm 300 rơpâu klŏng vaccine AstraZeneca mơjiâng pro a kong têa Australia ƀă hên mâu tơmeăm xúa tung khăm pơlât. Troh nôkố Australia hiăng pơcháu ăm Việt Nam lối 700 rơpâu klŏng vaccine (tung kơxô̆ 1,5 rơtuh klŏng vaccine peăng Australia hiăng tơhrâ).

Australia xuân tơbleăng kô kum ăm Việt Nam tơ’nôm 3,7 rơtuh klŏng vaccine tung la ngiâ ing tơdroăng tơhrâ ƀă UNICEF ƀă Khu xiâm ngăn pơkeăng Việt Nam, mơdêk kơxô̆ vaccine Australia tơhrâ kum ăm Việt Nam lối 5,2 rơtuh klŏng, kơnâ tơ’mô 60 rơtuh liăn AUD. Peăng Australia xuân dế tơrŭm ƀă UNICEF vâ mơdêk xúa tơmeăm rak ngăn vaccine, hnê ăm mâu ngế cheăng ngăn pơkeăng pơlât ƀă tơbleăng pâk vaccine troh mâu kơpong hơngế hngo dêi Việt Nam.

Xuân tung hâi ki mê, pôa Phạm Minh Chính, Ngế pro xiâm hnê ngăn tơnêi têa hiăng pơtrroh kơthô mơnê kơ pôa Scott Morrison, Ngế pro xiâm hnê ngăn kong têa Australia ‘na tơdroăng veăng kum ki kơnía mê.